មន្ត្រីជាន់ខ្ពស់ក្រសួងមហាផ្ទៃជំរុញឱ្យអគ្គនាយកដ្ឋានធនធានមនុស្សបន្តពង្រឹងការគ្រប់គ្រង និងអភិវឌ្ឍន៍មន្ត្រី

រដ្ឋលេខាធិការក្រសួងមហាផ្ទៃ លោក ចាន់ អ៊ាន ជំរុញដល់អគ្គនាយកដ្ឋានធនធានមនុស្ស ត្រូវបន្តពង្រឹងការងារគ្រប់គ្រង និងអភិវឌ្ឍន៍ធនធានមនុស្សរបស់ក្រសួងមហាផ្ទៃឱ្យកាន់តែមានប្រសិទ្ធិភាព។ ការជំរុញនេះ ធ្វើឡើងក្នុងពិធីបិទសន្និបាតការងារប្រចាំឆ្នាំ របស់អគ្គនាយកដ្ឋានធនធានមនុស្ស នារសៀលថ្ងៃទី២៦ ខែមករា ឆ្នាំ២០២៦នេះ។

សន្និបាតបូកសរុបត្រួតពិនិត្យលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់អគ្គនាយកដ្ឋានធនធានមនុស្ស នៃក្រសួងមហាផ្ទៃ បានប្រព្រឹត្តទៅមួយព្រឹកពេញថ្ងៃចន្ទនេះ នៅទីស្តីការក្រសួងមហាផ្ទៃ ដោយពិធីបើកក្រោមវត្តមានលោកនាយឧត្តមសេនីយ៍ សាស្រ្តាចារ្យ សេង ផល្លី អគ្គនាយកនៃអគ្គនាយកដ្ឋានធនធានមនុស្ស និងពិធីបិទក្រោមអធិបតីលោក ចាន់ អ៊ាន រដ្ឋលេខាធិការក្រសួងមហាផ្ទៃ។ សន្និបាតនេះក៏មានការអញ្ជើញចូលរួមពីតំណាងអគ្គស្នងការដ្ឋាននគរបាលជាតិ អគ្គនាយកដ្ឋាន និងអង្គភាពថ្នាក់ប្រហាក់ប្រហែល តំណាងរដ្ឋបាលរាជធានីខេត្ត តំណាងស្នងការដ្ឋាននគរបាលរាជធានីខេត្ត ថ្នាក់ដឹកនាំ និងមន្រ្តីនៃអគ្គនាយកដ្ឋានធនធានមនុស្ស។

ថ្លែងក្នុងពិធីបិទសន្និបាតនោះ លោក ចាន់ អ៊ាន បានថ្លែងនូវការកោតសរសើរ និងវាយតម្លៃខ្ពស់ចំពោះលទ្ធផលការងារសម្រេចបានក្នុងឆ្នាំ២០២៥ របស់អគ្គនាយកដ្ឋានធនធានមនុស្ស ព្រមទាំងទទួលស្គាល់នូវកិច្ចខិតខំប្រឹងប្រែង និងពុះពារក្នុងការអនុវត្តភារកិច្ចសំខាន់ៗ ក្រោមការដឹកនាំរបស់នាយឧត្តមសេនីយ៍ សាស្ត្រាចារ្យ សេង ផល្លី។ លោករដ្ឋលេខាធិការ ចាន់ អ៊ាន ក៏បានគូសរំលេចពីកិច្ចសហការល្អពីអង្គភាពពាក់ព័ន្ធចំណុះក្រសួងមហាផ្ទៃ និងរដ្ឋបាលរាជធានី ខេត្ត ដែលបានធ្វើការយ៉ាងជិតស្និទ្ធិជាមួយនឹងអគ្គនាយកដ្ឋានធនធានមនុស្ស ដែលទាំងនេះ លោក ថា ពិតជាមានការប្រែប្រួលជាសារវន្តទៅលើការងារកំណែទម្រង់ធនធានមនុស្សរបស់ក្រសួងមហាផ្ទៃ។

លោករដ្ឋលេខាធិការ បានលើកឡើងថា អគ្គនាយកដ្ឋានធនធានមនុស្ស បានចូលរួមពង្រឹងនូវវិន័យរបស់មន្ត្រីរាជការមានភាពប្រសើរ និងបំពេញការងារមានប្រសិទ្ធភាព ប្រកបដោយស្មារតីទទួលខុសត្រូវខ្ពស់ ខណៈការជ្រើសរើសក្របខ័ណ្ឌមន្ត្រីរាជការ ស្របតាមគោលការណ៍គុណ គោលការណ៍គុណាធិបតេយ្យ តម្លាភាព យុត្តិធម៌ បរិយាបន្ននិងប្រសិទ្ធភាព ដែលមានចំណេះដឹង ជំនាញ បទពិសោធ គុណវុឌ្ឍជាក់លាក់និងលក្ខណសម្បត្តិរបស់បេក្ខជនស្របតាមតម្រូវការការងាររបស់អង្គភាពនីមួយៗ។

សម្រាប់ការតែងតាំងមុខតំណែង ការដំឡើងឋានន្តរស័ក្តិ ការផ្ទេរភារកិច្ចមន្ត្រី ការខ្ចីមន្ត្រី ការផ្ទេរមន្ត្រីពីក្របខ័ណ្ឌមួយទៅក្របខ័ណ្ឌមួយទៀត លោក ថា ក៏ត្រូវបានអនុវត្តយ៉ាងម៉ឺងម៉ាត់តាមគោលការណ៍ណែនាំ និងបទប្បញ្ញត្តិកំណត់ ហើយការអនុវត្តទណ្ឌកម្មខាងវិន័យ ត្រូវបានអនុវត្តតាមគោលការណ៍ និងបទប្បញ្ញត្តិកំណត់ ព្រមទាំងផ្អែកលើអង្គហេតុដែលសាមីខ្លួនបានប្រព្រឹត្តល្មើសបទវិន័យមន្ត្រីរាជការ ជាដើម។

តែយ៉ាងណា លោករដ្ឋលេខាធិការ ចាន់ អ៊ាន បានលើកទឹកចិត្ត និងជំរុញឱ្យអគ្គនាយកដ្ឋានធនធានមនុស្សបន្តសហការល្អជាមួយអង្គភាពពាក់ព័ន្ធចំណុះក្រសួងមហាផ្ទៃ និងរដ្ឋបាលថ្នាក់ក្រោមជាតិ ជាពិសេសខិតខំប្រឹងប្រែងយកចិត្តទុកដាក់បំពេញតួនាទីភារកិច្ចប្រកបដោយស្មារតីទទួលខុសត្រូវ ឆន្ទៈមនសិការខ្ពស់ក្នុងកិច្ចសហការដឹកនាំ ដើម្បីអនុវត្តផែនការយុទ្ធសាស្ត្រស្តីពីការគ្រប់គ្រងនិងអភិវឌ្ឍធនធានមនុស្សរបស់ក្រសួងមហាផ្ទៃឱ្យសម្រេចបានជោគជ័យបន្តទៀត៕

អត្ថបទ៖ ធឿន វ៉ាន់សុង