KPT+

អំឡុងពេលចាក់វ៉ាក់សាំង កុមារត្រូវចៀសកុំធ្វើរឿង ៥យ៉ាងនេះឲ្យសោះ

បានផុស

៤ years មុន

នៅ

ថ្ងៃសុក្រ ២០ សីហា ២០២១

ដោយ

Sonya

ការចាក់វ៉ាក់សាំងការពារជំងឺកូវីដ-១៩ កំពុងដំណើរការប្រើប្រាស់ចំពោះកុមារនិងជំទង់កម្ពុជាអាយុពី ១២-១៧ ឆ្នាំ។ យុទ្ធនាការនេះ ធ្វើឡើងក្នុងគោលបំណងការពារសុខភាពមនុស្សវ័យក្មេងពីការរាត្បាតនៃជំងឺកូវីដ-១៩ និងវីរុសបំប្លែងខ្លួនដទៃៗទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយចាក់វ៉ាក់សាំង កុមារត្រូវប្ដូរទម្លាប់ហូកចុកខ្លះៗ ព្រមជាមួយសកម្មភាពមួយចំនួន ដើម្បីជួយពង្រឹងប្រព័ន្ធភាពស៊ាំឱ្យកាន់តែរឹងមាំ។ វាក៏មានទម្លាប់ខ្លះ និងសកម្មភាពខ្លះ និងជំទង់គួរតែចៀសវាង ដើម្បីបង្ការគ្រោះថ្នាក់ផ្សេងៗចំពោះពួកគេផងដែរ។

ដូច្នេះ មកស្វែងយល់ឱ្យកាន់តែច្បាស់នូវប្រការមិនគួរធ្វើ បន្ទាប់ពីកុមារចាក់វ៉ាក់សាំង!

១. កុំបង្ហោះរូបថតកាតវ៉ាក់សាំងលើបណ្ដាញសង្គម៖ មិនខុសពីមនុស្សចាស់ទេ កុមារក៏គួរតែទទួលបានការការពារនៅលើប្រព័ន្ធអ៊ីនធើណិត។ នៅលើកាតវ៉ាក់សាំងក្មេងៗ មានព័ត៌មានមួយចំនួនដូចជាឈ្មោះ ថ្ងៃខែឆ្នាំកំណើត ប្រភេទថ្នាំវ៉ាក់សាំងដែលកុមារចាក់ ទីតាំងកន្លែងចាក់ និងថ្ងៃខែឆ្នាំដែលពួកគេទទួលវ៉ាក់សាំង ដែលនេះអាចបង្កភាពងាយស្រួលដល់ជនខិលខូច ឆ្លៀតឱកាសបន្លំឆបោកឪពុកម្ដាយដោយប្រការផ្សេងៗ។

២. កុំបោះចោល ឬធ្វើឲ្យបាត់កាតឱ្យសោះ៖ មិនថាមនុស្សពេញវ័យឬកុមារឡើយ ត្រូវរក្សាកាតវ៉ាក់សាំងឱ្យបានល្អ។ សម្រាប់ក្មេងដែលចាក់វ៉ាក់សាំងលើកទី១រួច វាងាយស្រួលក្នុងការទៅចាក់លើកទី២ ដើម្បីបង្ហាញទៅអ្នករៀបចំពិនិត្យ។ បើសិនកុមារមិនមានបង្ហាញកាតទេនោះ ក្រុមគ្រូពេទ្យនឹងបដិសេធមិនចាក់ឲ្យឡើយ។ ជាពិសេស កាតវ៉ាក់សាំងកូវីដ-១៩ នឹងចាំបាច់ពេលធ្វើដំណើរ ចូលរួមកន្លែងមនុស្សច្រើន ឬពេលត្រឡប់ចូលរៀនវិញ។ល។

៣. ហាមចាក់វ៉ាក់សាំងដទៃក្រោយវ៉ាក់សាំងកូវីដ-១៩៖ CDC អាមេរិកបានណែនាំឲ្យចាំរយៈពេល ១៤ថ្ងៃ ក្រោយចាក់វ៉ាក់សាំងកូវីដ-១៩សិន សឹមចាក់វ៉ាក់សាំងផ្សេង ព្រោះនៅមិនទាន់មានការសិក្សាគ្រប់គ្រាន់ដើម្បីបញ្ជាក់ពីប្រតិកម្មរបស់វ៉ាក់សាំងកូវីដ-១៩ និងវ៉ាក់សាំងដទៃទៀតនៅឡើយ។

៤. ហាមប្រើថ្នាំមុនពេលចាក់វ៉ាក់សាំង៖ កុមារខ្លះអាចមិនស្រួលខ្លួន មុនពេលទៅចាក់វ៉ាក់សាំង ឬដើម្បីបង្ការអាការក្រោយចាក់វ៉ាក់សាំង ឪពុកម្ដាយអាចឱ្យពួកគេលេបថ្នាំបំបាត់ការឈឺចាប់ ឬបញ្ចុះកម្ដៅ។ ប៉ុន្តែអ្នកជំនាញហាមដាច់ខាត មិនត្រូវធ្វើបែបនេះទេ ព្រោះអ្នកវិទ្យាសាស្ត្រមិនទាន់ដឹងថា តើវាឆ្លើយតបនឹងកូវីដ-១៩ ដូចម្ដេច ឬអាចប៉ះពាល់ដល់ប្រសិទ្ធភាពវ៉ាក់សាំងឬយ៉ាងណានោះទេ។

៥. កុំឈប់ពាក់ម៉ាស ឬរក្សាគម្លាត៖ ត្បិតតែចាក់វ៉ាក់សាំងរួចរាល់មែន តែសរីរាង្គមនុស្សវ័យក្មេងដូចគ្នានឹងមនុស្សពេញវ័យដែរ គឺមិនទាន់អាចបង្កើតអង់ទីគ័រការពាររាងកាយបានភ្លាមទេ ទាល់តែរង់ចាំ ១៤ថ្ងៃសិន ឬលើសនេះ ទើបរាងកាយមានលទ្ធភាពប្រឆាំងនឹងវីរុសកូវីដ-១៩បាន។ ហេតុនេះ ទោះចាក់វ៉ាក់សាំងរួចហើយក៏ដោយ ក៏មិនត្រូវឈប់ពាក់ម៉ាស ឬរក្សាគម្លាតនោះទេ៕