ឌឺដងសម្តី​គ្នា ​កាន់​កាំបិតខ្វែវជិះ​ម៉ូតូដេញកាប់​គូ​សត្រូវ​ របួសធ្ងន់ម្នាក់

ខេត្តបន្ទាយមានជ័យ៖ យុវជនម្នាក់​និង​បក្សពួក​បាន​យកកាំបិតខ្វាវជិះម៉ូតូដេញ​កាប់គូសត្រូវ បណ្តាលឲ្យរបួសធ្ងន់គ្រាន់តែពាក្យសម្តីឌឺដងដាក់គ្នា កាល​ពី​វេលាម៉ោង១ថ្ងៃត្រង់ ថ្ងៃទី៩ ខែសីហា ឆ្នាំ២០២១។

ក្រោយពីកើតហេតុ ម្តាយជនរងគ្រោះ ឈ្មោះ ឡុង ស្រីមុំ ភេទស្រី អាយុ៤២ឆ្នាំ រស់នៅភូមិកន្ទួត សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បានពាក្យបណ្ដឹងទៅអាវុធហត្ថករណីមានគេកាប់កូនរបស់​គាត់ឈ្មោះហុឹម សុវណ្ណារាជ អាយុ១៥ឆ្នាំ បណ្តាលឲ្យរបួសធ្ងន់។

លោកវរសេនីយ៍ត្រី យ៉ាន់ សុវណ្ណ មេបញ្ជាការកងរាជអាវុធហត្ថក្រុងសិរីសោភ័ណ ក្រោយទទួលបានពាក្យបណ្ដឹងភា្លម បានដឹកនាំកម្លាំងចុះធ្វើការស្រាវជ្រាវ រហូតឈានដល់ឃាត់ខ្លួនបានជនសង្ស័យម្នាក់ ឈ្មោះ នឿន វ៉ាន់សាក់ ភេទប្រុស អាយុ១៦ឆ្នាំ រស់នៅភូមិព្រះពន្លា សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ ក្នុង​ពេល​ឃាត់ខ្លួន សមត្ថកិច្ច​ដកហូតបានកាំបិតដងវែង ពណ៌ខ្មៅ ប្រវែង៦០សង់ទីម៉ែត្រ ហើយបញ្ជូនមកមូលដ្ឋានកងរាជអាវុធហត្ថក្រុងដើម្បីសួរនាំអំពីរឿងហេតុដែលកើតឡើង។

ជនសង្ស័យបានឆ្លើយថា ពេលកើតហេតុនោះខ្លួននិងមិត្តភ័ក្រ បានអង្គុយលេងនៅមុខផ្ទះស្រាប់តែឃើញគូទំនាស់​គ្នា​ចំនួន៤នាក់ ជិះម៉ូតូចំនួន២គ្រឿងមកឌឺដងឃើញដូច្នេះ ក៏​បានជិះម៉ូតូដេញតាមរហូតដល់ចំណុចផ្លូវជាតិលេខ៥៦ ក៏កាប់ទៅលើក្រុមជនរងគ្រោះបណ្ដាលឲ្យរបួសធ្ងន់ម្នាក់ជា​អ្នកបើកម៉ូតូ។ ក្រោយពីធ្វើសកម្មភាពរួច ​ពួកគេទាំ២នាក់ បានជិះម៉ូតូគេចខ្លួនបាត់បាន១ដង្ហើមចង្រិត ក៏ត្រូវអាវុធហត្ថឃាត់ខ្លួន។

លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើសបានឱ្យដឹងថា ការឃាត់ខ្លួនជនសង្ស័យខាងលើនេះ ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត ជនសង្ស័យ និងវត្ថុតាងកាំបិត ត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបញ្ជូនទៅសាលាដំបូងខេត្តដាក់ទោសទៅតាមច្បាប់៕

អត្ថបទ៖ វ៉ាន់ ណាង