ម្ចាស់ឡានតូចៗ កុំចេះតែប្រថុយបើកលុយទឹក ប្រយ័ត្នមានបញ្ហាម៉ាស៊ីននៅពេលក្រោយ

ក្នុងរដូវវស្សា ភ្លៀងច្រើនតែបង្អុរធ្លាក់ខ្លាំង និងយូរម៉ោង ជាហេតុធ្វើឱ្យស្ថានភាពផ្លូវមួយចំនួនត្រូវលេច ក្នុងមួយរយៈពេលខ្លី ឬវែងទៅតាមទីតាំង និងតំបន់ដែលមានភ្លៀងនោះ ដោយធ្វើឱ្យពិបាកក្នុងការចរាចរណ៍ ហើយអ្វីដែលពិបាកបំផុតទៀតនោះគឺ បើសិនជាជម្រៅទឹក ជ្រៅផុតបំពង់ស៊ីមុាំងយានយន្ត។

យ៉ាងណាមិញ ម្ចាស់យានយន្តភាគច្រើន ក៏ប្រហែលជាបានដឹងពីតិចនិកខ្លះៗ នៃការបញ្ជាយានយន្តកាត់ទឹក ​បើកបរយ៉ាងណា មិនឱ្យទឹកចូលបំពង់ស៊ីមុាំងរថយន្ត ដោយបើកក្នុងល្បឿនយឺត ហើយថេរ និងមួយទៀត គឺបិទដំណើរការម៉ាស៊ីនត្រជាក់ ការពារការឆ្លងភ្លើង។ ទោះជាតិចនិកនេះ អាចជួយការពារមិនឱ្យស៊ីមុាំងរថយន្តចូលទឹក និងបញ្ចៀសបញ្ហាឆ្លងភ្លើងបានក៏ដោយ ប៉ុន្តែក៏មិនមានអ្នកជំនាញណា ហ៊ានធានាថា វាមានប្រសិទ្ធភាព ១០០% នោះដែរ។

ផ្អែកតាមបទពិសោធន៍ម្ចាស់រថយន្តធុនតូចមួយចំនួន បានអះអាងស្រដៀងគ្នាថា ទោះបីជាពូកែក្នុងការរក្សាល្បឿន បើកកាត់ទឹកយ៉ាងណាក៏ដោយ តែបញ្ហានឹកស្មានមិនដល់មួយចំនួនដូចជា ស្ថានភាពផ្លូវ ឬបញ្ហាបាតក្រោមឡាន ជាដើម អាចពិបាកបញ្ចៀស។

លោក ជា សុភ័ក្រ ម្នាក់ក្នុងចំណោមនោះ បាននិយាយថា “ពេលខ្លះ អាងថាខ្លួនឯងប្រសប់បើក ទោះទឹកជម្រៅណាក៏ចេះ​តែ​បើកចូល ចុងក្រោយខ្ញុំត្រូវជួបរឿងនឹងស្មានមិនដល់មួយទៀត គឺគ្រាន់តែបើកធ្លាក់គ្រហុកបន្តិច ធ្វើឱ្យល្បឿនឡានខ្ញុំប្រែប្រួល ហើយបាតខាងក្រោមឡាន ក៏មិនដឹងទៅទង្គិចនឹងស្អី ទីបំផុត ក៏ត្រូវរើម៉ាស៊ីនឡានតែម្តង”។

បើតាមលោក ផន មីដា បម្រើការនៅយានដ្ឋានមួយកន្លែង បានណែនាំដែរថា សុវត្តិភាពបំផុត គឺកុំបើកបរកាត់ទឹកជ្រៅ ហើយបើសិនជាទឹកលេចចូលបំពង់ស៊ីម៉ាំង ធ្វើឱ្យម៉ាស៊ីនគាំងលែងដំណើរការ ល្អបំផុត គឺប្រញាប់ស្វែងរកជំនួយពី ជាងឡាន ដើម្បីសណ្តោងយកទៅជួសជុលតែម្តង៕

អត្ថបទ៖ សុធា