ព័ត៌មានជាតិ

ជាង ៣០ ឆ្នាំ អ្នកឧកញ៉ាម៉ុង ឫទ្ធី ចាយទុនអស់ប្រមាណ ១២០ លានដុល្លារ លើការវិនិយោគដាំដុះដំណាំដូងប្រេង

បានផុស

៣ ខែ មុន

នៅ

ថ្ងៃអាទិត្យ ២២ កុម្ភៈ ២០២៦

ដោយ

Dy Bunnara

ជាង ៣០ ឆ្នាំមកនេះ អ្នកឧកញ៉ា ម៉ុង ឫទ្ធី បានចំណាយទុនអស់ប្រមាណ ១២០ លានដុល្លារ លើការវិនិយោគដាំដុះដំណាំដូងប្រេង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់ក្រុមអ្នកសារព័ត៌មានក្នុងដំណើរទស្សនកិច្ចនៅតំបន់វិនិយោគ និងអភិវឌ្ឍន៍របស់ក្រុមហ៊ុន ម៉ុង ឫទ្ធី គ្រុបនៅស្រុកព្រៃនប់ ខេត្តព្រះសីហនុ សេដ្ឋីកសិកម្មដ៏លេចធ្លោបានឲ្យដឹងថា ការវិនិយោគលើដំណាំដូងប្រេងរហូតមកដល់ពេលនេះ ក្រុមហ៊ុនចាយទុនអស់ប្រមាណ ១២០ លានដុល្លារ និងនៅមិនទាន់រកបានផលចំណេញបានវិញនៅឡើយទេ។

អ្នកឧកញ៉ាប្រាប់ថា ការធ្វើជំនួញកសិកម្មសេដ្ឋីៗក្នុងស្រុកមិនហ៊ានប្រថុយដាក់ទុនវិនិយោគនោះទេ ប៉ុន្តែអ្នកឧកញ៉ាមិនរុញរានៅតែបន្តមុខជំនួញដែលអ្នកឧកញ៉ាបានចាប់កវែកកឆ្នាំងពេញមួយជីវិតនេះ។

ពាក់ព័ន្ធដំណាំដូងប្រេង អ្នកឧកញ៉ាបានបញ្ជាក់ថា ក្រុមហ៊ុនបានចាប់ផ្តើមដាំដុះតាំងពីឆ្នាំ ១៩៩៥ និងបច្ចុប្បន្នបានពង្រីកនៅលើផ្ទៃដីជាង ១៦ ០០០ ហិកតា នៅស្រុកព្រៃនប់ ក្នុងខេត្តព្រះសីហនុ ។

អ្នកឧកញ៉ាបានលើកឡើងថា ការវិនិយោគដំណាំដូងប្រេងត្រូវចាយពេលវេលា និងទុនច្រើន ខណៈការវិនិយោគរបស់ឧកញ៉ាបច្ចុប្បន្នបានបង្កើតការងារដល់ពលរដ្ឋទាំងផ្ទាល់និងប្រយោលបានរាប់ម៉ឺននាក់។

ស្របពេលទីផ្សារដំណាំដូងប្រេងកំពុងមានហាងឆេងល្អ អ្នកឧកញ៉ា ម៉ុង ឫទ្ធី បានឲ្យដឹងថា ផលដូងប្រេងរបស់ក្រុមហ៊ុនប្រមាណ ៩៧% ត្រូវបាននាំចេញទៅប្រទេសឥណ្ឌា និងសល់ប្រហែល ៣% កែច្នៃប្រើប្រាស់នៅក្នុងស្រុក៕