ព័ត៌មានជាតិ

អគ្គនាយក UNESCO នឹងធ្វើដំណើរមកកម្ពុជាចុងឆ្នាំនេះ ខណៈកម្ពុជាអំពាវនាវឱ្យបញ្ចេញសំឡេងឱ្យកាន់តែខ្លាំងពីបញ្ហាព្រះវិហារ

បានផុស

៣ ខែ មុន

នៅ

ថ្ងៃអាទិត្យ ១២ មេសា ២០២៦

ដោយ

អគ្គនាយកអង្គការ UNESCO លោក Khaled El-Enany ថាលោកនឹងធ្វើដំណើរមកកម្ពុជាក្នុងឆ្នាំនេះ ដើម្បីអបអរខួប៧៥ឆ្នាំនៃការចូលជាសមាជិក UNESCO របស់កម្ពុជា និងចូលរួមកិច្ចប្រជុំកំពូលហ្វ្រង់កូហ្វូនីលើកទី២០ ផងដែរ។ នេះបើតាមលទ្ធផលនៃជំនួបរវាងរដ្ឋមន្ត្រីការបរទេសកម្ពុជាលោកឧបនាយករដ្ឋមន្ត្រី ប្រាក់ សុខុន និងលោក Khaled El-Enny កាលពីថ្ងៃទី៩ ខែមេសា ឆ្នាំ២០២៦ នៅទីស្នាក់ការអង្គការយូណេស្គូ ទីក្រុងប៉ារីស ប្រទេសបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបនោះលោក Khaled បានជម្រាបលោកឧបនាយករដ្ឋមន្ត្រី ប្រាក់ សុខុន ថាលោកទើបតែជួបអ្នកជំនាញវាយតម្លៃលើការខូចខាត និងការត្រៀមផ្ដល់ជំនួយសង្គ្រោះបន្ទាន់ដល់ប្រាសាទព្រះវិហារ ខណៈអង្គការនេះនឹងផ្ដល់ជំនួយថវិការបន្ទាប់មួយចំនួនដើម្បីគាំទ្រដល់ការអភិរក្ស និងសហការជាមួយសម្ព័ន្ធអន្តរជាតិសម្រាប់ការការពារបេតិកភណ្ឌលើបញ្ហានេះផងដែរ។

យ៉ាងណាក្ដីរដ្ឋមន្ត្រីការបរទេសកម្ពុជាលោកឧបនាយករដ្ឋមន្ត្រី ប្រាក់ សុខុន បានអំពាវនាវឱ្យអង្គការយូណេស្គូបញ្ចេញសំឡេងកាន់តែខ្លាំងជាងមុនក្នុងការទប់ស្កាត់ការវាយប្រហារបន្ថែមទៀតលើតំបន់បេតិកភណ្ឌពិភពលោក ខណៈលោកបានជម្រាបលោក Khaled ថាថៃបានទម្លាក់គ្រាប់បែក និងការបាញ់អាវុធធុនធ្ងន់មកលើប្រាសាទព្រះវិហារ និងតំបន់ជុំវិញ។

លោកបានបញ្ជាក់ថា កម្ពុជាពុំបានប្រើប្រាស់ប្រាសាទព្រះវិហារក្នុងគោលបំណងយោធាទេ ប៉ុន្ដែពិតជាមានមន្ត្រីសន្ដិសុខខ្លះៗ សម្រាប់ការពារប្រាសាទដែលជាផ្នែកមួយនៃការទទួលខុសត្រូវរបស់កម្ពុជា។

លោក Khaled បានបញ្ជាក់ថាលោកនឹងមកទស្សនកិច្ចនៅកម្ពុជានៅចុងឆ្នាំ២០២៦នេះ។

ក្នុងសង្គ្រាមកម្ពុជា-ថៃ កាលពីចុងឆ្នាំ២០២៥ ទាហានថៃបានប្រើប្រាស់អាវុធធុនធ្ងន់ ការបាញ់ផ្លោងជាច្រើនគ្រាប់មកលើប្រាសាទព្រះវិហារកម្ពុជា។ តាមរយៈការវាយតម្លៃប៉ាន់ស្មានរបស់អាជ្ញាធរជាតិព្រះវិហារ ប្រាសាទរងការខូចខាតសរុបចំនួន៥៦២កន្លែង ខណៈការស្ដារឡើងវិញត្រូវចំណាយពេលពី៥ទៅ១០ឆ្នាំ ហើយត្រូវការពេលពី២០ទៅ៣០ឆ្នាំទៀតដើម្បីឱ្យប្រាសាទអាចឈររឹងមាំឡើងវិញ៕

អត្ថបទដោយ ហ៊ុន សិរីវឌ្ឍន៍