ពេលនេះដឹងច្បាស់ហើយ តើការកែកិច្ចការប្រឡងបាក់ឌុប នឹងធ្វើនៅ ភ្នំពេញ ឬខេត្តតាមការស្នើ?

​ថ្មី​ៗ​នេះ​ មានគ្រូបង្រៀន​មួយ​ចំនួន​បាន​ស្នើ​សុំ​សម្តេច​តេ​ជោ ហ៊ុន សែន នាយក​រដ្ឋមន្ត្រី​កម្ពុជា អនុញ្ញាត​ឱ្យ​គ្រូ​ៗ​នៅ​ តាម​បណ្តា​ខេត្ត​ កែ​កិច្ចការ​បេក្ខជន​ប្រឡង​បាក់​ឌុ​ប នៅ ​តាម​ខេត្ត​រៀង​ៗ​ខ្លួន។ ក្រោយមក សម្តេច​តេ​ជោ ហ៊ុន សែន បាន​ឆ្លើយ​តបថា គប្បី​អនុវត្ត​តាម​ការ​រៀបចំ​របស់​ក្រសួង​អប់រំ​ ទើប​ជា​ការ​ប្រសើរ។

ទាក់ទងករណីនេះ លោក ​រស់ សុ​វាចា អ្នកនាំពាក្យ​ ក្រសួង​អប់រំ ​យុវជន និង​កីឡា បាន​មានប្រសាសន៍ប្រាប់ “កម្ពុជាថ្មី” នៅ រសៀល​ថ្ងៃ​ទី​ ១៥ ខែធ្នូ ឆ្នាំ​ ២០២១ នេះ​ថា ចំពោះការកែកិច្ចការបេក្ខជនប្រឡងសញ្ញាបត្រទុតិយភូមិ សម័យប្រឡង ថ្ងៃទី ២៧ ខែធ្នូ ឆ្នាំ ២០២១ នេះ នឹងរក្សា និងអនុវត្តទៅ តាមនីតិវិធី និងបទបញ្ញត្តិរបស់ក្រសួង ដែលមានជាធរមាន ដោយមិនមានការកែប្រែឱ្យកែនៅ តាមបណ្ដាខេត្តវិញនោះឡើយ។

លោក រស់ សុវាចា បានបញ្ជាក់បន្ថែមថា ដំណើការកំណែនឹងប្រព្រឹត្តទៅ ចាប់ពីថ្ងៃទី ៣០ ខែធ្នូ ឆ្នាំ ២០២១ ដល់ថ្ងៃទី ៥ ខែមករា ឆ្នាំ ២០២២។

អ្នកនាំពាក្យ​ ក្រសួង​អប់រំ ​យុវជន និង​កីឡា រូបនេះ បានបង្ហាញថា មណ្ឌលកំណែសម្រាប់ការប្រឡងសញ្ញាបត្រមធ្យមសិក្សាទុតិយភូមិនេះ មានចំនួន ១០ មណ្ឌល ត្រូវបានប្រមូលផ្ដុំកែ នៅ រាជធានីភ្នំពេញតាមមណ្ឌលកំណែសម្រាប់មុខវិជ្ជានីមួយៗ។

១. មណ្ឌលកំណែ វិទ្យាល័យ ព្រះស៊ីសុវត្ថិ សម្រាប់មុខវិជ្ជា អក្សរសាស្ត្រខ្មែរ។

២. មណ្ឌលកំណែ វិទ្យាល័យ បាក់ទូក សម្រាប់មុខវិជ្ជា គណិតវិទ្យា។

៣. មណ្ឌលកំណែ អនុវិទ្យាល័យ ចតុមុខ សម្រាប់មុខវិជ្ជា ភាសាបរទេស។

៤. មណ្ឌលកំណែ វិទ្យាល័យ វត្តកោះ សម្រាប់មុខវិជ្ជា រូបវិទ្យា។

៥. មណ្ឌលកំណែ វិទ្យាល័យ ព្រះយុគន្ធរ សម្រាប់មុខវិជ្ជា ភូមិវិទ្យា។

៦. មណ្ឌលកំណែ វិទ្យាល័យ ទួលទំពូង សម្រាប់មុខវិជ្ជា ផែនដី និបរិស្ថានវិទ្យា។

៧. មណ្ឌលកំណែ វិទ្យាល័យ ជា ស៊ីម បឹងកេងកង សម្រាប់មុខវិជ្ជា គីមីវិទ្យា។

៨. មណ្ឌលកំណែ វិទ្យាល័យ ហ៊ុន សែន ប៊ុនរ៉ានី វត្តភ្នំ សម្រាប់មុខវិជ្ជា ប្រវត្តិវិទ្យា។

៩. មណ្ឌលកំណែ វិទ្យាល័យ ជា ស៊ីម សន្ធរម៉ុក សម្រាប់មុខវិជ្ជា សីលធម៌-ពលរដ្ឋវិជ្ជា។

១០. មណ្ឌលកំណែ វិទ្យាល័យ បឹងត្របែក សម្រាប់មុខវិជ្ជា ជីវវិទ្យា។

លោក រស់ សុវាចា បានបញ្ជាក់បន្ថែមទៀតថា ចំណែកការប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ នឹងធ្វើឡើងនៅ ថ្ងៃទី ១៨ ខែមករា ឆ្នាំ ២០២២ សម្រាប់មណ្ឌលប្រឡងរាជធានីភ្នំពេញ និងខេត្តកណ្ដាល និងនៅ ថ្ងៃទី ១៩ ខែមករា ឆ្នាំ ២០២២ សម្រាប់មណ្ឌលប្រឡងនៅ ខេត្តដទៃ។

គួរបញ្ជាក់ថា ក្រសួង​អប់រំ​បានកំណត់​យក​កាលបរិច្ឆេទ​នៃ​ការប្រឡង​នេះ​នៅ​ ថ្ងៃទី​ ២៧-២៨ ធ្នូ ២០២១ ដោយមានបេក្ខជនដាក់ពាក្យប្រឡងចំនួន ១១៥ ១៤៩ នាក់។ ក្នុងនោះបេក្ខនារី ៦០ ៦៨២ នាក់, បេក្ខជនស្វៃរិន ៤៣៣៤នាក់ (នារី ១៧៦២នាក់), បេក្ខជនបំពេញវិជ្ជា ៣ ៤៦១​នាក់ (នារី ១០៥៣នាក់), បេក្ខជនស្វៃរិន-បំពេញវិជ្ជា ២ ០៤៣នាក់ (នារី ៤៦៨នាក់) ចែកជា ២០៤ មណ្ឌល ស្មើនឹង ៤ ៦៥២ បន្ទប់។ ពិន្ទុ​ដើម្បី​ប្រឡង​ជាប់​គឺ ២៣៧ ពិន្ទុ នៃ​ពិន្ទុ​សរុប​ ៥០០ ​ពិន្ទុ​៕

អត្ថបទ៖ ច័ន្ទ វីរៈ