កម្ពុជាកំពុងស្វែងរកមុខក្រុមហ៊ុនបរទេស​ដែលដាក់រូបប្រា​សាទអង្គរវត្ត​លើផលិតផលគុយទាវ​នៅអាមេរិក

លោក ប៉ែន សុ​វិជាតិ អនុរដ្ឋលេខាធិការ និង​ជា​អ្នកនាំពាក្យ​ក្រសួងពាណិជ្ជកម្ម បាន​បញ្ជាក់ថាមកទល់ពេលនេះ​ទីប្រឹក្សា​ពាណិជ្ជកម្ម​ប្រចាំ​ស្ថាន​ឯកអគ្គរាជទូត​កម្ពុជា​នៅ​សហរដ្ឋអាមេរិកកំពុង​ស្វែងរក​ជួប​ម្ចាស់​ផលិត​ទំនិញ​ដែល​ប្រើប្រាស់​រូប​អង្គរវត្ត​ដោយ​បំពាន និង​គ្មាន​ការអនុញ្ញាត​ត្រឹមត្រូវ។

ស្ថានទូត​កម្ពុជា​ប្រចាំ​សហរដ្ឋអាមេរិក​នៅ​ថ្ងៃ​ទី​២៦ សីហា២០២១ បាន​រក​ឃើញ​ករណី​ចែកចាយ​នៅ​លើ​ទីផ្សារ​សហរដ្ឋអាមេរិក​នូវ​ផលិតផល​គុយទាវ​ក្រៀម​ កញ្ចប់​ដែល​មិនមែន​ជា​ផលិតផល​របស់​កម្ពុជាហើយ​នៅ​លើ​សំបក​វេច​ខ្ចប់​មានការ​ប្រើប្រាស់​ស្លាក​សញ្ញា«​ផលិតផល​គុយទាវ​ភ្នំពេញ​» និង«​រូប​សញ្ញា​ប្រាសាទអង្គរវត្ត​»​កំពុង​ត្រូវ​បាន​ដាក់​លក់​នៅ​តាម​បណ្តា​ផ្សារ​អាស៊ី​ក្នុង​តំបន់ឆ្នេរ​ខាងកើត​សហរដ្ឋអាមេរិក (East Coast)។

ទង្វើនេះបាន​រំលោភ​បំពាន​លើ​បទ​ប្បញ្ញត្តិ​ច្បាប់​របស់​កម្ពុជា កិច្ចព្រមព្រៀងនិងសន្ធិសញ្ញា​អន្តរជាតិ ជា​ពិ​សេស​​ការ​ប្រើប្រាស់​ម៉ាក​គុយទាវ​ភ្នំពេញ​បាន​ធ្វើ​ឱ្យ​អ្នក​ប្រើប្រាស់​ទូទៅ​មានការ​ភាន់ច្រឡំអំពី​ប្រភព​ដើម​នៃ​ផលិតផ​គុយទាវ​កញ្ចប់។

​លោក ប៉ែន សុ​វិជាតិ អនុរដ្ឋលេខាធិការ និង​ជា​អ្នកនាំពាក្យ​ក្រសួងពាណិជ្ជកម្មបាន​មានប្រសាសន៍នាថ្ងៃទី​២៧ខែសីហាឆ្នាំ​២០២១​ថា ក្រោយ​ទទួលបានព័ត៌មានថាផលិតផល​ដែលមាន​ឈ្មោះ (Nam Vang Noodle )​ដែលមាន​រូប​ប្រាសាទ​អង្គ​វត្ត និង​ឈ្មោះ​រាជធានី​ភ្នំពេញកំពុង​ចរាចរ​លក់​នៅលើ​ទីផ្សារ​សហរដ្ឋអាមេរិកក្រុមការងារ​របស់​ស្ថានទូតកម្ពុ ជា​នៅ​ទីនោះ​ក៏បាន​ចុះ​ត្រួតពិនិត្យ​ភ្លាមនិង​រាយការណ៍​ថាបាន​រកឃើញ​ក្រុមហ៊ុន​ចំនួន​២នាំចូល​និង​ចែកចាយ​លក់​ផលិតផល​ទាំងនេះក្នុងនោះក្រុមហ៊ុន​១ បាន​សន្យា​បញ្ឈប់ ​ការនាំ​ចូលមក​លក់ហើយ​និង​ស្នើសុំ​លក់​ឲ្យ​អស់​ផលិតផល​ដែលមាន​នៅលើ​ទីផ្សារ​។

