គ្រឿងចក្រកាយដីភ្នំ​នៅស្រុកស្វាយចេក ​រត់គេចពីអ្នក​កាសែតសាកសួរ ក្រោយមានការ​រាយការណ៍ពីពលរដ្ឋក្នុងមូលដ្ឋាន

គ្រឿងចក្រជាច្រើនគ្រឿងបាន​ធ្វើសកម្មភាពកាយដីភ្នំបាក់កីលក់​ជាប្រយោជន៍បុគ្គល​​ក្នុង​មូលដ្ឋាន​ភូមិស្វាយស ឃុំផ្គាំ ស្រុកស្វាយចេក ខេត្តបន្ទាយមានជ័យ។ ខណៈដែលអ្នកសារព័ត៌មានចុះទៅយកព័ត៌មានដោយផ្ទាល់កាលពីនៅព្រឹកថ្ងៃទី ២១ ខែតុលា ២០២៥ នេះ ស្រាប់តែគ្រឿងចក្រដែលនៅទីនោះបានបើកគេចពីទីតាំងកាយដីជើងភ្នំដោយពុំដឹងមូលហេតុ បង្ក​​ឲ្យ​មានការសង្ស័យពីអ្នកសារព័ត៌មានថា ការកាយដីភ្នំនោះជាអំពើខុសច្បាប់។

សកម្មភាពដែលអ្នកសារព័ត៌មានចុះទៅឡាយខាងលើគឺបន្ទាប់ពីកាលពីម្សិលមិញថ្ងៃទី ២០ ខែតុលា ២០២៥ មានប្រជាពលរដ្ឋនៅមូលដ្ឋាននៃភូមិស្វាយសបានថតបង្ហោះ និងប្រាប់មកអ្នក​សារព័ត៌មានពីសកម្មភាពនៃគ្រឿងចក្រជាច្រើន បានធ្វើសកម្មភាពច្រើនខែមកហើយ ក្នុងការកាយយកអាចម៍ដីពីជើងភ្នំបាក់កីរហូតស្ទើរដល់កំពូល​ភ្នំដែលមានប្រាសាទមួយនៅខាងលើ​ផង​ដែរ។

តាមភាពជាក់ស្តែង និងការផ្តល់ព័ត៌មានពី​ពលរដ្ឋ ការកាយដីជើងភ្នំនេះគឺមានឡានបែនប្រភេទធំៗជាច្រើនគ្រឿងឈរ​ចាំដឹកពីការកាយដីពីអេស្កាប្រមាណ​ចំនួន​បីគ្រឿង លុះពេលអ្នកព័ត៌មានចុះយកព័ត៌មានជាក់ស្តែងស្រាប់តែបើករត់គេចពីការសួរនាំរបស់អ្នកសារព័ត៌មាន។

ពលរដ្ឋនិយាយថា ការកាយដីភ្នំបាក់កីនេះវាបានធ្វើ​ឲ្យ​ប៉ះពាល់បរិស្ថានយ៉ាងខ្លាំង ដោយខូចសោភ័ណភាពភ្នំដែលជាសម្បត្តិធម្មជាតិ នាំ​ឲ្យ​មានការបាក់ដី មានរណ្តៅបង្កគ្រោះថ្នាក់ដល់មនុស្សសត្វ។

បើតាមការ​ឲ្យ​ដឹងពីលោកផេង ប៉ោត មេឃុំផ្គាំបានអោយដឹងនៅព្រឹកថ្ងៃទី ២១នេះថា ចំពោះការកាយដីភ្នំនេះមានរយះពេលច្រើនខែមកហើយ។ ជាមួយគ្នានោះលោកបានទាក់ទង់សួរនាំរកឯកសារពីខាងក្រុមកាយដីដែរ តៃគេប្រាប់មកថាគេមានឯកសារអស់ហើយតែមិនបាន​ឲ្យ​លោកដឹងឡើយ។

ក្រោយមកលោកបានរាយការណ៍ទៅអភិបាលស្រុក ហើយខាងស្រុកថាចាំចុះមកពិនិត្យរហូតដល់ពេលនេះមិនទាន់ឃើញ​ចុះមកទេ។

លោកបានបន្តថា តាមការពិនិត្យជាក់ស្តែងមានក្រុមហ៊ុនបីបានធ្វើសកម្មភាពកាយដីដោយគេថាកាយយកធ្វើផ្លូវជាតិ​លេខ ៥ តែក៍មានការលក់ក្រៅខ្លាំងដែរដែលធ្វើអោយប្រជាពលរដ្ឋក្នុងមូលដ្ឋានមិនពេញចិត្ត ព្រោះសកម្មភាពកាយដីនេះមិនបានប្រយោជន៍ឬក៍អភិវឌ្ឍន៍អ្វីដល់ភូមិឃុំទេ។

ជុំវិញការកាយដីនេះ អ្នក​សារព័ត៌មានមិនអាចសុំការបំភ្លឺពីលោក លឿម សុភ័ក្រ អភិបាលស្រុកស្វាយ​ចេកបានទេតាមរយះប្រព័ន្ធតេឡេក្រាមដោយលោកចូលមើលហើយមិនឆ្លើយតប៕

អត្ថបទ៖ អពៅ