ឆេះការ៉ាសសាំងនៅស្រុកថ្មគោល បង្កការភ្ញាក់ផ្អើលទាំងយប់

មានការភ្ញាក់ផ្អើលយ៉ាងខ្លាំងរហូតដល់កម្លាំងសមត្ថកិច្ចចេញរថយន្តពន្លត់អគ្គីភ័យឆ្ពោះទៅកាន់គោលដៅ ដោយសារតែមានផ្សែងភ្លើងចាប់ផ្ដើមឆាបឆេះនៅក្នុងការ៉ាសសាំងមួយកន្លែង ព្រមទាំងមានសំឡេងស្រែកឲ្យជួយពីម្ចាស់ការ៉ាសសាំងនោះផង។

ហេតុការណ៍អគ្គិភ័យនេះបានកើតឡើងនៅថ្ងៃទី ២១ ខែសីហា ឆ្នាំ២០២៤ វេលាម៉ោងប្រហែល ៧ និង៣០ នាទីយប់ ស្ថិត​នៅចំណុចក្រុមទី ១៣ ភូមិកសិកម្ម ឃុំតាពូង ស្រុកថ្មគោល ខេត្តបាត់ដំបង។

តាមការបំភ្លឺរបស់ប្រជាពលរដ្ឋ ដែលនៅក្បែរកន្លែងកើតហេតុបានបញ្ជាក់ថា នៅមុនពេលកើតហេតុគេសង្កេតឃើញមាន​អណ្តាតភ្លើងចាប់ផ្ដើមឆាបឆេះនៅក្នុងបរិវេណការាសសាំងនោះ ហើយម្ចាស់ការាសសាំងក៏បានព្យាយាមពន្លត់រហូតដល់​រងរបួសដោយសាររលាក។ ឃើញដូច្នេះប្រជាពលរដ្ឋ ក៏បានទាក់ទងទៅសមត្ថកិច្ចនៃអធិការដ្ឋាននគរបាលស្រុកថ្មគោលដើម្បីជួយអន្តរាគមន៍។

ភ្លាមៗនោះដែរ រថយន្តពន្លត់អគ្គិភ័យរបស់សមត្ថកិច្ចក៏បានចុះទៅដល់ ព្រមទាំងបានជួយបាញ់ពន្លត់និងទប់ស្កាត់ការរីករាលដាលបានទាន់ពេលវេលា ដោយគ្រប់គ្រងស្ថានការណ៍បានទាំងស្រុង។

ក្រោយកាលពិនិត្យរបស់សមត្ថកិច្ចទៅលើទីតាំងកើតហេតុ សម្ភារ:ខូចខាតរួមមាន៖

-ឆេះការ៉ាស់សាំង ១ កន្លែង (ទប់ស្កាត់ទាន់ពេល)
-ឆេះចង្ក្រានហ្គាស ឆ្នាំងដាំបាយ និង សម្ភារប្រើប្រាស់មួយចំនួន និងបង្កឲ្យរងរបួសដល់មនុស្សចំនួន ១ នាក់ ឈ្មោះ រ៉ែន រ៉ាត់ ភេទប្រុស អាយុ ៣៥ឆ្នាំ (ម្ចាស់ការាសសាំង) ។

ក្រោយការស្រាវជ្រាវរកមូលហេតុគឺបណ្ដាល​មកពីការឆ្លងចរន្តអគ្គិសនី (ឆ្នាំងដាំបាយអគ្គីសនី)៕

អត្ថបទ៖ សោ និយមរ័ត្ន