មូលហេតុអ្នកខ្លះទ្រាំឈឺចាប់ ឱ្យគេធ្វើបាបចិត្តបានរាប់ឆ្នាំ នៅតែមិនព្រមបែកគ្នា

ធ្លាប់ឃើញទេ! អ្នកខ្លះសង្សារធ្វើបាបចិត្ត សឹងប្រេះទ្រូង ឬតាមទាន់ប្ដីប្រពន្ធលួចលាក់មានអ្នកថ្មីយ៉ាងណាក៏ដោយ ក៏ទ្រាំរស់នៅជាមួយគ្នា មិនចែកផ្លូវគ្នាទាល់តែសោះ។ ​ចាស់ៗពីដើមចំណាំពោលថា “កម្ម” ។ តើវាពិតជាកម្មឬយ៉ាងណា? ឬមកពីបុគ្គលនោះគ្មានជម្រើសផ្សេង? តើមានហេតុផលអ្វីឱ្យប្រាកដ? នេះជាការបកស្រាយខ្លះៗ!

១. ខ្លាចភាពឯកា

យោងតាមការសិក្សា ដែលចុះផ្សាយលើគេហទំព័រ Bright Side ភាពភ័យខ្លាចនៃការនៅម្នាក់ឯងអាចធ្វើឱ្យមនុស្សម្នាក់សុខចិត្តត្រាំត្រែងក្នុងទំនាក់ទំនងប្រេះឆា​រហូតដល់ស្លាប់ក៏ព្រម។ មនុស្សខ្លាចឯកា តែងតែគិតថា ទោះមានដៃគូមិនល្អយ៉ាងណាក៏ដោយ ក៏ប្រសើរជាងនៅលីវដែរ។ ពេលខ្លះការនៅតែម្នាក់ឯង គឺជារឿងអវិជ្ជមាន និងគួរឱ្យខ្លាចជាងដែលគេមានដៃគូចរិតអាក្រក់ទៅទៀត។

២. មិនឱ្យតម្លៃខ្លួនឯង

ការសិក្សាក៏បានបង្ហាញផងដែរថា មនុស្សមិនឱ្យតម្លៃខ្លួនឯងរមែងមានទំនោរចង់រក្សាទំនាក់ទំនងល្អក់កករ ទោះបីវាផ្ដល់ការឈឺចាប់ដល់គេក្ដី។ គេគិតថា ខ្លួនមិនល្អ បានជាដៃគូតែងតែអាក្រក់ដាក់បែបនេះ ឬជួនកាលបន្ទោសខ្លួនឯងបន្ថែមក៏មាន។  

៣. គិតថាខ្លួនឯងជាអ្នកខុស

ប្រសិនមានជម្លោះពាក្យសម្ដី ឬបញ្ហាដទៃៗទៀត គេមិនហារមាត់បន្ទោសដៃគូសូម្បីមួយម៉ាត់ឡើយ។ គេយល់ថា កំហុសគ្រប់យ៉ាងមកពីគេទាំងអស់ ទោះបីជាគេមិនខុសក៏ដោយ។ តែងតែគិតថា ខ្លួនអន់ អាក្រក់ ឬនាំរឿងជាដើម។

៤. ជឿថាគេអាចផ្លាស់ប្តូរ

មនុស្សជាច្រើនដែលទ្រាំជាមួយទំនាក់ទំនងប្រេះស្រាំយូរខែ រហូតក្លាយជាឆ្នាំបាន ដោយសារគេស្រឡាញ់ដៃគូខ្លាំងបំផុត ហើយជឿជាក់ថាគូស្នេហ៍នឹងយល់ពីទំហំក្ដីស្រឡាញ់នោះ រួចនឹងផ្លាស់ប្ដូរដើម្បីគ្នា។ ប៉ុន្តែការពិត ស្នេហាដើរដល់ចំណុចតឹងតែង ស្ទើរដាច់ម្ដងៗ ដោយសារចរិតអាក្រក់របស់ដៃគូហ្នឹងឯង  ហើយគេនឹងមិនប្ដូរអ្វីឡើយ ទោះម្ខាងទៀតលះបង់ប៉ុនណា។

៥. ខ្លាចអ្នកផ្សេងបដិសេធ

នេះជាមូលហេតុសំខាន់មួយទៀត គឺខ្លាចការបដិសេធរបស់អ្នកផ្សេង។ គិតថាអ្នកផ្សេងមិនអាចទទួលខ្លួនបាន ឬប្រកាន់រឿងអតីតជាដើម។ គេមិនទុកចិត្តខ្លួនឯងក្នុងការស្វែងរកអ្នកថ្មី ហើយពេលខ្លះខ្លាចអ្នកថ្មីកាន់តែអាក្រក់ជាងដៃគូខ្លួនទៀត ទើបសុខចិត្តបៀមគ្រោះបៀមថ្ម រស់នៅទាំងវេទនាចិត្ត ក៏មិនព្រមបែកគ្នា៕

ប្រែសម្រួល៖ សន្យា

ចុចអាន៖ ៦ ចំណុចអំពីប្ដីប្រពន្ធឬសង្សារ កុំពិភាក្សាជាមួយអ្នកដទៃដាច់ខាត

ចុចអាន៖ “អាពាហ៍​ពិពាហ៍” ជួយឲ្យ​​ជីវិត​សប្បាយ​រីករាយ​ ពិត​មែនអត់?