ព័ត៌មានជាតិ

ក្រសួងសាធារណការ និងក្រសួងការងារ ប្រកាសដាក់អនុវត្តសាកល្បងលើការកែលម្អរថយន្តដឹកជញ្ជូនកម្មករ-និយោជិត ឲ្យកាន់តែមានផាសុកភាពសុវត្ថិភាព

បានផុស

៦ ខែ មុន

នៅ

ថ្ងៃព្រហស្បតិ៍ ១១ ធ្នូ ២០២៥

ដោយ

ក្រសួងសាធារណការ និង ក្រសួងការងារ បានប្រកាសដាក់អនុវត្តសាកល្បងលើការកែលម្អរថយន្តដឹកជញ្ជូនកម្មករ-និយោជិត ឲ្យកាន់តែមានផាសុកភាព និងសុវត្ថិភាព ព្រមទាំងការត្រួតពិនិត្យលក្ខណៈបច្ចេកទេសរថយន្តដឹកជញ្ជូនកម្មករ-និយោជិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសនេះ ក្រោមអធិបតីភាពលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងលោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ នៅបរិវេណតំបន់សេដ្ឋកិច្ចពិសេសមេនហាតធេន ក្រុងបាវិត ខេត្តស្វាយរៀង កាលពីព្រឹកថ្ងៃទី ១០ ខែធ្នូ ឆ្នាំ ២០២៥ ម្សិលមិញ។

នាឱកាសនោះ លោក ប៉េង ពោធិ៍នា បានគូសបញ្ជាក់ពីកិច្ចខិតខំប្រឹងប្រែងរបស់ក្រសួងក្នុងការដាក់ចេញនូវយន្តការ និងវិធានការនានា ដើម្បីលើកកម្ពស់លក្ខខណ្ឌការងារ និងជីវភាពរបស់កម្មករ-និយោជិត តាមរយៈការអនុវត្ត ៖ ១.ការរៀបចំកៅអីអង្គុយ និងការកែលម្អរថយន្ត(ធានាថារថយន្តដឹកជញ្ជូនកម្មករ-និយោជិត ត្រូវបានកែច្នៃស្របតាមស្តង់ដារបច្ចេកទេស ដែលមានកៅអីអង្គុយត្រឹមត្រូវ និងខ្យល់ចេញចូលគ្រប់គ្រាន់ ដើម្បីបង្កើនផាសុកភាព)។ ២.ការអនុវត្តនីតិវិធី នៃការត្រួតពិនិត្យ(ជំរុញឲ្យម្ចាស់រថយន្តទាំងអស់ ត្រូវនាំយករថយន្តរបស់ខ្លួនទៅត្រួតពិនិត្យលក្ខណៈបច្ចេកទេសឲ្យបានទៀងទាត់ តាមគោលការណ៍កំណត់របស់ក្រសួងសាធារណការ និងដឹកជញ្ជូន)។ ៣.ការបណ្ដុះបណ្ដាលអ្នកបើកបរ(បង្កើនការបណ្ដុះបណ្ដាលដល់អ្នកបើកបររថយន្តដឹកជញ្ជូនកម្មករ-និយោជិត អំពីច្បាប់ចរាចរណ៍ ក្រមសីលធម៌ និងបច្ចេកទេសសុវត្ថិភាព ក្នុងការបើកបរ)។

ជាមួយគ្នានេះ លោក ហេង សួរ លើកឡើងថា គោលបំណង និងសារៈសំខាន់ នៃពិធីប្រកាសដាក់ឲ្យអនុវត្តសាកល្បងនេះ ឆ្លើយតបទៅនឹងការយកចិត្តទុកដាក់ខ្ពស់របស់ រាជរដ្ឋាភិបាលកម្ពុជា នីតិកាលទី ៧ និងក្រសួងការងារ ក្នុងការលើកកម្ពស់ សុខុមាលភាព និង សុវត្ថិភាព របស់កម្មករ-និយោជិត ក្នុងពេលធ្វើដំណើរទៅមកបំពេញការងារ។

