ជំនួបក្រៅផ្លូវការរវាងនាយករដ្ឋមន្រ្តី កម្ពុជា-ថៃ៖ សម្តេច ហ៊ុន ម៉ាណែត លើក ៤ចំណុច ផ្តោតសំខាន់ដោះស្រាយបញ្ហាព្រំដែនតាមយន្តការដែលមានស្រាប់

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានឱ្យដឹងថា សម្តេចបានជួបជជែកក្រៅផ្លូវការជាមួយលោក Anutin Charnvirakul នាយករដ្ឋមន្ត្រីថៃ នៅទីក្រុងកាហ្សាន សហព័ន្ធរុស្សី ដោយបានលើកឡើងពីជំហររបស់កម្ពុជា ពាក់ព័ន្ធនឹងការដោះស្រាយបញ្ហាព្រំដែនកម្ពុជា-ថៃ។

តាមរយៈសំណេរលើបណ្តាញសង្គមហ្វេសប៊ុក នៅថ្ងៃទី១៩ ខែមិថុនា ឆ្នាំ២០២៦ សម្តេចធិបតីបានបញ្ជាក់ថា កម្ពុជាប្រកាន់ខ្ជាប់នូវគោលការណ៍ដោះស្រាយបញ្ហាព្រំដែនជាមួយថៃដោយសន្តិវិធី និងស្របតាមច្បាប់អន្តរជាតិ។

សម្តេចធិបតីបានលើកឡើងថា សម្រាប់បញ្ហាព្រំដែនសមុទ្រ ភាគីទាំងពីរគួរបន្តដោះស្រាយតាមរយៈយន្តការ Compulsory Conciliation ក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ដែលកំពុងដំណើរការ។

ចំពោះបញ្ហាព្រំដែនគោក សម្តេចធិបតីបញ្ជាក់ថា កម្ពុជានៅតែជ្រើសរើសយន្តការទ្វេភាគីដែលមានស្រាប់ គឺគណៈកម្មការចម្រុះព្រំដែនកម្ពុជា-ថៃ (JBC) ដោយផ្អែកលើកិច្ចព្រមព្រៀងដែលមានស្រាប់។

ទន្ទឹមនេះ កម្ពុជាបានជំរុញឱ្យភាគីថៃតែងតាំងប្រធាន JBC របស់ខ្លួន និងចាប់ផ្តើមការងារវាស់វែង និងខណ្ឌសីមាព្រំដែនឱ្យបានឆាប់ ស្របតាមស្មារតីនៃសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ដែលភាគីទាំងពីរបានចុះហត្ថលេខា។

សម្តេចធិបតីក៏បានបញ្ជាក់ថា ពាក់ព័ន្ធនឹងការបើកច្រកព្រំដែនគោក គឺមិនមានភាពចាំបាច់ក្នុងការលើកយកមកពិភាក្សានាពេលនេះទេ៕