ព័ត៌មានជាតិ

តំបន់ប្រាសាទចំនួន២ កំពុងរៀបចំការពិនិត្យឡើងវិញ និងដោះមីន

បានផុស

៥ years មុន

នៅ

ថ្ងៃអង្គារ ៣១ សីហា ២០២១

ដោយ

អាជ្ញាធរជាតិបាន និងកំពុងរៀបចំដោះមីននៅតំបន់ប្រាសាទចំនួន២ ក្នុងទឹកដីខេត្តព្រះវិហារ ដែលមានសន្សល់នូវគ្រាប់មិនទាន់ផ្ទុះ កាលពីសម័យសង្គ្រាម។ តំបន់ប្រាសាទចំនួន២នោះ គឺប្រាសាទព្រះវិហារ និងតំបន់ប្រាសាទកោះកេរ ដែលកម្ពុជាបានស្នើដាក់ទៅជាសម្បត្តិបេតិភណ្ឌពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ ពុទ្ធិការ អគ្គនាយក នៃអាជ្ញាធរជាតិព្រះវិហារ បានថ្លែងប្រាប់ “កម្ពុជាថ្មី” ថា មកដល់ពេលនេះ នៅតំបន់ប្រាសាទកោះកេរ មិនទាន់ដោះមីនអស់ទេ បើតាមផែនទីរបស់ស៊ីម៉ាក់ (CMAC) គឺនៅសល់ផ្ទៃដីមួយចំនួនតួចប៉ុណ្ណោះ ដែលត្រូវធ្វើការដោះមីនបន្ថែមទៀត និងបង្ហើយ ហើយតំបន់នេះ ស៊ីម៉ាក់ក៏ធ្លាប់ដោះច្រើនដងមកហើយ ប៉ុន្តែមិនទាន់អស់ ដែលត្រូវពិនិត្យឡើងវិញ។

ចំណែកនៅប្រាសាទព្រះវិហារ ក៏បានដោះច្រើនលើកដែរ ប៉ុន្តែក្រោយពីមានបញ្ហាជម្លោះប្រដាប់អាវុធជាមួយថៃ កាលពីឆ្នាំ២០០៨ ចាំបាច់ត្រូវតែពិនិត្យឡើងវិញ ដើម្បីកុំឱ្យមានបញ្ហាគ្រោះថ្នាក់ណាមួយដល់អ្នកគ្រប់គ្រង ក៏ដូចជាប្រជាពលរដ្ឋ និងភ្ញៀវទេសចរ។

សូមបញ្ជាក់ថា កាលពីថ្ងៃសុក្រ ទី២៧ ខែសីហា ឆ្នាំ២០២១ អាជ្ញាធរជាតិព្រះវិហារបានរៀបចំកិច្ចប្រជុំមួយ ស្តីពីការងារបោសសម្អាតមីនក្នុងរមណីយដ្ឋានប្រាសាទព្រះវិហារ និងកោះកេរ ដឹកនាំ ដោយមានការចូលរួមពី ប្រធាននាយកដ្ឋាន អនុប្រធាននាយកដ្ឋាន មន្ត្រី តំណាងអង្គភាព CMAC និងអ្នកពាក់ព័ន្ធយ៉ាងច្រើន ហើយកិច្ចប្រជុំបានលើកឡើងពី ការប្រើប្រាស់ទីតាំងបង្ហាញ ដែលមានការឯកភាពគ្នា នីតិវិធីនៃការស្នើសុំការបោសសម្អាតមីន និងនីតិវិធីសហការគ្នារវាង CMAC និងអាជ្ញាធរជាតិព្រះវិហារ។

លោក គង់ ពុទ្ធិការ បានបញ្ជាក់ដែរថា កិច្ចប្រជុំនេះ បានកំណត់ចំណុចអាទិភាពជាមុនសិន ដោយសារតែផ្ទៃដីនៅប្រាសាទព្រះវិហារមានទំហំធំ ប្រមាណ២០,០០០ហិកតា ដូច្នេះត្រូវតែពិនិត្យចំណុចអាទិភាព និងលើកជាផែនការសកម្មភាពជាមួយស៊ីម៉ាក់ជាមុនសិន៕

អត្ថបទ៖ កោះកែវ