ពីក្រោយការប្រមូលផ្ដុំកាបូបតម្លៃ ២.២លានដុល្លារ របស់នាយករដ្ឋមន្ត្រីថៃ

នាយករដ្ឋមន្ត្រីថៃ ផែតងតាន ស៊ីណាវ៉ាត្រា បានប្រកាសទ្រព្យសម្បត្តិសរុប ១៣.៨ ពាន់លានបាត (៤០០ លានដុល្លារអាមេរិក) រួមទាំងកាបូបចំនួន២១៧ ដែលមានតម្លៃ ៧៦ លានបាត (២.២ លានដុល្លារអាមេរិក) ពីយីហោម៉ាក់ល្បីៗដូចជា Hermès Chanel និង Dior អចលនទ្រព្យនៅទីក្រុងឡុងដ៍ និងប្រទេសជប៉ុន នាឡិកាចំនួន ៧៥ គ្រឿងមានតម្លៃ ១៦២លានបាត និងនាឡិកាចំនួន ៣៩ បន្ថែមទៀត ការវិនិយោគ ១១ពាន់លានបាត និងប្រាក់បញ្ញើ និងសាច់ប្រាក់មួយពាន់លានបាត។ នេះបើយោងតាមរបាយការណ៍ថ្ងៃទី ០៣ ខែមករា ដោយទីភ្នាក់ងារ​ AFP ។

លោកស្រី ផែតងតាន មាន​កាបូប​ម៉ាក Chanel ដែល​ត្រូវ​បាន​គេ​សរសើរ​ជា​ញឹក​ញាប់​ចំពោះ​ស្ទីលដ៏​ឆើតឆាយ និង​ទំនើប​របស់គាត់។ ការប្រមូលផ្ដុំរបស់លោកស្រីមានចាប់ពីម៉ូដែល ២.៥៥ ម៉ូដែលរហូតដល់កាបូបដៃ និងកាបូបស្ពាយ ហើយរួមបញ្ចូលការរចនាបែបទំនើប ការ​រចនា​តូច​ៗ​មាន​ពណ៌​ចាប់ពី​ស និង​ប្រផេះ​ទៅ​ខ្មៅ មាស ខៀវ និង​ផ្កាឈូក​ស្រាល។

នាយករដ្ឋមន្ត្រីថៃវ័យ៣៨ឆ្នាំរូបនេះ​ តែងតែកោតសរសើរទាំងកាបូបបុរាណ និងសម័យដែលខ្លួនគាត់មាន។ ការប្រមូលរបស់គាត់មានទាំំងកាបូបស្បែកគោ Alaia ដែលត្រូវបានបំផុសគំនិតដោយចរ និងលំនាំស្ថាបត្យកម្ម moucharabieh និងតុបតែងដោយគ្រឿងតុបតែងធ្វើពីប្រាក់ ដែលមានតម្លៃ ១ ៧៨០ ដុល្លារអាមេរិក។

ក្រៅពីម៉ាក Chanel លោកស្រីគឺជាអ្នកគាំទ្រយីហោ Hermès ដែលត្រូវគេស្គាល់ថា កាបូបរចនាដែលមានតម្លៃខ្ពស់ទោះមានលុយក៏ទិញពុំបាន។ នាយក​រដ្ឋមន្ត្រី​ថៃ​មាន​កាបូប Birkin និង Kelly ជាច្រើន​នៅ​ក្នុង​បណ្តុំ​របស់​គាត់ដែល​បញ្ជាក់​ពី​ស្ទីលស៊ីវល័យ ​ក្នុង​នាម​ជា​អ្នកជំនួញ​ជោគជ័យមួយរូប។ គាត់ក៏មានចំណូលចិត្តចំពោះម៉ាកយីហោយុវវ័យដូចជា Miu Miu ដោយបង្ហាញ​ស្ទីល​តាម​ដង​ផ្លូវ​ យួរកាបូប​ពណ៌​ត្នោត​ខ្ចី​ពី​ម៉ូដ​អ៊ីតាលីថែមទៀតផង៕

អត្ថបទ៖ សាង ស្រីល័ក្ខ

ចុចអាន៖កាសែតអាល្លឺម៉ង់ផ្សាយថា នាយករដ្ឋមន្ត្រីស្រីថៃ រស់ក្នុងជីវិតយ៉ាងប្រណិត ប្រើរបស់សុទ្ធតែថ្លៃៗ