ជាង១ឆ្នាំ មានក្រុមហ៊ុន ជាង៧ ពាន់ បានចុះបញ្ជីអាជីវកម្ម តាមបច្ចេកវិទ្យាព័ត៌មាន និងមានទុនសរុប ជិត៣ពាន់ លានដុល្លារ

មន្ត្រីជាន់ខ្ពស់ ក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា គិតត្រឹមចុងខែសីហា ឆ្នាំ២០២១ ក្រុមហ៊ុនដែល​បាន​ចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន មានជាង៧ពាន់ក្រុមហ៊ុន និងមានដើមទុនសរុប ជិត៣ពាន់​លាន​ដុល្លារ។ ការឲ្យដឹងនេះ គ្រាដែលរាជរដ្ឋាភិបាលកម្ពុជា បានរៀបចំពិធីដាក់ដំណើរការជាផ្លូវការ ប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន ដំណាក់កាលទី២ នៅព្រឹកថ្ងៃទី១ ខែកញ្ញា ឆ្នាំ២០២១នេះ ក្រោមអធិបតីភាពលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។

លោកឧបនាយករដ្ឋមន្ត្រី អូន ព័ន្ធមុនីរ័ត្ន បានមានប្រសាសន៍ក្នុងពិធីនេះ ដោយបានរំលឹកថា រូបលោកធ្លាប់បាន​អញ្ជើ​ញ​ជាអធិបតី ក្នុងពិធីដាក់ដំណើរការជាផ្លូវការ ប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន ដំណាក់​កាលទី១ កាលពីថ្ងៃទី១៥ ខែមិថុនា ឆ្នាំ២០២០ ដែលមានការចូលរួមយ៉ាងច្រើនកុះករ ពីក្រសួង-ស្ថាប័ននានា វិស័យ​​ឯកជន និងដៃគូអភិវឌ្ឍន៍ ដោយពេលនោះយើងអាចមានលទ្ធភាព ជួបជុំគ្នាដោយផ្ទាល់បាន។

រដ្ឋមន្ត្រីក្រសួងសេដ្ឋកិច្ច បានថ្លែងបន្តថា ទោះបីការឆ្លងរីករាលដាល នៃជំងឺកូវីដ-១៩ ជាពិសេសព្រឹត្តិការណ៍ សហគ​មន៍​២០កុម្ភៈ នៅមិនទាន់បានបិទបញ្ចប់ និងមិនទាន់អនុញ្ញាតឲ្យយើងទាំងអស់គ្នា អាចជួបជុំគ្នាផ្ទាល់មុខដូចរាល់​ដង ក៏ជំងឺកាចសាហាវមួយនេះ មិនអាចបន្តុចបង្អាក់ ដល់ចង្វាក់ការងាររបស់យើងឡើយ។ ជាក់ស្ដែង ពិធីតាម​ប្រព័​ន្ធវីដេអូនាពេលនេះ បាននឹងកំពុងដំណើរការយ៉ាងរលូន ដែលអនុញ្ញាតឲ្យយើង អាចជួបជុំគ្នាបានពីចង្ងាយ ដើម្បី​ចូលរួមផ្សព្វផ្សាយ និងយល់ដឹងពីប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន ដំណាក់កាលទី២ ដែល​នឹងត្រូវដាក់ឲ្យដំណើរការ ចាប់ពីថ្ងៃនេះតទៅ។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន បានលើកឡើងថា ស្របពេលដែលរាជរដ្ឋាភិបាល បាននឹងកំពុង​ខិត​ខំ​ប្រឹងប្រែងឥតឈប់ឈរ ក្នុងស្មារតីបុរេសកម្ម និងម៉ឺងម៉ាត់ ក្នុងការប្រយុទ្ធប្រឆាំង នឹងជំងឺកូវីដ-១៩ ការងារនៃការ​ដ្ឋានកែទម្រង់ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិត និងប្រកបដោយស្មារតីបុរេសកម្ម របស់​សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា មិនបានបន្ថយល្បឿនរបស់ខ្លួននោះឡើយ។ ជាក់ស្ដែង ការដាក់ដំណើរការជាផ្លូវការ ប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន ដំណាក់កាលទី២ នៅថ្ងៃនេះ បង្ហាញ​យ៉ាង​ច្បាស់ថា ការដ្ឋាន នៃការងារកែទម្រង់ ដើម្បីលើកស្ទួយបរិយាកាសធុរកិច្ច និងវិនិយោគនៅកម្ពុជា បានសម្រេច​នូវលទ្ធផលតាមការគ្រោងទុក។

