ព័ត៌មានជាតិ

ថ្ងៃចុងបញ្ចប់នៃពិធីបុណ្យភ្ជុំបិណ្ឌ បុរសម្នាក់ លើកធុងបាសទាក់ខ្សែភ្លើងឆក់ប្រកាច់ស្ដូកស្ដឹងស្លាប់ភ្លាមៗ

បានផុស

៤ years មុន

នៅ

ថ្ងៃសុក្រ ៨ តុលា ២០២១

ដោយ

បាត់ដំបង ៖ យុវជនម្នាក់ បានលើកធុងបាសដើម្បីចាក់ស្តាប់កម្សាន្ត ក្នុងគ្រួសារស្រាប់តែ ទាក់នឹងខ្សែភ្លើងឆក់ស្លាប់ភ្លាមៗ នេះបើតាមសំដីរបស់យុវជនជាអ្នកជិតខាងរាប់អានជិតស្និទ្ធបានរៀបរាប់ប្រាប់។

អ្នកជិតខាងដដែលបានបន្តថា មុនកើតហេតុយុវជនរងគ្រោះបានដើរលេងបន្តិចបន្តួចជាមួយគ្នានៅថ្ងៃចុងក្រោយនៃពិធីបុណ្យភ្ជុំបិណ្ឌក្រោយត្រឡប់មកផ្ទះវិញ ជនរងគ្រោះបានលើកធុងបាសដើម្បីចាក់ស្តាប់កម្សាន្តក្នុងក្រុមគ្រួសារនៅវេលាម៉ោង៧យប់ ថ្ងៃទី០៧តុលានៅនឹងផ្ទះរបស់ខ្លួនស្ថិតក្នុងភូមិក្រាំងស្វាត ឃុំឆ្នាល់មាន់ ស្រុកគាស់ក្រឡ ក៏ស្រាប់តែជួបនិងគ្រោះថ្នាក់ដល់ជីវិតតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប៉ាង ហៀង អធិការស្រុកគាស់ក្រឡបានឲ្យដឹងថា គ្រោះថ្នាក់ខាងលើនេះ បានកើតឡើងទៅលើយុវជនរងគ្រោះឈ្មោះចាន់ ភាព អាយុ២០ឆ្នាំ រស់នៅចំណុចកើតហេតុខាងលើ។ លោកបន្តថាហេតុការណ៍នេះ បានកើតឡើង ខណៈដែលយុវជនចាន់ ភាព ខ្វះការប្រុងប្រយ័ត្នលើកធុងបាសបម្រុងចាក់ស្ដាប់ស្របជាមួយធុងបាសជាប់ខ្សែហ្វ្រីភ្លើងផង ក៏ទាក់ជើងបណ្ដាលឲ្យឆក់ស្លាប់តែម្ដង។

អ្នកស្រីជៀម ពូក ជាម្តាយបង្កើតជនរងគ្រោះបានប្រាប់សមត្ថកិច្ចថា កូនប្រុសគាត់បានលើកធុងបាសចេញពីផ្ទះបាយ ដើម្បីចាក់ស្តាប់ក្នុងគ្រួសារ ហើយធុងបាសនោះមានឌុយភ្លើងដោតជាប់ហ្វ្រីភ្លើងជាស្រេចពេលលើកចេញមកក៏ទាក់ជើង ទាក់ជើងស្របពេលហ្វ្រីដោតភ្លើងមិនមានគម្របផងទើបបណ្ដាលឲ្យឆក់ប្រកាច់ស្ដូកស្ដឹងភ្លាមៗតែម្ដង។

គាត់បានបន្តថា ពេលកើតហេតុភ្លាមៗគាត់និងក្រុមគ្រួសារបានព្យាយាមដឹកកូនតាមគោយន្តកន្ត្រៃទៅកាន់មណ្ឌលសុខភាព តែគ្រួពេទ្យប្រាប់ថា ជនរងគ្រោះបានស្លាប់ហើយរួចហើយរួចក៏ដឹកត្រឡប់មកផ្ទះវិញតែម្ដងរៀបចំធ្វើបុណ្យតាមប្រពៃណី៕

ដោយ ៖ សៅ សារិទ្ធ