មនុស្សជិត២ពាន់នាក់ដែលសង្ស័យពាក់ព័ន្ធករណី Online Scam ត្រូវបានឃាត់ខ្លួន ក្នុងខែមេសា

នៅក្នុងខែមេសានេះ រាប់ពីថ្ងៃទី៣ ដល់ថ្ងៃទី២០ កម្លាំងនគរបាលបង្ក្រាបបានទីតាំងលបលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា ចំនួន២៣កន្លែង ដោយមានមនុស្សយ៉ាងហោចណាស់ចំនួន១ ៩៥៧នាក់ ស្មើនឹង១៨សញ្ជាតិ ត្រូវបានឃាត់ខ្លួន។ នេះបើតាមអ្នកនាំពាក្យរងក្រសួងមហាផ្ទៃ លោក​ ទូច សុខៈ។

បើតាមលោក ទូច សុខៈ ទីតាំងដែលត្រូវបានសមត្ថកិច្ចចុះបង្ក្រាបខាងលើ មាននៅក្នុងភូមិសាស្ត្រភ្នំពេញចំនួន១១កន្លែង ស្វាយរៀង៤កន្លែង ព្រះសីហនុ៣កន្លែង កែប១កន្លែង បន្ទាយមានជ័យ១កន្លែង មណ្ឌលគិរី១កន្លែង សៀមរាប១កន្លែង និងកោះកុង១កន្លែង។

អ្នកនាំពាក្យរង បានឱ្យដឹងថា ក្នុងចំណោមជនសង្ស័យដែលឃាត់ខ្លួនបានទាំង១ ៩៥៧នាក់នោះ មាន៨៣២នា​​​​​​​​​​​​​​ក់ ត្រូវ​បានបណ្ដេញចេញពីប្រទេសកម្ពុជា និងជនសង្ស័យ៦៤នាក់ ត្រូវបានកសាងសំណុំរឿងបញ្ជូនទៅតុលាការ។ ខណៈ១ ០៣២នាក់ កំពុងបន្តនីតិវិធីនៅ​តាម​ស្នងការដ្ឋាននគរបាលរាជធានី-ខេត្ត។ ដោយឡែក មនុស្សចំនួន២៩នាក់ទៀតមិនជាប់ពាក់ព័ន្ធនឹងបទល្មើស Online Scam ត្រូវបានសមត្ថកិច្ចត្រឹមអប់រំណែនាំ។

ក្នុងរយៈពេលដូចគ្នានេះ តាមការបញ្ជាក់ឱ្យដឹងដោយលោក ទូច សុខៈ អាជ្ញាធរមានសមត្ថកិច្ចនៅមូលដ្ឋានក៏បានបន្តចុះត្រួតពិនិត្យរដ្ឋបាលយ៉ាងសកម្មលើការអនុវត្តអនុក្រឹត្យលេខ០៣ ស្ដីពីការគ្រប់គ្រងសន្ដិសុខសុវត្ថិភាពតាមទីតាំងរស់នៅប្រមូលផ្ដុំ នៅតាមបណ្តារាជធានី-ខេត្ត សរុប២ ៦៩៦ទីតាំង ដោយមានមនុស្សពាក់ព័ន្ធ២១ ២៥៩នាក់៕