ឃាត់ខ្លួនជនបរទេស ០៨នាក់ ពាក់ព័ន្ធករណីល្បែងភ្នាល់តាមប្រព័ន្ធអនឡាញ និងមិនមានលិខិតឆ្លងដែននៅអគារ The Peak

គណៈបញ្ជាការឯកភាពខណ្ឌចំការមន ចុះរដ្ឋបាលត្រួតពិនិត្យអគារ ក្នុងមូលដ្ឋាន រកឃើញជនបរទេស ០៨នាក់ ពាក់ព័ន្ធល្បែងភ្នាល់អនឡាញ និងគ្មានលិខិតឆ្លងដែន។ ជាក់ស្តែងកាលពីរសៀលថ្ងៃទី០៤ ខែមិថុនា ឆ្នាំ២០២៦ លោក កៀង ល័ក្ស អភិបាលខណ្ឌចំការមន បានដឹកនាំកម្លាំងគណៈបញ្ជាការឯកភាពខណ្ឌ ចុះត្រួតពិនិត្យរដ្ឋបាល ស្ថិតនៅក្នុងទីតាំងអគារ The Peak Tower 1 & 2 វិថីសម្តេចហ៊ុនសែន ភូមិ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

ជាលទ្ធផល អាជ្ញាធរត្រួតពិនិត្យតាមបន្ទប់ស្នាក់នៅគ្រប់ជាន់ រកឃើញមានជនបរទេសស្នាក់នៅសរុបចំនួន ៤៨៩នាក់ ស្រី៣០៩ នាក់ មាន ១៨សញ្ជាតិ។ ក្នុងនោះរកឃើញបទល្មើសចំនួន ០៣បន្ទប់ ឃាត់ខ្លួនមនុស្សចំនួន ០៨នាក់ ស្រី ០១នាក់ មានលិខិតឆ្លងដែន ០៥នាក់ និងមិនមានលិខិតឆ្លងដែន ០៣នាក់ ។ ដោយដកហូតសម្ភារៈរួមមាន កុំព្យូទ័រយួរដៃចំនួន ០២គ្រឿង, ស៊ីភីយូចំនួន ០៨គ្រឿង , ម៉ូនីទ័រចំនួន ១៥គ្រឿង, កុំព្យូទ័រ All in One  ចំនួន ០៩គ្រឿង , ទូរស័ព្ទចំនួន ៤៤គ្រឿង ។

អាជ្ញាធរបានបញ្ជាក់ថា ដោយការិយាល័យប្រឆាំងបទល្មើសបច្ចេកវិទ្យា នៃស្នងការនគរបាលរាជធានីភ្នំពេញ ធ្វើការត្រួតពិនិត្យយ៉ាងជាក់ច្បាស់ថា សម្ភារៈខាងលើបានរកឃើញ ពិតជាជាប់ពាក់ព័ន្ធ ករណីល្បែងភ្នាល់តាមប្រព័ន្ធអនឡាញខុសច្បាប់ ។

ក្រោយបញ្ចប់ អាជ្ញាធរខណ្ឌចំការមន បានប្រគល់ជនបរទេសទាំងនោះ បញ្ជូនទៅកាន់ស្នងការដ្ឋាននគរបាលរាជធានីភ្នំពេញ ៕ អត្ថបទ ៖ រដ្ឋា