កីឡា

ការទន្ទឹងរង់ចាំមកដល់! ៦គូ តេជោលីគ ជុំទី២ ចុងសប្តាហ៍នឹងកាន់តែកក្រើក

បានផុស

៣៦ វិនាទី មុន

នៅ

ថ្ងៃព្រហស្បតិ៍ ១៨ មិថុនា ២០២៦

ដោយ

ការប្រកួតលីគបាល់ទះកំពូលកម្ពុជា ហៅកាត់«តេជោលីគ» ជុំទី២ សប្តាហ៍ទី១ នឹងចាប់ផ្តើមនៅថ្ងៃទី១៩ ខែមិថុនា ឆ្នាំ ២០២៦ នៅវិមានពហុកីឡដ្ឋានជាតិអូឡាំពិក ដែលនឹងកាន់តែកក្រើក និងគួរឲ្យចាប់អារម្មណ៍ខ្លាំងជាងមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយចប់ការប្រកួតជុំទី១ តាំងពីដើមខែមិថុនា ក្រុមទាំង ៦ សុទ្ធតែបានរកឃើញពីចំណុចខ្វះខាតរបស់ខ្លួន និងបំពេញចន្លោះប្រហោងដើម្បីពង្រឹងក្រុមឈានឆ្ពោះទៅការដណ្តើមជើងឯកតេជោលីគរដូវកាលទី៣នេះ។

ក្រុម ៣ ដែលគួរឲ្យចាប់អារម្មណ៍បំផុតគឺបញ្ជាការដ្ឋានអង្គរក្ស វិសាខា និងស្នងការខេត្តស្វាយរៀង ខណៈក្រុមផ្សេងទៀតគឺ ក្រសួងមហាផ្ទៃ ស្នងការរាជធានីភ្នំពេញ និងស្នងការខេត្តកោះកុងកោះទំនងជាមិនមានការផ្លាស់ប្តូរច្រើនទេ។

ក្រុម បញ្ជាការដ្ឋានអង្គរក្ស បានបង្ហាញភាពខ្លាំងគ្មានគូប្រៀបរួចទៅហើយកាលពីជុំទី១ តាមរយៈកីឡាករឥណ្ឌូណេស៊ី ៣ នាក់គឺ Luvi, Aveng និង Fahrit ប៉ុន្តែពួកគេមិនឈប់ត្រឹមនេះឡើយ។ ពួកគេនាំចូលស្មាត់អតីតជម្រើសជាតិឥណ្ឌូណេស៊ី Dimas Saputra និងមានដំណឹងថា អាចយកកីឡាករឥណ្ឌូណេស៊ី ១នាក់ ឬ ២នាក់ទៀត។

វិសាខា បានបញ្ចេញកីឡាករបរទេស ៣ នាក់ ដោយរក្សាទុកតែអ្នកប៉ះសេហ្វីលីពីន Retamar ម្នាក់គត់។ សម្រាប់ការត្រៀមជុំទី២ ពួកគេ នាំចូលស្មាត់ស្តាំជម្រើសជាតិកម្ពុជា វឿន វាសនា នាំចូលស្មាត់ឆ្វេងមកពីអាមេរិក Kevin Kobrine កម្ពស់ ១.៩៦ ម៉ែត្រ និងកីឡាករការពារកណ្តាលមកពីប្រេស៊ីល Michelucci Moralez។ ឮមកថា វិសាខា អាចនឹងនាំចូលកីឡាករបរទេសបន្ថែមទៀត។

ងាកទៅក្រុម ស្នងការខេត្តស្វាយរៀង វិញក៏មិនធម្មតាដែរ។ កាលពីជុំទី១ ពួកគេមានកីឡាករឥណ្ឌា Praful កម្ពស់ ២.០៤ ម៉ែត្រ និងកីឡាករអាមេរិក Jalen Penrose កម្ពស់ ២.០៣ ម៉ែត្រ ហើយនៅជុំទី២ ពួកគេបាននាំចូលកីឡាករតួកគី Marouen Bel Hadj Salah កម្ពស់ ២.០២ ម៉ែត្រទៀត។ បើពួកគេហ្វឹកហាត់បានដិតដល់ជាមួយអ្នកប៉ះសេ សួន ចាន់ណារ៉ូ គឺរឹតតែល្អ។