ផាកពិន័យម្ចាស់ទីតាំង ១ កន្លែង ក្រោយត្រួតពិនិត្យជនបរទេស ៨៨ នាក់ រកឃើញស្នាក់នៅខុសច្បាប់ ២ នាក់ នៅសង្កាត់ទន្លេបាសាក់

គណៈបញ្ជាការឯកភាពខណ្ឌចំការមន ធ្វើរដ្ឋបាលឆែកឆេរត្រួតពិនិត្យតាមទីតាំងអគារចំនួន ៣ ផ្សេងគ្នា ដោយរកឃើញជនបរទេសស្នាក់នៅស្របច្បាប់ ៨៦ នាក់ (ស្រី ៤៣ នាក់) និង ខុសច្បាប់ ២ នាក់។

ការចុះរដ្ឋបាលនេះបានធ្វើឡើងកាលពីថ្ងៃទី ៣ ខែមិថុនា ឆ្នាំ ២០២៦​ នៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។

លោក កៀង លក្ស័ អភិបាលខណ្ឌចំការមន បានឲ្យដឹងថា លោកដឹកនាំ​គណៈបញ្ជាការឯកភាពរដ្ឋបាលខណ្ឌចំការមន ដោយបានការសម្របសម្រួលផ្លូវច្បាប់ពីលោកស្រី ភី ស៊ីថង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចុះត្រួតពិនិត្យរដ្ឋបាលលើទីតាំងចំនួន ៣ ដោយមាននៅតាមផ្លូវសុធារស ភូមិ ១ , ផ្លូវសុធារស ភូមិ ៥ , ផ្លូវរដ្ឋសភា ភូមិ ១៤ ក្នុងមូលដ្ឋានសង្កាត់ទន្លេបាសាក់ ខណ្ឌចំការមន។

បន្ទាប់ពីត្រួតពិនិត្យចប់សព្វគ្រប់ ជាលទ្ធផល ទីតាំងទាំង ៣ ខាងលើ មានអ្នកស្នាក់នៅសរុបចំនួន ៨៨ នាក់ (ស្រី ៤៣ នាក់) ដោយក្នុងនោះ ស្របច្បាប់ ៨៦ នាក់ និង ខុសច្បាប់ ២ នាក់ ប៉ុន្តែពុំមានរកឃើញសម្ភារៈពាក់ព័ន្ធសង្ស័យបម្រើការឲ្យបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ឫ សម្ភារបម្រើឲ្យការលេងល្បែងស៊ីសង នោះទេ។ ក្នុងនោះ អាជ្ញាធរ ក៏បានផាកពិន័យជាទឹកប្រាក់លើម្ចាស់ទីតាំងទៅតាមច្បាប់ចែងផងដែរ៕
អត្ថបទ ៖ រដ្ឋា