តាមលោកឧបនាយករដ្ឋមន្ត្រី អូន ព័ន្ធមុនីរ័ត្ន ប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន ដំណាក់កាលទី២ បានឆ្លើយតបយ៉ាងលឿន ក្នុងចូលរួមអនុវត្តនូវក្របខណ្ឌគោលនយោបាយនេះ ដើម្បីទាញយកប្រយោជន៍ ពី​បច្ចេក​វិទ្យាឌីជីថល ជាពិសេសក្នុងបរិបទ នៃការរីករាលដាលជំងឺកូវីដ-១៩ ដែលតម្រូវឲ្យយើងត្រូវកាត់បន្ថយ ការ​ជួប​គ្នាផ្ទាល់ជាអតិបរមា ខណៈដែលយើងនូវតែខិតខំធានា ឲ្យនិរន្តភាពនៃការងារ នៅបន្តប្រក្រតី។ លោកថា រាជ​រដ្ឋាភិបាល បានប្រកាសដាក់ដំណើរការជាផ្លូវការ នូវប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន ដំណាក់​កាលទី១ កាលពីខែមិថុនា ឆ្នាំ​២០២០កន្លងទៅនេះ ដោយទទួលបានការចាប់អារម្មណ៍ នឹងការសាទរខ្ពស់ ពីវិ​ស័​យឯកជន។

ប្រព័ន្ធនេះ ក៏បានចូលរួមចំណែកយ៉ាងសំខាន់ ដល់ការរក្សានិរន្តភាព សកម្មភាពសេដ្ឋកិច្ច ​ក្នុងបរិការណ៍ នៃ វិបត្តិជំងឺ​កូវីដ-១៩។ ជាក់ស្ដែងនៅក្នុងអំឡុងពេល នៃការបិទខ្ទប់ភូមិសាស្រ្ដរាជធានីភ្នំពេញ និងក្រុងតាខ្មៅ នៃខេត្តកណ្ដាល គឺមន្ត្រី បុគ្គលិក និយោជិត ត្រូវបានអនុញ្ញាតឲ្យធ្វើការងារពីផ្ទះ ហើយការធ្វើដំណើររបស់ប្រជា ជន ក៏ត្រូវបានរឹត​ត្បិត​ផងដែរ។ ប៉ុន្តែ ដោយសារប្រព័ន្ធខាងលើនេះ ត្រូវបានរៀបចំឡើង មានលក្ខណៈអន ឡាញទាំងស្រុង ហើយយន្ត​កា​រគាំទ្រ ក៏ធ្វើឡើងតាមអនឡាញផងដែរនោះ ធុរជននូវតែបន្តស្នើសុំ ការចុះបញ្ជីពីផ្ទះបាន ស្របពេលដែលយន្ត​កា​រគាំទ្រ និងត្រួតពិនិត្យសំណើ ដោយមន្ត្រីរាជរដ្ឋាភិបាល ក៏នៅតែបន្តបាន ដូចប្រក្រតី។ ការណ៍នេះ គូសរំលេច​បន្ថែម នូវសារៈសំខាន់ និងភាពចាំបាច់ នៃការប្រើប្រាស់ប្រព័ន្ធ ឌីជីថល សម្រាប់គាំទ្រដល់ការផ្ដល់សេវាសាធារណៈ ជាពិសេសក្នុងបរិបទ នៃជំងឺកូវីដ-១៩។

រដ្ឋមន្ត្រីក្រសួងសេដ្ឋកិច្ច បានបញ្ជាក់ថា «ក្នុងរយៈពេលជាង១ឆ្នាំកន្លងមក ប្រព័ន្ធចុះបញ្ជីអាជីវកម្ម បានដំណើរ​ការ​ឥត​ដាច់ និងបានអនុញ្ញាតឲ្យធុរជន អាចធ្វើការស្នើសុំការចុះបញ្ជីអាជីវកម្ម គ្រប់ពេលវេលា និងទីកន្លែង ហើយគិត​ត្រឹម​ថ្ងៃទី២៤ ខែសីហា ឆ្នាំ២០២១ ក្រុមហ៊ុន ដែលបានចុះបញ្ជីអាជីវកម្ម តាមថ្នាលបច្ចេក វិទ្យាព័ត៌មាននេះ មាន​ចំនួន​សរុបដល់ទៅ ៧,៧១៥ក្រុមហ៊ុន និងមានដើមទុនសរុប ស្មើនឹងជិត៣០០០លានដុល្លារ អាមេរិក»។

ក្នុងចំណោមក្រុមហ៊ុនទាំងនោះ មានវិស័យ៥ មានទំហំដើមទុនច្រើនជាងគេ រួមមាន៖ ទី១. វិស័យសំណង់ មាន​ចំនួន ២៥.៣២ភាគយរ។ ទី២. វិស័យអាហរ័ណ-នីហរ័ណ ទិញ-លក់ ជួលជុលយានយន្ត និងទោចក្រ យាន​យន្ត មានចំនួនគ្រប់ប្រភេទ មានចំនួន១៦.៤៤ភាគរយ។ ទី៣. វិស័យអចលនទ្រព្យ មានចំនួន១៥.៥៣ ភាគរយ។ ទី៤. វិស័យកម្មន្តសាល មានចំនួន១៤.៣ភាគរយ។ និងទី៥. វិស័យហិរញ្ញវត្ថុ និងធានារ៉ាប់រង មានចំនួន៨.២២ភាគរយ​។ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋ កិច្ច និងហិរញ្ញវត្ថុ សង្ឃឹមថា គ្រប់ភាគីពាក់ព័ន្ធ ជាពិសេសវិស័យឯកជន នឹងជួយគាំទ្រប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន ដំណាក់កាលទី២ នេះបន្តទៀតផងដែរ៕

អត្ថបទ៖ ឃួន សុភ័ក្រ