អាជ្ញាធរថៃឃាត់ឈ្មួញដឹកសាច់ និងឆ្អឹងជំនីជ្រូក ខុសច្បាប់នៅក្បែរព្រំដែន​ដុតកម្ទេចចោល

កម្លាំងជំនាញថៃ បានឃាត់រថយន្តកុងតឺន័រមួយគ្រឿង បន្ទាប់ពីរថយន្តនោះបានឆ្លងស្ពានមិត្តភាពថៃ-ឡាវ ( ស្ពានទី២ ) ឆ្ពោះចូលទៅក្នុងប្រទេសថៃ    កាលពីព្រលប់ថ្ងៃទី ២៥ ខែមករា ឆ្នាំ២០២២។

សមត្ថកិច្ចរកឃើញ នៅក្នុងរថយន្តមានសាច់ និងឆ្អឹងជំនីជ្រូក សរុបប្រមាណ ២៤ តោន បើគិតជាទឹកប្រាក់ប្រហែល ៦ លានបាត ដោយសាច់ជ្រូកទាំងនេះ គ្មានច្បាប់អនុញ្ញាតក្នុងការនាំចូល និងគ្មានការឆ្លងកាត់ត្រួតពិនិត្យពីជំនាញបសុពេទ្យឡើយ។ ហេតុដូច្នេះក្រសួងកសិកម្មបានសម្រេចធ្វើការដុតកម្ទេចចោលទាំងអស់ ដោយឡែកអ្នកបើកបរ ដែលពាក់ព័ន្ធ យោងតាមផ្លូវច្បាប់ ត្រូវមានទោសជាប់ពន្ធនាគាររយៈពេល ២ឆ្នាំ និងពិន័យជាប្រាក់ មិនលើសពី ២ សែនបាត។

ជុំវិញរឿងរ៉ាវទាំងអស់នេះ ក្រសួងកសិកម្មថៃ បានចាត់កម្លាំងចុះសហការជាមួយមន្ត្រីបសុសត្វ និងមន្ត្រីការពារព្រំដែន គ្រប់ច្រកល្ហក ឈរជើង២៤ម៉ោង ដើម្បីឃ្លាំមើលករណីណាដែលមានការសង្ស័យ។

សូមបញ្ជាក់ថា មួយរយ:ចុងក្រោយនេះ គេសង្គេតឃើញថា សាច់ជ្រូកនៅលើទីផ្សារក្នុងប្រទេសថៃ បានហក់ឡើងថ្លៃយ៉ាងខ្ពស់ ដែលធ្វើឲ្យប្រជាពលរដ្ឋថៃមួយចំនួន ងាកមកបរិភោគសាច់ក្រពើជំនួសវិញ ដោយសារតែសាច់ក្រពើមានតម្លៃថោក។ អត្ថបទ៖ សោ និយមរ័ត្ន