ព័ត៌មានជាតិ

ផ្លូវនៅតំបន់អង្គរ មិនអាចសាងសង់ពង្រីកឲ្យធំទូលាយ នាំឲ្យប៉ះពាល់តម្លៃតំបន់បេតិកភណ្ឌពិភពលោក

បានផុស

២ ខែ មុន

នៅ

ថ្ងៃអង្គារ ១២ ឧសភា ២០២៦

ដោយ

ផ្លូវនៅតំបន់រមណីយដ្ឋានអង្គរមិនអាចសាងសង់ពង្រីកឲ្យធំទូលាយ ខណៈតំបន់ជាសម្បត្តិបេតិកភណ្ឌពិភពលោកមួយនេះស្ថិតនៅក្រោមការពារនៃអង្គការយូណេស្កូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសន្និសីទកាសែតស្តីពី «ការអភិរក្ស និងការអភិវឌ្ឍន៍ប្រកបដោយចីរភាព» ក្នុងដំណើរសិក្សាពីតំបន់បេតិកភណ្ឌលើទឹកដីអង្គរ របស់ក្រុមអ្នកសារព័ត៌មានមកពីជាង ១០ អង្គភាព លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរាបានឲ្យដឹងថា ការមិនពង្រីកផ្លូវនៅតំបន់អង្គរឲ្យធំដូចជាផ្លូវហាយវេគឺដើម្បីរក្សាតម្លៃ និងសោភ័ណភាពរបស់ប្រាសាទបុរាណ ព្រោះការធ្វើផ្លូវធំពេកនឹងធ្វើឲ្យបាត់បង់តម្លៃជាប្រវត្តិសាស្ត្ររបស់អង្គរ និងអាចបិទបាំងទិដ្ឋភាពប្រាសាទទៀតផង។

ក្រៅពីគិតគូរពីផលប៉ះពាល់តាមរយៈការសាងសង់ហេដ្ឋារចនាសម្ព័ន្ធផ្លូវថ្នល់នានា អាជ្ញាធរជាតិអប្សរាក៏បានផ្លាស់ប្តូរគន្លងផ្លូវ និងហាមឃាត់មិនឲ្យមានការបើកបររថយន្ត ឬម៉ូតូនៅកៀកនឹងតំបន់ប្រាសាទពេកនោះទេ។ ជាក់ស្តែង កាលពីមុនតំបន់មុខអង្គរវត្តនិងទីលានជល់ដំរី ទេសចរអាចបើកបរឡាន ឬចតរថយន្ត និងហូបចុកនៅក្បែរនោះបាន ប៉ុន្តែឥឡូវនេះអនុញ្ញាតឲ្យតែការដើរ និងការជិះកង់ប៉ុណ្ណោះនៅក្បែរប្រាសាទ។

លោក យិត ចាន់ដារដ្ឋ បានបញ្ជាក់ថា ការរៀបចំផ្លូវវាងឲ្យឆ្ងាយពីប្រាសាទ ដោយសារមូលហេតុសំខាន់ៗចំនួនពីរ គឺកាត់បន្ថយការបំពុលផ្សែងដែលកើតចេញពីរថយន្តនិងម៉ូតូបង្កជាការបំពុល ដែលធ្វើឲ្យប៉ះពាល់ដល់គុណភាពថ្មប្រាសាទ និងទីពីរកាត់បន្ថយរំញ័រពីការបើកបរយានយន្តនៅក្បែរប្រាសាទ ដែលបង្កើតបានជារំញ័រធ្វើឲ្យថ្មប្រាសាទរង្គើ។

ជាឧទាហរណ៍ ទីលានជល់ដំរីធ្លាប់រងការខូចខាតស្ទើរតែបាក់ស្រុតដោយសារបញ្ហាកើតរំញ័រពីយានយន្ត មុនពេលមានការជួសជុល និងតម្រង់ឡើងវិញ។

លោក យិត ចាន់ដារដ្ឋ បានសម្អាងថា ការធ្វើផ្លូវវាងដែលតម្រូវឲ្យភ្ញៀវទេសចរត្រូវដើរឆ្ងាយជាងមុនបន្តិច ជារឿងដ៏ចាំបាច់បំផុតដើម្បីអភិរក្សប្រាសាទឲ្យនៅគង់វង្សយូរអង្វែង។

បើតាមប្រភពពីមន្រ្តីអាជ្ញាធរជាតិអប្សរាបានកត់សម្គាល់ថា ភ្ញៀវទេសចរបរទេសភាគច្រើនមិនសូវត្អូញត្អែរអំពីការដើរឆ្ងាយនេះទេ ប៉ុន្តែភ្ញៀវជនជាតិខ្មែរមួយចំនួនតែងតែត្អូញត្អែរពីចម្ងាយឆ្ងាយដែលត្រូវធ្វើដំណើរ៕