ទំនប់ស្ទាក់ទឹកសាលាតាអន ពេលល្ងាចៗ​ក្លាយជា​កន្លែង​លំហែកម្សាន្តពលរដ្ឋ ​នៅ​មិនឆ្ងាយពីក្រុង​បាត់ដំបង

ក្រៅពីការនេសាទត្រីរបស់ប្រជាពលរដ្ឋដែលមកពីទីជិតទីឆ្ងាយ នៅទំនប់ស្ទាក់ទឹកសាលាតាអនបានក្លាយទៅជាកន្លែង​កម្សាន្ត​របស់ប្រជាពលរដ្ឋ និងក្រុមយុវវ័យនាពេលសាយណ្ហ។

ទំនប់ស្ទាក់ទឹកសាលាតាអន គឺជាទ្វារទឹកដ៏ធំមួយ បន្ទាប់ពីទ្វារទឹកនៅទំនប់កង្ហត សម្រាប់ទប់ស្ទឹងសង្កែនៅក្នុងស្រុកបាណន់។ ដោយឡែកទំនប់ស្ទាក់ទឹកសាលាតាអន ក៏អាចទប់ទឹកស្ទឹងសង្កែបាន ហើយស្ថិតនៅភូមិសួសអី ឃុំពាមឯង ស្រុកឯកភ្នំ ខេត្តបាត់ដំបង។

នៅក្នុងតំបន់ខាងលើនេះ គេសង្កេតឃើញទូកប្រជានេសាទ បណ្ដែតខ្លួននៅលើផ្ទៃជលសារ ដើម្បីធ្វើការនេសាទត្រី ដោយ​អ្នកខ្លះក៏បានប្រើសំណាញ់ ឯអ្នកខ្លះទៀតក៏បានប្រើសន្ទូច ដើម្បីស្ទូចយកត្រីឆ្លាំងដែលនៅសម្ងំឯបាតស្ទឹង ដោយមុខរបរនេះពួកគាត់ក៏អាចរកចំណូលដើម្បីទ្រទ្រង់ក្នុងជីវភាពគ្រួសារផងដែរ ព្រោះការនេសាទរបស់ពួកគាត់គឺបានត្រីភ្លាមបញ្ជូនមកលក់នៅក្បែរទំនប់ស្ទាក់ទឹកនេះតែម្ដង។

នៅពេលរសៀលជ្រៀលជ្រេ ក៏មានមនុស្សម្នាក្មេងចាស់ប្រុសស្រី នាំគ្នាមកកម្សាន្ត​នៅក្នុងតំបន់នេះ ដោយគយគន់ទេសភាពនៅតាមដងស្ទឹង និងខ្លះទៀតក៏មកអង្គុយបរិភោគចំណីអាហារដែលប្រជាពលរដ្ឋនៅទីនោះយកមកដាក់លក់ជាហូរហែ។ មិនត្រឹមតែប៉ុណ្ណឹងទេប្រជាពលរដ្ឋដែលឆ្លងកាត់ឬមកកម្សាន្តទីនោះ ក៏បាននាំគ្នាទិញត្រីស្រស់ៗដែលទើបយកឡើងពីទូក ដើម្បីយកទៅកែច្នៃធ្វើជាម្ហូបអាហារផងដែរ។

បុរសម្នាក់ដែលនៅដៃកំពុងកាន់ដងសន្ទូចបាននិយាយថា នៅចំណុចទំនប់ស្ទាក់ទឹកសាលាតាអននេះ បើទោះបីជាការនេសាទពុំសូវមានត្រីក៏ដោយ ក៏មនុស្សម្នានៅតែមានមកលេងរាល់ល្ងាចជាប្រចាំ គឺទំនងជាពួកគាត់មកស្រូបយកខ្យល់អាកាសនិងគយគន់មើលទេសភាពតាមដងស្ទឹងសង្កែ នាពេលសាយណ្ហ​ហើយមើលទៅ។

បុរស​រូប​នេះ​បានបន្តថា ការស្ទូចត្រីរបស់គាត់គឺពុំមែនសម្រាប់យកទៅលក់នោះទេ គឺស្ទូចលេងកំដរអផ្សុក បើបានក៏​យកទៅធ្វើម្ហូបប្រចាំថ្ងៃតែប៉ុណ្ណោះ ព្រោះនៅក្នុងធុងរបស់គាត់ឃើញមានត្រីឆ្លាំងចំនួន ៤ ក្បាល ដូច្នេះគាត់អាចរួចថ្លៃទិញម្ហូបអាហារមួយពេលទៅហើយ។

សម្រាប់ភ្ញៀវទេសចរដែលបានធ្វើដំណើរឆ្លងកាត់ ឬបានមកសម្រាកកាយនៅក្នុងក្រុងបាត់ដំបង អាចឆៀងទៅលេងបាន ព្រោះបើធ្វើដំណើរតាមផ្លូវរ៉បដងស្ទឹងសង្កែប៉ែកខាងលិច គឺត្រូវទៅឆ្លងស្ពានដូនទាវ ( អតីតរោងចក្រក្រចៅ ) ហើយបង្ហួស ផុតបឹងក្រចៅ បត់ស្ដាំតាមផ្លូវបេតុងនោះនឹងទៅដល់ទំនប់ស្ទាក់ទឹកសាលាតាអនហើយ ដែលមានចម្ងាយប្រមាណ ជាង ១០ គីឡូម៉ែត្រពីក្រុងបាត់ដំបង ដើម្បីគយគន់ទេសភាពនិងស្រូបយកខ្យល់អាកាសនៅទីនោះ៕

អត្ថបទ : សោ និយមរ័ត្ន