លោក​បន្តថាក្នុងនោះ​តំណាង​ពាណិជ្ជកម្ម​នៅក្រៅប្រទេសបាន​ជម្រាបជូន​ម្ចាស់​ហាង​ដែល​ចែកចាយ​លក់​បន្តថាប្រសិនបើ​មិន​បញ្ឈប់​ទេ នឹងមាន​វិធានការ​ផ្លូវច្បាប់​តាមរយៈ​ស្ថានទូតហើយ​ក្រុមហ៊ុន​ក៏​យល់ព្រម​នឹងបញ្ឈប់ ដោយ​ស្នើ​មកវិញ​ថាសុំ​លក់ទំនិញ​ដែល​សេសសល់​ពី​ការនាំ​ចូល​នាពេល​កន្លងមកតែប៉ុណ្ណោះ​។

អ្នកនាំពាក្យដដែលរូបនេះ បន្តថាពេលនេះ​តំណាង​ពាណិជ្ជកម្ម​កម្ពុជា​នៅ​សហរដ្ឋ​អាមេរិកកំពុង​ទាក់ទង​ក្រុមហ៊ុន​មួយទៀត​ដែល​ស្ថិតនៅទីក្រុង​ញ៉ូ​វ​ញកពីព្រោះនៅទី នោះ​ក៏មាន​លក់ទំនិញ​របៀប​នេះដែរហើយ​យើង​ព្យាយាម​ឲ្យ​អស់ពី​សមត្ថភាព​ធ្វើ​ម៉េច​ការពារ​អត្តសញ្ញាណ​ជាតិខ្មែរកុំ​ឲ្យ​មានការ​ប្រើ​រូប​អង្គរវត្ត​ដែល​គ្មាន​ការអនុញ្ញាត​ទៅ​ដាក់​លើ​កញ្ចប់​នំ​ដែល​មិនមែនជា​ផលិតផល​ខ្មែរ យើង​ក៏​មិន​ចង់​ឲ្យ​ប្រើពាក្យ​គុយទាវ​ភ្នំពេញ​ដែរព្រោះថាផលិតផលលើ​សម្បក​វេច​ខ្ចប់ប្រែ​ថាគុយទាវ​ភ្នំពេញហើយ​ម៉ាក​គុយទាវ​ភ្នំពេញក៏មាន​ប្រើប្រាស់​ជា​ម៉ាកស​មូល​ហ​ភាព​រួចហើយ​នៅ​កម្ពុជាដោយ​យើង​ចង់​រក្សា​ម៉ាក​ខ្មែរ​ផងដែរ​។

លោក ប៉ែន សុ​វិជាតិ បានបន្តទៀតថាទន្ទឹមនេះសម្រាប់​នៅ​កម្ពុជាខាង​កម្មសិទ្ធិបញ្ញា​ក៏​ប្រឹងប្រែង​ស្រាវជ្រាវ​រក​ប្រភពដើម្បី​សុំ​ណែនាំ​ដោយផ្ទាល់ថា​ប្រភព​ណា​ជា​អ្នក​ផលិត​ដើម្បីធ្វើ​ម៉េច​ណែនាំ​ឲ្យ​ក្រុមហ៊ុន​បញ្ឈប់​ផលិត​ប្រើប្រាស់​ស្រោម​សម្បកប្រើប្រាស់​រំលោភបំពាន​អត្តសញ្ញាណ​ជាតិ និង​ ប្រើប្រាស់​រូប​សញ្ញា​ជាតិ​ដែល​មិន​សមរម្យ​ទៅលើ​ទំនិញ​នានា ដោយសារ​គាត់​ធ្វើឡើង​ដោយ​គ្មាន​ការអនុញ្ញាត​ពី​យើង​ដែលជា​ម្ចាស់​ប្រទេស។​

