Connect with us

ព័ត៌មានជាតិ

ពី​ប្រទេស​កម្ពុជា ! អាស៊ាន​ប្រកាស​បើក​ទេសចរណ៍​អាស៊ាន​ឡើងវិញ​ជា​ផ្លូវការ​ហើយ

បានផុស

នៅ

ក្រោយពី​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានប្រកាស​គាំទ្រ​គំនិត​ផ្ដួចផ្ដើម​បើក​ទេសចរណ៍​ផ្ទៃក្នុង​អាស៊ាន​ឡើងវិញ និង​គាំទ្រ​ឲ្យ​រដ្ឋមន្ត្រី​ទេសចរណ៍​អាស៊ាន​ប្រកាស​បើក​ទេសចរណ៍​អាស៊ាន​ឡើងវិញ​ចេញពី​ទីក្រុង​ព្រះសីហនុ ប្រទេស​កម្ពុជា​នោះ រដ្ឋមន្ត្រី និង​ថ្នាក់ដឹកនាំ​ទេសចរណ៍​អាស៊ាន រួម​នឹង​អគ្គលេខាធិការ​អាស៊ាន កាលពី​ល្ងាច​ថ្ងៃទី​១៩ ខែមករា ឆ្នាំ​២០២២ បានរួម​គ្នា​ប្រកាស​បើក​ទេសចរណ៍​អាស៊ាន​ឡើងវិញ​ជា​ផ្លូវការ​ហើយ នេះ​បើតាម​ការ​ឲ្យ​ដឹង​ពី​ក្រសួងទេសចរណ៍​នៅ​ថ្ងៃទី​២០ ខែមករា នេះ​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​បើតាម​ក្រសួងទេសចរណ៍ ការប្រកាស​បើក​ទេសចរណ៍​អាស៊ាន​ឡើងវិញ​នេះ មាន​ក្នុង​ចក្ខុវិស័យ​លើ​ការស្តារ​សេដ្ឋកិច្ច​-​សង្គម​អាស៊ាន​ឡើងវិញ ដោយ​ឈរលើ​គោលការណ៍​ចំនួន​៥ រួមមាន​៖

​ទី​១, ចាប់ផ្តើម​បើក​ទេសចរណ៍​ផ្ទៃក្នុង​អាស៊ាន ធ្វើ​ឲ្យ​ចេញ​ជា​រូបរាង​នូវ​ច្រក​ធ្វើដំណើរ​អាស៊ាន និង​បង្កើត​នូវ​កាត​វ៉ាក់សាំង​ឌីជីថល​។

ទី​២, កំណត់​វ៉ាក់សាំង​ការពារ​ជំងឺ​កូ​វីដ​-១៩ ជា​គន្លឹះ​ក្នុងការ​សម្រេចបាន​នូវ​ភាព​ស៉ាំ​ង​សហគមន៍​ឆ្ពោះទៅ​ការ​ដំណើរការ​ចង្វាក់​ឧស្សាហកម្ម​ទេសចរណ៍​ឡើងវិញ​។

​ទី​៣, ជំរុញ​លើកទឹកចិត្ត​ការរស់នៅ​ក្នុង​គន្លង​ប្រក្រតីភាព​ថ្មី​ស្របតាម​វិធាន​សុខាភិបាល និង​ស្តង់ដា​ប្រតិបត្តិ​នៃ​ប្រទេស​សមាជិក​នីមួយៗ​។

ទី​៤, ធានា​ឲ្យ​បាន​ថា​សេវាកម្ម និង​ធុរកិច្ច​ទេសចរណ៍​ដំណើរការ​ដោយ​អនុលោម​តាម​គោលការណ៍​អាស៊ាន​ស្តីពី​អនាម័យ និង​សុវត្ថិភាព​សម្រាប់​អ្នកជំនាញ​ទេសចរណ៍ និង​សហគមន៍​។​

​ទី​៥, ជំរុញ​ភាពជឿជាក់ និង​ទំនុកចិត្ត​តាមរយៈ​ការលើកទឹកចិត្ត​ដល់​ប្រតិបត្តិ​ករ និង​អ្នកផ្តល់​សេវាកម្ម​ទេសចរណ៍​ទាំងអស់ ក្នុង​តំបន់​អាស៊ាន​។

នា​ឱកាស​នោះ លោក​រដ្ឋមន្ត្រី ថោង ខុន ក៏បាន​ប្រកាស​ដាក់ឱ្យ​ប្រើ​ប្រាស់​ឡូហ្គោ​ទេសចរ​ណ៍​អាស៊ាន​ថ្មី (New ASEAN Tourism Logo) និង​តែម​ការធ្វើដំណើរ​ប្រកបដោយ​សុវត្ថិភាព​អាស៊ាន (ASEAN Safe Travel Stamp “Safe and Warm”) ដែលជា​ផ្នែក​មួយ នៃ​ផែនការ​ស្តារ​វិស័យ​ទេសចរណ៍​ឡើងវិញ​។

គួររំលឹកថា មាន​ប្រសា​ស​ន៏​នៅក្នុង​ពិធី​បើក​វេទិកា​ទេសចរណ៍​អាស៊ាន​លើក​ទី​៤០ (ATF 2022) ឆ្នាំ​២០២២ ដែល​រៀបចំ​ធ្វើឡើង​នៅ​ខេត្ត​ព្រះសីហនុ កាលពី​ថ្ងៃទី​១៨ ខែមករា សម្តេច​តេ​ជោ ហ៊ុន សែន បាន​គាំទ្រ​គំនិត​ផ្ដួចផ្ដើម​បើក​ទេសចរណ៍​ផ្ទៃក្នុង​អាស៊ាន ក៏ដូចជា​បើក​តំបន់​ទាំងមូល ដើម្បី​ទទួល​ស្វាគមន៍​ទេសចរ​អន្តរជាតិ​ឡើងវិញ សម្តេច​ក៏បាន​គាំទ្រ​ឲ្យ​រដ្ឋមន្ត្រី​ទេសចរណ៍​អាស៊ាន ពិភាក្សា និង​ឯកភាពគ្នា​ប្រកាស​បើក​ទេសចរណ៍​អាស៊ាន​ឡើងវិញ​ចេញពី​ទីក្រុង​ព្រះសីហនុ ប្រទេស​កម្ពុជា​៕

ដោយ ៖ កោះ​កែវ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម