ជាប់​ត្រឹម​និទ្ទេស E ក៏​អស់ចិត្ត តែ​យុវតី​ប្រឡង​នៅ​មណ្ឌល​វិទ្យាល័យ​ទួល​ទំពូង សោក​ស្តាយ​ពេល​ដឹង​ដំណឹង​មិត្តភ័ក្ដិ​រួម​បន្ទប់ ៤ នាក់​បាន​ធ្លាក់​

បានត្រឹមជាប់និទ្ទេស E យុវតី ភា ស្រីខួច ដែលប្រឡងនៅមណ្ឌលវិទ្យាល័យទួលទំពូង ព្រមទទួលយកលទ្ធផលសម្រេច​នៃការប្រឡងបាក់ឌុបឆ្នាំ ២០២៥ ដោយអស់ចិត្ត ទោះបីឃើញមិត្តភ័ក្ដិរួមបន្ទប់ផ្សេងទៀតខ្លះបាននិទ្ទេស B និង C ខណៈដែលខ្លួនបាននិទ្ទេស E គឺបានត្រឹមតែមួយជាប់ក៏ដោយ។

ស្រីខួច បានប្រាប់កម្ពុជាថ្មីខណៈ​ចុះយកព័ត៌មាន​ពីការប្រកាសលទ្ធផលប្រឡងបាក់ឌុបនៅមណ្ឌលវិទ្យាល័យទួលទំពូងនៅព្រឹកនេះថា លទ្ធផលត្រឹមនិទ្ទេស E នេះ ក៏ជាមោទនភាពមួយដែលកើតចេញពីសមត្ថភាពនិងការខិតខំការសិក្សាជាច្រើនឆ្នាំ។ ជាមួយលទ្ធផល​បេក្ខជនប្រឡង​បាក់ឌុប​​ប្រកាស​ជា​បន្តបន្ទាប់ កញ្ញាក៏ចូលរួមសោកស្តាយក្រោយដឹងដំណឹងថាមានមិត្តភ័ក្ដិរួមបន្ទប់ប្រឡងជាមួយគ្នាចំនួន ៤ នាក់បានធ្លាក់ក្រោយការប្រកាសលទ្ធផលនៅព្រឹកនេះ។

ក្នុងអំឡុងការសិក្សា យុវតីវ័យ ១៨ ឆ្នាំរូបនេះ ទទួលស្គាល់ពីសមត្ថភាពសិក្សារបស់ខ្លួនកន្លងទៅនៅ​មានការ​ខ្វះខាតច្រើន។ យ៉ាងណាមិញ តាមរយៈលទ្ធផលសម្រេចបាននេះ ក៏ជាស្ពានតភ្ជាប់អាចឲ្យកញ្ញាបន្តក្តីស្រមៃក្នុងការចាប់ជំនាញសិក្សាបន្តទៀតនៅមហាវិទ្យាល័យ​៕