ដោយឡែកអ្នកនាំពាក្យក្រសួងវប្បធម៌និងវិចិត្រសិល្បៈក៏បានលើកឡើងស្រដៀងគ្នានេះដែរថា៖ក្រសួងវប្បធម៌និងវិចិត្រសិល្បៈកំពុងស្រាវជ្រាវរកក្រុមហ៊ុនបរទេសមួយដែល ផលិតគុយទាវមួយប្រភេទដាក់រូបអង្គរវត្តសម្រាប់លក់នៅទីផ្សារអន្តរជាតិ។

លោក ឡុង ប៉ុណ្ណាសិរីវត្ថ អ្នកនាំពាក្យក្រសួងវប្បធម៌និងវិចិត្រសិល្បៈបានបញ្ជាក់ថា៖ ប្រាសាទនៅស្រុកខ្មែរជួនកាលគេយកដាក់ជាផលិតផលវត្ថុអនុស្សាវរីយ៍ដូចជា Eiffel Tower គឺយើងអត់អាចទៅចាប់គេបានទេពីព្រោះគេលើកតម្កើងវប្បធ៌មរបស់យើង។

ប៉ុន្តែបើយើងនិយាយពីផ្នែកពាណិជ្ជកម្មគឺខុសហើយយកផលិតផលមួយ ដែលជាអត្តសញ្ញាណនៃប្រទេសមួយទៅប្រើធ្វើជាផលិតផលរបស់ខ្លួន ។ នៅក្នុងអនុសញ្ញាទីក្រុងបារីសគឺវាខុសគឺយើងមានសិទ្ធិប្តឹង ។

​សូម​រម្លឹកថាពាក់ព័ន្ធ​ការ​ក្លែងបន្លំ​ដូចគ្នា​ខាងលើនេះកាលពី​ខែកក្កដា​កន្លងទៅរាជរដ្ឋាភិបាល​កម្ពុជា​តាម​រយៈ​ស្ថាន​ឯកអគ្គរាជទូត​ប្រចាំ​ប្រទេស​ឥណ្ឌាបាន​ចាត់វិធានការ​ទៅលើ​ក្រុមហ៊ុន​អង្ករ​ឥណ្ឌាឈ្មោះ Voyage India ឱ្យ​បញ្ឈប់​ការប្រើប្រាស់​ឈ្មោះនិង​រូប​ប្រាសាទអង្គរវត្តនៅលើ​សម្បក​វេច​ខ្ចប់អង្ករ​របស់ខ្លួនដែល​បាន​ប្រើ​ឈ្មោះAng kor Wat Thai Hom Mali Jasmin Rice ដោយ​ពុំមាន​ការអនុញ្ញាត​ពី​អាជ្ញាធរ​កម្ពុជាដែល​ទង្វើ​នោះ​កម្ពុជា​ចាត់ទុកថាប្រាសចាក​នឹង​ច្បាប់​ស្តីពី​ម៉ាក​ពាណិជ្ជ​នាមនិង​អំពើ​នៃ​ការប្រកួតប្រជែង​មិន​ស្មោះត្រង់ ព្រមទាំង​រំលោភ​លើ​អនុសញ្ញា​ទីក្រុង​ប៉ារីស​ស្តីពី​កិច្ចការពារ​កម្មសិទ្ធិ​ឧស្សាហកម្ម​៕​

អត្ថបទៈ ណារី