អគ្គស្នងការនគរបាលជាតិផ្តល់រថយន្តពន្លត់អគ្គិភ័យទំនើប២គ្រឿងដល់មន្ត្រីជំនាញដើម្បីបង្កើនអន្តរាគមន៍គ្រោះអគ្គិភ័យ

ភ្នំពេញ៖ លោកឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្រ្គោះ តំណាង លោកឧត្តមសេនីយ៍ឯក ឡោ សុឡេង អគ្គស្នងការរងនគរបាលជាតិ និងជាស្នងការហិរញ្ញកិច្ច និងភស្តុភារ កាលពីព្រឹកថ្ងៃទី១៤ ខែមិថុនា ឆ្នាំ២០២១ បានប្រគល់រថយន្តពន្លត់អគ្គិភ័យទំនើបចំនួន០២គ្រឿង ក្នុងនោះ០១គ្រឿងជូនដល់នាយកដ្ឋាននគរបាលបង្ការពន្លត់អគ្គិភ័យ និងសង្រ្គោះ និង០១គ្រឿងទៀតដល់ស្នងការដ្ឋាននគរបាល រាជធានីភ្នំពេញ ដោយរថយន្តពន្លត់អគ្គិភ័យនេះមានសមត្ថភាពពន្លត់អគ្គិភ័យបានរយៈកម្ពស់ខ្ពស់ និងបានពីចម្ងាយ។

លោកឧត្តមសេនីយ៍ឯកបញ្ជាក់ថា រថយន្តពន្លត់អគ្គិភ័យដែលបានផ្តល់ជូននាយកដ្ឋានជំនាញ និងស្នងការដ្ឋាននគរបាល រាជធានីភ្នំពេញនាពេលនេះ គឺមានអត្ថប្រយោជន៍ច្រើនជាងរថយន្តដែលប្រទេសកម្ពុជាយើងបានប្រើកន្លងទៅ ដោយសាររថយន្តនេះអាចផ្ទុកទឹកបាន៨ពាន់លីត្រ និងធ្វើការបាញ់ទឹកចេញបានលឿន ក្នុងរយៈកម្ពស់ជាង ៣០ម៉ែត្រ ជាពិសេសអាចស្វានបុកជញ្ជាំងបានថែមទៀតផង។ 

លោកឧត្តមសេនីយ៍ ក៏សំណូមពរដល់នាយកដ្ឋានជំនាញ និងស្នងការដ្ឋាននគរបាលរាជធានីភ្នំពេញ បន្ទាប់ពីទទួលបានរថយន្តនេះហើយ សូមធ្វើការថែទាំឲ្យបានល្អ ដើម្បីជាប្រយោជន៍បម្រើប្រជាពលរដ្ឋ និងសង្គមជាតិ។

ជាមួយគ្នានោះលោកឧត្តមសេនីយ៍ឯក នេត វន្ថា បានអំពាវនាវដល់ប្រជាពលរដ្ឋទាំងអស់បន្តមានការប្រុងប្រយ័ត្នខ្ពស់ចំពោះករណីអគ្គិភ័យ ដែលករណីនេះតែងតែកើតឡើងជារើយៗមិនថារដូវវស្សា ឬក៏រដូវប្រាំងនោះទេ ដូច្នេះក្នុងគេហដ្ឋាននីមួយៗគប្បីមានឧបករណ៍សង្រ្គោះបឋមដូចជា បំពង់ពន្លត់អគ្គិភ័យជាដើម ហើយបើទោះបីជាមន្រ្តីជំនាញមានរថយន្ត និងសម្ភារៈទំនើបក្តី ក៏បងប្អូនមិនត្រូវធ្វើការធ្វេសប្រហែសឡើយ។

ឆ្លៀតឪកាសនេះលោកឧត្តមសេនីយ៍ឯក នេត វន្ថា សូមថ្លែងអំណរគុណចំពោះក្រសួងមហាផ្ទៃ និងអគ្គស្នងការដ្ឋាននគរបាលជាតិ ដែលជានិច្ចកាលតែងតែគិតគូរពីសុខទុក្ខរបស់ប្រជាពលរដ្ឋ ដោយបានបំពាក់នូវសម្ភារៈ មធ្យាបាយ ជាពិសេស រថយន្តពន្លត់អគ្គិភ័យ ដល់នាយកដ្ឋានជំនាញ ក៏ដូចជា ស្នងការដ្ឋាននគរបាល រាជធានី-ខេត្ត ដើម្បីមានលទ្ធភាពជួយសង្រ្គោះប្រជាពលរដ្ឋ ក្នុងករណីកើតហេតុការណ៍គ្រោះអគ្គិភ័យកើតឡើង៕

អត្ថបទ៖ រ៉ាវុទ្ធ