ទុស្សេខ្សែភ្លើងឆេះផ្ទះមួយខ្នង និងខូចខាតទ្រព្យសម្បត្តិទាំងស្រុង នៅស្រុកបរកែវ

ផ្ទះមួយខ្នងត្រូវបានអគ្គិភ័យឆាបឆេះគ្មានសល់ ប៉ុន្តែសំណាងល្អមិនមាននរណាម្នាក់គ្រោះថ្នាក់ដល់ជីវិតឡើយ។

ហេតុការណ៍នេះបានកើតឡើងនៅវេលាម៉ោង ២និង៣០នាទីរសៀល ថ្ងៃទី២ ខែមិថុនា ឆ្នាំ២០២១ ស្ថិតនៅក្នុងភូមិ១ ឃុំឡាមិញ ស្រុកបរកែវ។

ជនរងគ្រោះ មានឈ្មោះ អឹុម នាង ភេទស្រី អាយុ៤៩ឆ្នាំ ជនជាតិខ្មែរ ជាស្ត្រីមេម៉ាយ ហើយជាមេគ្រួសារ រ៉ាប់រងទទួលចិញ្ចឹមម្ដាយមានវ័យចាស់ ជរា គឺលោកយាយ អ៊ឹម អ៊ុន អាយុ៨៦ឆ្នាំ ព្រមទាំងមានកូនប្រុស-ស្រីចំនួន៤នាក់ ក្នុងនោះប្រុស២នាក់ ស្រី២នាក់ ហើយមានចៅស្រី ០១នាក់ និងចៅប្រុស ០១នាក់ សរុបទាំងអស់ចំនួន៨នាក់
ដែល​​រស់​នៅ​ក្នុងគ្រួុសារក្រីក្រមួុយនេះ។

លោកយាយបានប្រាប់ថា មូលហេតុនៃការឆាបឆេះផ្ទះនេះ គឺបណ្ដាលមកពីទុសេខ្សែភ្លើង ប៉ុន្តែមិនបានដឹងនៃទំហំខូចខាតផ្ទះដែលត្រូវបានអគ្គិភ័យឆាបឆេះនោះ ខណៈម្ចាស់ផ្ទះកំពុងតែត្រហោយំ គាត់និយាយមិនចេញ។

ភ្លាមៗនោះដែររថយន្តពន្លត់អគ្គិភ័យរបស់អធិការស្រុកបរកែវ បានចេញទៅអន្តរាគមន៍ពន្លត់អគ្គីភ័យ ប្រើ ប្រាស់អស់ទឹកចំនួនពីរថយន្ត ខណៈភ្លើងកំពុងឆាបឆេះសន្ធោសន្ធៅខ្លាំងពេក រថយន្តបាញ់ទឹកមកមិនទាន់ ក៏បានឆាបឆេះអស់ទាំងស្រុង។

សូមបញ្ជាក់ថា ការខូចខាតផ្ទះនិងសម្ភារៈដែលបានបាត់បង់មិនដឹងថាប៉ុន្មាននៅឡើយទេ បន្ទាប់ពីភ្លើងបានឆាបឆេះនេះ៕ វុទ្ធឦសាន