ព័ត៌មានជាតិ

រដ្ឋបាលខណ្ឌចំការមន បើកការដ្ឋានស្ថាបនាប្រព័ន្ធលូ និងផ្លូវបេតុង ០១ ខ្សែ ប្រវែងជាង ៣០០ ម៉ែត្រ នៅសង្កាត់ទន្លេបាសាក់

បានផុស

៧ ខែ មុន

នៅ

ថ្ងៃពុធ ១២ វិច្ឆិកា ២០២៥

ដោយ

ប្រជាពលរដ្ឋរស់នៅក្នុងភូមិ ១១ និង ១២ សង្កាត់ទន្លេបាសាក់ ទទួលបានការផ្លាស់ប្ដូរលូថ្មី និង ផ្លូវបេតុងថ្មី ០១ ខ្សែ ប្រវែង ៣១៤ ម៉ែត្រ បន្ទាប់ពីជួបការលំបាកកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីព្រឹកថ្ងៃទី ១២ ខែវិច្ឆិកា ឆ្នាំ ២០២៥ នេះ រដ្ឋបាលខណ្ឌចំការមន បានរៀបចំពិធីបើកការដ្ឋានអនុវត្តគម្រោង ដោយប្រើប្រាស់ថវិកាមូលនិធិអភិវឌ្ឍន៍សង្កាត់ ឆ្នាំ ២០២៥ ក្រោមវត្តមានលោក កៀង ល័ក្ស អភិបាល នៃគណៈអភិបាលខណ្ឌចំការមន និងលោក ខាត់ ណារិទ្ធ ចៅសង្កាត់ទន្លេបាសាក់ ព្រមទាំងមានការចូលរួមពីនាយករដ្ឋបាល ចៅសង្កាត់ និងប្រជាពលរដ្ឋជាច្រើននាក់ផងដែរ។

កញ្ញា ស៊ីង ជាប្រជាពលរដ្ឋរស់នៅតំបន់ខាងលើ បានសម្តែងការសាទរទៅកាន់អាជ្ញាធរ បន្ទាប់ពីទទួលបាននូវផ្លូវបេតុងថ្មី និងប្រព័ន្ធលូរំដោះថ្មី មានទំហំធំជាងមុន។

កញ្ញា បានអរគុណអាជ្ញាធរចំពោះការយកចិត្តទុកដាក់មកកាន់ពលរដ្ឋរស់នៅមូលដ្ឋានខណ្ឌចំការមន ដែលការផ្លាស់ប្ដូរប្រព័ន្ធលូ និងស្ថាបនាផ្លូវបេតុងនេះឡើងវិញ គឺបានជួយសម្រួលបន្ទុកជាច្រើន លែងមានក្លិនស្អុយចេញពីទឹកដក់លើផ្លូវ ធ្វើឲ្យប្រព័ន្ធលំហូរទឹកដំណើរការលឿនជាងមុន។ ជាពិសេសបានផ្លូវបេតុង ០១ ខ្សែថ្មីឡើងវិញ ស្រួលធ្វើដំណើរចេញចូលផ្ទះ និងទៅប្រកបការងារផងដែរ។

លោក កៀង ល័ក្ស បានឲ្យដឹងថា ផ្លូវនេះមានប្រវែងប្រមាណ ៣១៤ ម៉ែត្រ ដោយបានស្ថាបនាចាប់តាំងពីឆ្នាំ ២០០៥ គិតមកដល់ពេលនេះ ២០ ឆ្នាំ មកហើយ។ ក្រោយពីដំណើរការដាក់ប្រព័ន្ធលូ និងចាក់ផ្លូវបេតុងហើយរួចរាល់ លែងព្រួយបារម្ភពីបញ្ហាលិចលង់ដោយជំនន់ទឹកភ្លៀង ឬទឹកភ្លៀងហូរលិចដក់លើផ្លូវ ឬលំនៅឋានពលរដ្ឋរស់នៅស្របសងខាងផ្លូវទៀតហើយ ។

លោកអភិបាលខណ្ឌ បន្តថា គម្រោងនេះ ជាកញ្ចប់ថវិកាសម្រាប់អភិវឌ្ឍន៍ភូមិ-ឃុំ-សង្កាត់ ឆ្នាំ ២០២៥ ដែលទទួលបានពីការដេញថ្លៃរបស់ក្រុមហ៊ុនឯកជន សម្រាប់ផ្លាស់ប្ដូរ និងជួសជុលជូនពលរដ្ឋក្នុងមូលដ្ឋាន ដើម្បីសម្រួលដល់ការរស់នៅ និងធ្វើដំណើរ។

លោកអភិបាលខណ្ឌ បញ្ជាក់ថា ប្រជាពលរដ្ឋ ក៏ត្រូវចូលរួមតាមដានការអនុវត្តការងាររបស់ក្រុមហ៊ុនទទួលការផងដែរ ពីព្រោះពួកគាត់គឺជាអ្នកទទួលផលផ្ទាល់ពីគម្រោងនេះ។ បើឃើញការអនុវត្តរបស់ក្រុមហ៊ុនខុសពីកិច្ចសន្យា ត្រូវរាយការណ៍ជូនអាជ្ញាធរពាក់ព័ន្ធ ដើម្បីចុះពិនិត្យ និងកែសម្រួលជាបន្ទាន់។ បន្ថែមនោះ លោកក៏បានធ្វើការណែនាំទៅដល់អ្នកម៉ៅការទទួលស្ថាបនាដាក់ប្រព័ន្ធលូ ត្រូវពន្លឿនការងារឲ្យរួចរាល់តាមគម្រោង និងត្រឹមត្រូវតាមលក្ខណៈបច្ចេកទេស ដើម្បីធានាគុណភាពផងដែរ៕

អត្ថបទ ៖ រដ្ឋា

Related Topics:ខណ្ឌចំការមន ផ្លូវបេតុង ប្រព័ន្ធលូ

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា