កសិករ​អះអាងថា ក្រោយ​បាន​មន្រ្តីកសិកម្ម​ឃុំ​ណែនាំ​បច្ចេកទេស ការធ្វើ​ស្រែ​កាត់​បន្ថយ​ចំណាយ ទាំង​ពូជ ជី ថ្នាំ ទិន្នផល​ក៏​កើន​ជាង​មុន

ប្រជាកសិករ រស់នៅភូមិសំរិទ្ធ ឃុំគោលាប់ ស្រុកចិត្របុរី ខេត្តក្រចេះ គាំទ្រនិងពេញចិត្តចំពោះគោលនយោបាយរបស់រាជរដ្ឋាភិបាល ដែលបង្កើតឲ្យមានមន្ត្រីកសិកម្មឃុំនេះឡើង ដែល​បានជួយដល់កសិករទាំងបច្ចេកទេស ការប្រឹក្សាយោបល់ និងការចំណាយថវិកា។

អ្នកស្រី ប្រាក់ ស៊ាម រស់នៅភូមិសំរិទ្ធ ឃុំគោលាប់ ស្រុកចិត្របុរី ខេត្តក្រចេះ បានឲ្យដឹងថា ចាប់តាំងពីមានមន្ត្រីកសិកម្ម​ឃុំមក ក្រុមការងារតែងតែចុះជួបប្រជាកសិករ និងបានជួយណែនាំអំពីបច្ចេកទេស និងផ្ដល់ប្រឹក្សាយោបល់ល្អៗ ដល់កសិករ ឲ្យងាកមកធ្វើស្រូវផ្ការំដួល ស្រូវក្រអូប ០១ និងស្រូវចំប៉ីសរ ជំនួសពូវស្រូវ ប្រភេទ OM ៥៤៥១វិញ។

កសិកររួបនេះ​ថា ការធ្វើស្រែតាមទម្លាប់ តាមបែបធម្មជាតិ និងតាមការណែនាំ របស់មន្ត្រីកសិកម្ម គឺមានភាពខុសគ្នាស្រឡះ​។ ម៉េចបាននិយាយថា ខុសគ្នាស្រឡះ មកពីកាលធ្វើស្រែតាមបែបធម្មជាតិ ការចំណាយអស់ច្រើន ទាំងពូជស្រូវ ថ្នាំ និងការប្រើប្រាស់ជីជាដើម។ ប៉ុន្តែឥឡូវនេះ ក្រោយងាកមកធ្វើតាមការណែនាំរបស់មន្ត្រីកសិកម្មឃុំវិញ ការចំណាយត្រូវបានកាត់បន្ថយច្រើនទាំងពូជស្រូវ ថ្នាំ និងជី រីឯទិន្នផលមានការកើនឡើងជាងមុន។

អ្នកស្រីបានបញ្ជាក់ថា នាពេលកន្លងមកប្រជាពលរដ្ឋនៅក្នុងឃុំគោលាប់ភាគច្រើន បាននឹងកំពុងធ្វើនិងប្រមូលផលស្រូវ ប្រភេទ OM ៥៤៥១ ដោយសារពូជស្រូវប្រភេទនេះ ឆាប់បានប្រមូលផល ងាយលក់ និងមានឈ្មួញចាំទិញ។ ប៉ុន្តែឥឡូវនេះ កសិករនៅ ឃុំគោលាប់ ងាកមកធ្វើស្រូវពូជខ្មែរវិញ ដូចជា ផ្ការំដួល សែនក្រអូប០១ និងចំប៉ីស៧០ ជាដើម ដែលជាស្រូវពូជយុទ្ធសាស្ត្រជាតិ។

តាមការណែនាំរបស់មន្ត្រីជំនាញរបស់ក្រសួងកសិកម្ម ក៏ដូចជា មន្ទីរកសិកម្មខេត្ត ដែលបានចុះមកណែនាំឱ្យកសិករ​ងាក​មក​ធ្វើស្រូវពូជខ្មែរវិញ គឺពួកគាត់សប្បាយចិត្តណាស់៕

អត្ថបទ៖ ប្រុញ វិធិន