អ្នកលក់ឥវ៉ាន់ចាប់ហួយបោះដុំសម្រុកមកទិញទំនិញ ទុកលក់ថ្ងៃដាក់បិណ្ឌខាងមុខ

នៅដើមខែសីហានេះ នៅតាមបណ្តាផ្សារគេសង្កេតឃើញបងប្អូនអាជីវករនាំគ្នាសម្រុកមកទិញឥវ៉ាន់ចាប់ហួយយកទៅបោះឲ្យម៉ូយតាមបណ្តាខេត្តជាយក្រុង បន្ទាប់ពីស្ងប់ស្ងាត់មួយរយះមក។

តាមប្រភពពីលោក ម៉ៅ ប្រុស ជាអ្នករស់នៅឃុំកំពង់អំពិល ស្រុកពារាំង ខេត្តព្រៃវែង បានឲ្យដឹងថា នៅក្នុងខែសីហានេះ បងប្អូនលក់ចាប់ហួយតាមផ្ទះបានកុម្មង់ទិញចាប់ហួយគ្រប់មុខ ដើម្បីទុកលក់នៅថ្ងៃដាក់បិណ្ឌខាងមុខ។

បងប្រុសបន្តថា នៅស្រុកស្រែខែវស្សានេះ គេរវល់ធ្វើស្រែ ម្លោះហើយគ្មានពេលមកទិញអីវ៉ាន់ដល់ផ្សារនោះទេ ដូច្នេះពួកគាត់តម្រូវមកទិញនៅតាមផ្ទះ។ ដោយឡែកលោក ជូ ចាន់នី ជំនួយការសាលាសង្កាត់ច្បារអំពៅ​២បានឲ្យដឹងថា ទីតាំងច្បារអំពៅសម្បូទៅដោយឃ្លាំងស្តុកចាប់ហួយ និងផ្សារធំចំនួន២ ដូច្នេះហើយទើបមានរថយន្តធំៗមកដឹកអីវ៉ាន់ចាប់ហួយយកទៅបោះតាមបណ្តាផ្សារនៅតំបន់ជាយក្រុង៕

អត្ថបទ ៖ នរា