លោក ហេង សួរ បន្តថា ផាសុកភាព និង សុវត្ថិភាព គឺជាអាទិភាពចម្បងសម្រាប់កម្មករ-និយោជិត ដែលជាកម្លាំងចលករដ៏សំខាន់ក្នុងការជំរុញកំណើនសេដ្ឋកិច្ចជាតិ។ គម្រោងសាកល្បងនេះ នឹងផ្តល់បទពិសោធថ្មី នៃការធ្វើដំណើរប្រកបដោយផាសុកភាព និងកាត់បន្ថយហានិភ័យ នៃគ្រោះថ្នាក់ចរាចរណ៍។ ការត្រួតពិនិត្យលក្ខណៈបច្ចេកទេស ៖ ការដាក់ឲ្យអនុវត្តការត្រួតពិនិត្យបច្ចេកទេសរថយន្តដឹកជញ្ជូនកម្មករ-និយោជិត គឺជាវិធានការចាំបាច់ ដើម្បីធានាថា រថយន្តទាំងអស់ស្ថិតក្នុងស្ថានភាពល្អ និងមានសុវត្ថិភាពក្នុងការប្រើប្រាស់ ស្របតាមបទប្បញ្ញត្តិស្ដីពីការដឹកជញ្ជូនកម្មករ-និយោជិត។

លោកបានបន្តទៀតថា ចំពោះកម្មវិធីសាកល្បងនេះ នឹងក្លាយជាគំរូដ៏ល្អមួយសម្រាប់ពង្រីកវិសាលភាពអនុវត្តទៅកាន់តំបន់ផ្សេងៗ ទៀត ទូទាំងប្រទេស។ ក្រសួងការងារ និងបណ្ដុះបណ្ដាលវិជ្ជាជីវៈ និងក្រសួងសាធារណការ បានប្ដេជ្ញាចិត្តខ្ពស់ក្នុងការបន្តសហការយ៉ាងជិតស្និទ្ធជាមួយក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ និយោជក និងតំណាងកម្មករ-និយោជិត ដើម្បីធានានិរន្តរភាព និងប្រសិទ្ធភាព នៃការអនុវត្តវិធានការទាំងនេះ ឆ្ពោះទៅរកការលើកកម្ពស់កិត្តិយស និងកិត្យានុភាពរបស់កម្មករ-និយោជិតកម្ពុជា។

គួរជម្រាបថា ពិធីខាងលើនេះក៏មានការចូលរួមពី លោក ប៉េង ពោធិ៍សា អភិបាលខេត្ត និងវត្តមានចូលរួមពីថ្នាក់ដឹកនាំ មន្ត្រីរាជការ នៃក្រសួង-ស្ថាប័នពាក់ព័ន្ធ មន្ទីរជំនាញជុំវិញខេត្ត អាជ្ញាធរដែនដី តំណាងរោងចក្រ សហគ្រាស និងតំណាងភាគីពាក់ព័ន្ធជាច្រើនរូបទៀតផងដែរ។

សូមបញ្ជាក់ថា តំបន់សេដ្ឋកិច្ចពិសេសមេនហាតធេន មានការផ្តល់ជូននូវរថយន្តដឹកកម្មករថ្មីមានផាសុកភាពដល់កម្មករក្នុងតំបន់ រួមជាមួយនឹងលក្ខខណ្ឌបង់រំលោះដែលមានភាពទាក់ទាញបំផុត។ តំបន់សេដ្ឋកិច្ចពិសេសមេនហាតធេន នឹងចាប់បើកការសាងសង់ផ្ទះដែលមានតម្លៃសមរម្យសម្រាប់កម្មករ ដោយមានការផ្តល់ជូននូវការបង់រំលោះជាមួយការប្រាក់ទាប។ ក្នុងនោះ មានការរួមបញ្ចូលទាំងសាលារៀនអន្តរជាតិ មន្ទីរពេទ្យ និងហេដ្ឋារចនាសម្ព័ន្ធជុំវិញគាំទ្រដល់ការរស់នៅដោយផាសុកភាព៕

អត្ថបទ ៖ ភក្ដី