ចាន់ វឌ្ឍនាកា មិនមាន​ឈ្មោះជម្រើសជាតិ​កម្ពុជា​ ជម្រុះបាល់ទាត់ពិភពលោក​នៅ​បារ៉ែន

សហព័ន្ធកីឡាបាល់ទាត់កម្ពុជាបានបញ្ចេញឈ្មោះកីឡាករ២៤រូប សម្រាប់ត្រៀមប្រកួតជម្រុះបាល់ទាត់ពិភពលោក ២០២២នៅបារ៉ែនខែមិថុនាខាងមុខ។

បញ្ជីឈ្មោះកីឡាករជម្រើសជាតិទាំង ២៤ រូប​ គឺ​មិនមានឈ្មោះ​ខ្សែ​ប្រយុទ្ធ​ចាន់ វឌ្ឍនាការ​នោះទេ។ កីឡាករ​មាន​ស្រុកកំណើតនៅខេត្តកំពត ​ធ្លាប់​ទៅ​ប្រកប​អាជីព​នៅលីក​របស់ជប៉ុន និង​ម៉ាឡេស៊ី និងកំពុង​ចូលរួមលេង​ឲ្យក្លិបបឹងកេតអេហ្វស៊ី។

ក្រោម​ការ​ដឹកនាំ​របស់​​លោកKeisuke Honda ជាអ្នកចាត់ការទូទៅ វឌ្ឍនាការ​ដែល​ត្រូវបានគេស្គាល់ដោយសារជំនាញនិងសមត្ថភាពក្នុងការស៊ុតបាល់ហ្វ្រីឃីក និងចាត់ទុកជាកីឡាករបាល់ទាត់ឆ្នើមពីប្រទេសកម្ពុជា នឹង​មិន​មាន​ឈ្មោះ​ចូលរួម​វគ្គ​ជម្រុះ៣ប្រកួតចុងក្រោយជុំទី២ ពូលC សម្រាប់​កម្ពុជា ក្នុង​ព្រឹត្តិការណ៍បាល់ទាត់ពិភពលោក (FIFA World Cup Qatar 2022)។

ក្រុមបាល់ទាត់ជម្រើសជាតិកម្ពុជានឹងត្រូវចូលរួម ៣ប្រកួតចុងក្រោយនៃការប្រកួត FIFA World Cup Qatar 2022 វគ្គជម្រុះជុំទី២ ពូល C នៅទឹកដីកណ្ដាលប្រទេសបារ៉ែន នាថ្ងៃទី៣ ខែមិថុនា ឆ្នាំ២០២១, បន្តជួបជាមួយក្រុមជម្រើ សជាតិអ៊ីរ៉ាក់ នាថ្ងៃទី៧ ខែមិថុនា ឆ្នាំ២០២១ និងបន្ត១ប្រកួតចុងក្រោយជាមួយក្រុមអ៊ីរ៉ង់ នាថ្ងៃទី ១១ ខែមិថុនា ឆ្នាំ២០២១៕

អត្ថបទ៖​ វិសិទ្ធ