មេប៉ូលិសជាតិកម្ពុជា ធ្វើទស្សនកិច្ចនៅកូរ៉េខាងត្បូង ៤ថ្ងៃ ដើម្បីពង្រឹងកិច្ចសហការលើវិស័យសន្តិសុខ

អគ្គស្នងការនគរបាលជាតិ លោកនាយឧត្តមសេនីយ៍ ស ថេត បានដឹកនាំគណៈប្រតិភូជាន់ខ្ពស់នៃនគរបាលជាតិកម្ពុជា ធ្វើដំណើរឆ្ពោះទៅកាន់ប្រទេសកូរ៉េខាងត្បូង ដើម្បីបំពេញទស្សនកិច្ចការងារ រយៈពេល៤ថ្ងៃ ដើម្បីពង្រឹងកិច្ចសហប្រតិបត្តិការលើវិស័យសន្តិសុខរវាងកម្ពុជា និងកូរ៉េខាងត្បូង។

ទស្សនកិច្ចរបស់លោកនាយឧត្តមសេនីយ៍ ស ថេត គឺតបតាមការអញ្ជើញរបស់លោក Yoo Jae Seong អគ្គស្នងការស្តីទីនៃទីភ្នាក់ងារនគរបាលជាតិកូរ៉េ និងទទួលបានការអនុញ្ញាតពីប្រមុខរាជរដ្ឋាភិបាល សម្តេចធិបតី ហ៊ុន ម៉ាណែត និងលោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។ ទស្សនកិច្ចនេះ មានរយៈពេល៤ថ្ងៃ គឺចាប់ពីថ្ងៃទី២៧ ដល់ថ្ងៃទី៣០ ខែមេសា ឆ្នាំ២០២៦ ដោយគណៈប្រតិភូ បានចេញពីអាកាសយានដ្ឋានអន្តរជាតិតេជោ កាលពីយប់ថ្ងៃទី២៧ ខែមេសា ហើយនៅព្រឹកថ្ងៃទី២៨នេះ គណៈប្រតិភូបានទៅដល់អាកាសយានដ្ឋានអន្តរជាតិ INCHON ហើយ។

គួរកត់សម្គាល់ថា ទស្សនកិច្ចនេះ ត្រូវបានគេមើលឃើញថា ធ្វើឡើងក្នុងពេលដែលកម្ពុជា និងកូរ៉េខាងត្បូង តាមរយៈកងកម្លាំងអនុវត្តច្បាប់នៃប្រទេសទាំងពីរ កំពុងចាប់ដៃគ្នាយ៉ាងស្អិតរមួតក្នុងកិច្ចសហប្រតិបត្តិការលើវិស័យសន្តិសុខ។

ជាក់ស្ដែងកាលពីចុងឆ្នាំ២០២៥ អគ្គស្នងការដ្ឋាននគរបាលជាតិកម្ពុជា និងទីភ្នាក់ងារនគរបាលជាតិកូរ៉េ បានបង្កើតឡើងក្រុមការងាររួមមួយ Task Force ក្នុងបំណងពង្រឹងកិច្ចសហប្រតិបត្តិការសន្តិសុខ ពិសេសផ្ដោតលើការប្រយុទ្ធប្រឆាំងឧក្រិដ្ឋកម្មឆ្លងដែននានា រាប់ទាំងបទល្មើសឆបោកតាមប្រព័ន្ធបច្ចេកវិទ្យា (Online Scam) ដែលជាប់ពាក់ព័ន្ធជាមួយជនជាតិកូរ៉េនៅកម្ពុជា។

កិច្ចសហប្រតិបត្តិការនេះជាការបោះជំហានទៅមុខប្រកបដោយទំនុកចិត្ត និងភាពប្រាកដនិយមសម្រាប់កិច្ចសហប្រតិបត្តិការក្នុងវិស័យសន្តិសុខរវាងកម្ពុជា និងកូរ៉េខាងត្បូង ជាពិសេសការចាប់ដៃគ្នាក្នុងកិច្ចសហប្រតិបត្តិការបង្ការ ទប់ស្កាត់ និងបង្ក្រាបបទល្មើស Online Scam នេះតែម្ដង។ ខណៈជនជាតិកូរ៉េខាងត្បូងមួយចំនួន ដែលសង្ស័យពាក់ព័ន្ធនៅក្នុងបទល្មើសនេះ ក៏ត្រូវបានបញ្ជូនចេញពីកម្ពុជា៕

ដោយ៖ ធឿន វ៉ាន់សុង