រដ្ឋបាលខេត្តព្រៃវែងចំណាយថវិកាជិត ៤ម៉ឺនដុល្លារសាងសង់អគារផលិតអុកស៊ីស្សែន

ព្រៃវែង៖ លោក ជា សុមេធី អភិបាលខេត្តព្រៃវែង បានលើកឡើងនៅក្នុងកិច្ចប្រជុំសាមញ្ញលើកទី៣១ អាណត្តិទី៣ របស់ខេត្តព្រៃវែងថា រដ្ឋបាលខេត្តព្រៃវែង បានសាងសង់អាគារ សម្រាប់ផលិតអុកស៊ីស្សែន ដែលមានទំហំ 16 x18 រួចរាល់ហើយ ដោយបានចំណាយទឹកប្រាក់ផ្ទាល់របស់រដ្ឋបាលខេត្ត និងសប្បុរសជនអស់ចំនួន  ៣៧២០០ដុល្លារ និងបានបំពាក់នូវម៉ាស៊ីនផលិត ចំនួន៣ គ្រឿង។ លោកបន្តថា ម៉ាស៊ីនផលិតអុកស៊ីសែននេះ មានសមត្ថភាព ផលិតចែកចាយដល់ខេត្តត្បូងឃ្មុំ កំពង់ចាម និងខេត្តកណ្ដាលផងដែរ។

ជាមួយគ្នានេះ លោកអភិបាលខេត្ត បានប្រាប់ឲ្យមន្ទីរអភិវឌ្ឍន៍ជនបទ មន្ទីរសាធារណការ និងដឹកជញ្ជូន ត្រូវខិតខំលើកគម្រោងផែនការ រកថវិកា ក្នុងការស្ដារ និងកសាងផ្លូវ នៅតាម បណ្ដាស្រុក ក្រុង មួយចំនួនដែលជួបបញ្ហាការលំបាក ដើម្បីឲ្យប្រជាពលរដ្ឋធ្វើដំណើរ ក៏ដូចជាការដឹកកសិផលផ្សេងៗទៅកាន់ទីផ្សារឲ្យបានទាន់ពេលវេលា ជាពិសេសការកាត់បន្ថយការចំណាយទៅលើការធ្វើដំណើរ របស់ប្រជាពលរដ្ឋ៕ ដោយ៖ សៅគ្រី