តារាល្បីៗជាច្រើនចេញមុខអំពាវនាវរកយុត្តិធម៌ដល់ពិធីការិនី មាន ពេជ្រវីតា

ភ្នំពេញ៖ ស្របពេលពិធីការិនីកញ្ញា មាន ពេជ្រវីតា ពិធីការិនីទូរទស្សន៍My ត្រូវបានបញ្ជូនទៅពន្ធនាគាក្នុងករណីរឿងរ៉ាវក្ដីក្ដាំជាមួយនឹងលោកឧកញ៉ា ហេង សៀ នោះក៏មានតារាល្បីៗជាច្រើនទៀតបានចេញមុខអំពាវនាវដើម្បីជួយស្វែងរកយុត្តិធម៌ជូននាង។

តាមការសង្កេតឃើញតារាល្បីៗក្នុងប្រទេសដែលចេញមុខអំពាវនាវនេះដូចជាអ្នកនាង ចន ច័ន្ទល ក្ខិណា អ្នកនាង ពេជ្រ សោភា អ្នកនាង ឱក សុគន្ធកញ្ញា កញ្ញា ទេព បូព្រឹក្ស កញ្ញា តន់ ច័ន្ទសីម៉ា កញ្ញា រ៉េត ស៊ូហ្សាណា លោក ជីដេវីត លោក វណ្ណដា និងតារាសិស្ប:ល្បីជាច្រើនទៀត។

ការអំពាវនាវនេះក៏បានបង្ហោះអបដោយសារមួយប្រយោគរបស់កញ្ញា មាន ពេជ្ររីតា ដែលយំរៀបរាប់ក្នុងវីដេអូបង្ហាញពីការឈឺចាប់របស់ខ្លួនផងដែរ។

តាមរយៈប្រយោគនោះបានលើកឡើងថា៖ “គេស្ទាបខ្ញុំ” “ខ្ញុំខ្ពើមខ្លួនឯង” “ខ្លួនខ្ញុំត្រូវគេរំលោភលើរាងកាយ ហើយខ្ញុំត្រូវជាប់ខ្នោះទៀត ហើយចូលគុកទៀត”។ ខ្លឹមសារនេះដែលត្រូវបានតារាល្បីៗយកមកសរសេរបង្ហោះចែកចាយព្រោងព្រាតលើបណ្តាញសង្គមដើម្បីទាមទារយុត្តិធម៌ជូនពិធីការិនីកញ្ញា មាន ពេ ជ្រវីតា។

ដោយឡែកនៅលើបណ្តាញសង្គមហ្វេសប៊ុកក៏មិនខុសគ្នាពីបុគ្គលស្ថិតនៅក្នុងចង្កោមអ្នកសិល្បៈនោះទេ គឺមានមហាជនជាច្រើនទៀតក៏បានអំពាវនាវដល់ស្ថាប័នច្បាប់ជួយរកយុត្តិធម៌ជូនកញ្ញា មាន ពេជ្ររីតា ផងដែរ៕

អត្ថបទ៖ ចាន់រ៉ា