បេក្ខជន​មាន​ពិន្ទុ​ចន្លោះ​ពី ​៤២៧ ​ដល់៥០០​ នឹង​ទទួល​បាន​និទ្ទេស ​A

ក្រសួងអប់រំ យុវជន និងកីឡា បានឱ្យដឹងថា បេក្ខជនប្រឡងជាប់បាក់ឌុបត្រូវមានពិន្ទុចាប់ពី ២៣៧ ឡើងទៅហើយបេក្ខជនដែលជាប់និទ្ទេស A ត្រូវមានពិន្ទុចន្លោះពី ៤២៧ដល់៥០០ពិន្ទុសរុប។

ក្រសួងអប់រំបានបន្តថា បេក្ខជនដែលប្រឡងបានពិន្ទុចំនួន ២៣៧ ពិន្ទុ គឺជាប់ហើយ។ ចំណែកបេក្ខជនដែលទទួលបានពិន្ទុចាប់ពី ២៣៧ ដល់២៨៥ ពិន្ទុទទួលបាន និទ្ទេស E ពិន្ទុចន្លោះពី ២៨៥ ដល់៣៣៣ទទួលបាន D ពិន្ទុចន្លោះ​ពី​៣៣៣ ដល់ ៣៨០ ទទួលបាន C ពិន្ទុចន្លោះពី៣៨០ដល់៤២៧ទទួលបាន B និងពិន្ទុចន្លោះពី៤២៧ដល់៥០០ទទួលបាននិទ្ទេសA។

របបពិន្ទុសរុបរបស់បេក្ខជន ៥០០ពិន្ទុ ប៉ុន្តែដោយសារមុខវិជ្ជាភាសាបរទេសជាវិញ្ញាសាតាមស្ម័គ្រដូច្នេះពិន្ទុដែលជាប់គឺ៥០០ ដល់ ២៥ រួចចែកនឹង ២ ស្មើនឹង២៣៧,៥យកត្រឹម២៣៧ពិន្ទុជាប់។

គួរបញ្ជាក់ថា ក្រសួងអប់រំយុវជន និងកីឡាចុះថ្ងៃទី ១៤ មករា នេះបានឱ្យដឹងថា ក្រសួងនឹងប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ នៅរសៀលថ្ងៃទី ១៤ ខែមករា ឆ្នាំ២០២២ និងនៅខេត្តដទៃទៀតនាព្រឹកថ្ងៃទី១៥ ខែមករា ឆ្នាំ ២០២២។

ជាមួយគ្នានេះដែរក្រសួងអប់រំ យុវជន និងកីឡា បានណែនាំដល់បេក្ខជនប្រឡងបាក់ឌុបមិនចាំបាច់មកតាមដានលទ្ធផលប្រឡងនៅតាមមណ្ឌលប្រឡងនីមួយៗ ព្រោះក្រសួងក៏បានផ្សព្វផ្សាយនៅលើ ហ្វេសប៊ុកផ្លូវការ របស់ក្រសួងផងដែរដើម្បីការពារការឆ្លងរាលដាលជំងឺកូវីដ១៩ពិសេសជំងឺកូវីដ១៩បម្លែងខ្លួនថ្មីអូមីក្រុង។

ប៉ុន្តែក៏បានណែនាំឱ្យមណ្ឌលប្រឡងនីមួយៗបិទផ្សាយលទ្ធផលប្រឡងទៅតាមវិធានការសុខាភិបាល និងហាមឃាត់មិនឱ្យនិស្សិត ឬសិស្សានុសិស្ស ដែលមិនពាក់ព័ន្ធនឹងការប្រឡង ចូលទៅកាន់ទីតាំងបិទផ្សាយលទ្ធផលប្រឡងជាដាច់​ខាតហើយណែនាំឱ្យចងខ្សែសញ្ញា ឬដាក់រនាំងខ័ណ្ឌព័ទ្ធជុំវិញទីតាំងបិទផ្សាយលទ្ធផលប្រឡង តាមលទ្ធភាព ដែលអាចធ្វើទៅបាន៕

អត្ថបទ៖ សំអឿន