អាជ្ញាធរចាក់ផ្លូវកៅស៊ូជូនពលរដ្ឋភូមិកំពង់អាលីងខេត្តកំពង់ចាមដើម្បីសម្រួលដល់ការធ្វើដំណើរ និងប្រកបរបរប្រចាំថ្ងៃ

កំពង់ចាម៖ ពលរដ្ឋ ជាច្រើនគ្រួសារក្នុងសង្កាត់សំបួរមាស  ក្រុងកំពង់ចាម  និងស្រុកកំពង់សៀម  ខេត្តកំពង់ចាម ទទួលបានផ្លូវថ្មី  ក្រោយអាជ្ញាធរបានប្រែក្លាយផ្លូវពីដីហ៊ុយទៅផ្លូវកៅស៊ូជាង៦គីឡូម៉ែត្រ  នៅពេលឆាប់ៗនេះ  ដើម្បីសម្រួលការធ្វើដំណើររបស់ពលរដ្ឋប្រចាំថ្ងៃ។

ប្រជាពលរដ្ឋ ដែលរស់នៅតំបន់កំពង់អាលីង សង្កាត់សំបួរមាស  ក្រុងកំពង់ចាម  និងអ្នកស្រុកកំពង់សៀម  បានបង្ហាញក្តីសប្បាយរីករាយ  ក្រោយពីអាជ្ញាធរបានកសាងស្ថាបនាផ្លូវក្រាលកៅស៊ូឡើង  ដើម្បីសម្រួលការធ្វើដំណើរ និងការដឹកជញ្ជូនកសិផលរបស់ប្រជាកសិករ។ ពលរដ្ឋបានលើកឡើងថា  ពួកគាត់ពិតជាមិននឹកស្មានថា តំបន់ដែលធ្លាប់ស្ងប់ស្ងាត់  គ្មានមនុស្សរស់នៅពេលនេះមានភាពស៊ីវិល័យទៅតាមសម័យកាល  ខណៈបច្ចុប្បន្ន មានទាំងប្រព័ន្ធទឹកស្អាត  បណ្តាញភ្លើង ខ្វាត់ខ្វែង និងបន្ថែមការកសាងផ្លូវក្រាលកៅស៊ូមួយខ្សែនេះទៀត។  ពលរដ្ឋ បានថ្លែងអំណរគុណរាជរដ្ឋាភិបាលកម្ពុជា  ក្រោមការដឹកនាំរបស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ដ៏ឈ្លាសវៃ បានដឹកនាំប្រទេសឲ្យកាន់តែរីកចម្រើនជាបន្តបន្ទាប់ ។

សូមជម្រាបថា  ផ្លូវកៅស៊ូមួយខ្សែនេះ ជាប្រភេទDBSTប្រវែងជាង៦គីឡូ  ចាប់ពីភូមិបឹងបាសាក់  សង្កាត់សំបួរមាស  ក្រុមកំពង់ចាម រហូតដល់ភូមិអូរឈ្លើង  ឃុំកោះរការ  ស្រុកកំពង់សៀម។ ក្រោយជួសជុលរួច ផ្លូវនេះអាចសម្រួលជីវភាពពលរដ្ឋក្នុងតំបន់ និងអាចធ្វើឲ្យតម្លៃដីធ្លីនៅតំបន់នេះមានការហក់ឡើងជាបន្តបន្ទាប់ផងដែរ៕ អត្ដបទ និង រូបភាព៖ ហុង ម៉េងហៀ