ផ្សិតរងារ មួយឆ្នាំមានម្ដង ​ប្រជាពលរដ្ឋ​និយមចូលចិត្ត​ អាជីវករ​សឹងតែ​រកលក់​មិនបាន​

ផ្សិតរងារជាបន្លែធម្មជាតិ ជាបន្លែព្រៃគ្មានជាតិគីមី ដែលអ្នកស្ទឹងត្រែងនិយមចូលចិត្ត ក្នុងមួយឆ្នាំមាន​ម្តង ត្រូវបានអ្នកស្រែចម្ការ នៅ ស្រុកថាឡាបរិវ៉ាត់ នាំគ្នាដើរចូលព្រៃបេះយកមកលក់នៅ ទីផ្សារដើម្បីបានកម្រៃខ្លះ ក្នុងការដោះស្រាយជីវភាពប្រចាំថ្ងៃ។

លោក ស៊ី សុខា ប្រជាពលរដ្ឋនៅ ភូមិ ឃុំចំការលើ ស្រុកថាឡាបរិវ៉ាត់បានបញ្ជាក់ថា ផ្សិតរងារ ជាផល​អនុផលព្រៃឈើមួយផ្នែក ដែលដុសចេញរុក្ខជាតិព្រៃ ក្នុងមួយឆ្នាំមានតែម្ដង ត្រូវបានអ្នកភូមិ​នាំគ្នា​ចូល​ព្រៃដើរបេះមកលក់ ក្នុងមួយថ្ងៃ ពួកគាត់អាចបេះបានចាប់ពី៥ទៅ ១០ គីឡូក្រាមក្នុងមួយថ្ងៃ និងលក់បានក្នុង១គីឡូ ១៥.០០០រៀល ទៅ ២០.០០០ ម៉ឺនរៀល។

លោកស្រីបានបន្តថា ការដើររកបេះផ្សិតនេះ វាជួបការលំបាកច្រើន ពិសេសគឺពិនិត្យទៅ លើ​ដើម​ឈើ​ដែលវាត្រូវដុះ មិនបេះយកមកផ្តេសផ្តាស់នោះទេ ដើម្បីការពារដល់សុខភាព អ្នកបរិភោគ​ព្រោះផ្សិតរងារនេះភាគច្រើនវា ដុះតែលើដើម ចាម៉ាស-ដើមពពេល-ឬដើមផ្ចឹកតែប៉ុណ្ណោះ។

លោកស្រី ឡៃ ស៊ន អ្នកទទួលទិញលក់បន្លែគ្រប់មុខនៅ ផ្សារស្ទឹងត្រែងបាននិយាយថា ផ្សិតនេះ​ជាអាហារមួយ​ផ្នែក មានរស់ជាតិឆ្ងាញ់ ហើយក្នុងមួយឆ្នាំបានបរិភោគតែម្តង ស្រួលចំណាំ​ទិញទៅ​ បរិភោគ ព្រោះផ្សិតរងារនេះវាអត់ពុលទេ ហើយ រស់ជាតិឆ្ងាញ់ពីធម្មជាតិតែម្តង។

លោកស្រីបានបញ្ជាក់បន្ថែមថា ផ្សិតរងារប្រជាពលរដ្ឋខេត្តស្ទឹងត្រែងនិយមចូលចិត្តចាត់ទុកជា បន្លែធម្មជាតិដ៍កម្រ ព្រោះក្នុងមួយឆ្នាំមានតែម្តងទេ គឺនៅ ក្នុងរដូវខែរងារ ឲ្យតែដល់រដូវហើយ អ្នកខេត្តស្ទឹងត្រែង និយមបរិភោគគ្រប់ៗគ្នា។ 

លោកស្រីបន្ថែមថា បន្លែធម្មជាតិនេះយើងកម្របានបរិភោគណាស់មួយឆ្នាំមានតែម្ដង  ហើយប្រជាពលរដ្ឋតែងតែនាំគ្នាទិញទៅ ធ្វើម្ហូបតាមបែបផ្សេងៗគ្នា ដូចជាចំហុយត្រី-សម្លម្សៅ -ប្រហើរ ឬឆាជាមួយសាច់គោនិង សាច់ជ្រូកជាដើម។

សូមបញ្ជាក់ថា ផ្សិតធម្មជាតិមានច្រើនប្រភេទដូចជា -ផ្សិតទន្សោង-ផ្សិតក្ងោក ផ្សិតកញ្ចូ-ផ្សិតប៉ក់-ផ្សិតតុកកែ-ផ្សិតត្រចៀកកណ្តុរ-និងផ្សិតរងារនេះ៕

អត្ថបទ៖ ងិនលីម