Connect with us

ព័ត៌មានជាតិ

អ្នកនាំពាក្យ៖ រាជរដ្ឋាភិបាលនឹងមិនព្រងើយ​ចំពោះករណីប្រេងសាំងឡើងថ្លៃ

បានផុស

នៅ

ប្រេងសាំងបន្តឡើងថ្លៃខ្ពស់ នៅដើមឆ្នាំ ២០២២នេះ។ មូលហេតុដែលនាំឲ្យប្រេងឡើងថ្លៃ មិនពាក់ព័ន្ធកត្តាពន្ធនាំចូល ឬដេប៉ូលក់ប្រេងដំឡើងថ្លៃដោយខ្លួនឯងនោះទេ គឺទាក់ទិននឹងតម្រូវការ នៃការផ្គត់ផ្គង់លើទីផ្សារអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រាជរដ្ឋាភិបាល តាមរយៈក្រសួងពាណិជ្ជកម្ម កំពុងពិនិត្យតាមដានជាថ្មី ទៅលើរូបមន្តដែលក្រសួងបានធ្វើកន្លងមក ពាក់ព័ន្ធជាមួយប្រេងសាំងនេះ។

កន្លងមកមានសាធារណជនជាច្រើន សង្ស័យថា កត្តាប្រេងឡើងថ្លៃនៅកម្ពុជានេះ ទំនងជារដ្ឋដំឡើងពន្ធបន្ថែម ទើបបណ្តាលឲ្យអ្នកនាំចូលប្រេងដំឡើងថ្លៃដើម្បីចំណេញ។ ឆ្លើយតបចម្ងល់នេះ អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានឲ្យដឹងថា គិតមកដល់ពេលនេះ ថ្លៃពន្ធនាំចូល ពន្ធលើអាករពិសេស ពន្ធលើតម្លៃបន្ថែម និងការកំណត់ការចំណេញ និងចំណាយ របស់អាជីវករ គឺនៅដដែល មិនមានការប្រែប្រួលទេ ពោលគឺរដ្ឋាភិបាលមិនបានដំឡើងពន្ធលើតម្លៃប្រេងនាំចូលឡើយ។ លោក សុវិជាតិ បានសង្កត់ធ្ងន់ថា កត្តាតែមួយគត់ដែលធ្វើឲ្យប្រេងឡើងថ្លៃ គឺការប្រែប្រួលតម្លៃប្រេងនៅលើទីផ្សារអន្តរជាតិ ប្រេងដែលចម្រាញ់ហើយ និងប្រេងឆៅ។ ​

ទោះយ៉ាងណា អ្នកនាំពាក្យក្រសួងពាណិជ្ជកម្ម បានអះអាងថា ប្រសិនបើសភាពការនេះចេះតែវិវត្តរកតម្លៃខ្ពស់បន្ថែមទៀត ដែលធ្វើឲ្យប៉ះពាល់ដល់ជីវភាពពលរដ្ឋ ឬដល់វិស័យនានា  រដ្ឋាភិបាល ជាពិសេសក្រសួងពាណិជ្ជកម្ម មិនព្រងើយកន្តើយនោះឡើយ នឹងមានការពិភាក្សាជាថ្មីជាមួយក្រុមហ៊ុន និងភាគីពាក់ព័ន្ធ ដូចជា ក្រសួងសេដ្ឋកិច្ច និងហិរញ្ញវត្ថុ ដើម្បីពិនិត្យឡើងវិញនូវការងារកំណត់រូបមន្ត ដោយបច្ចុប្បន្នក្រសួងកំពុងបន្តតាមដានលើបញ្ហានេះ។ ​

នៅក្នុងកាលៈទេសៈដ៏លំបាកនេះ លោក ប៉ែន សុវិជាតិ ជំរុញឲ្យពលរដ្ឋ និងវិស័យនានាចូលរួមធ្វើការសន្សំសំចៃខ្លះ ក្នុងប្រើប្រាស់ប្រេងឥន្ធនៈ ចំពោះមុខសញ្ញាណាដែលមិនចាំបាច់ ​ធ្វើដូចនេះ ដើម្បីកាត់បន្ថយការចំណាយដែលមិនបង្កឲ្យប៉ះពាល់ដល់ជីវភាព។

ក្រសួងពាណិជ្ជកម្ម នឹងមានយុទ្ធសាស្រ្ត ក្នុងការឆ្លើយតបពីតម្រូវការ និងការផ្គត់ផ្គង់។ ចំណែកផលិតកម្ម ក្រសួងឧស្សាហកម្មរ៉ែ និងថាមពល កំពុងបន្តធ្វើការស្រាវជ្រាវរុករករ៉ែ ដើម្បីធ្វើឲ្យប្រទេសយើងក្លាយជាប្រទេសផលិតប្រេងនៅថ្ងៃអនាគត។

ជាការកត់សម្គាល់កន្លងមក ប្រទេសធំៗ ដូចជាប្រទេសចិន និងអាមេរិកជាដើម តែងតែបញ្ចេញប្រេងក្នុងស្តុករបស់ខ្លួន នៅពេលដែលតម្លៃប្រេងអន្តរជាតិហក់ឡើង។ ប៉ុន្តែរហូតមកដល់ពេលនេះ ប្រទេសធំៗទាំងនេះ នៅមិនទាន់បង្ហាញសញ្ញាណាមួយ ដើម្បីឆ្លើយតបនឹងបញ្ហានេះទេ ដោយគ្រាន់តែបង្ហាញការព្រួយបារម្ភប៉ុណ្ណោះ។ នេះបើតាមការបញ្ជាក់របស់អ្នកនាំពាក្យក្រសួងពាណិជ្ជកម្មកម្ពុជា។

សូមបញ្ជាក់ថា តម្លៃប្រេងសាំងធម្មតានៅកម្ពុជា បានបន្តឡើង ១៥០ រៀល បន្ថែមទៀត ដែលនឹងត្រូវដាក់លក់ក្នុងតម្លៃ ៤ ៥០០ រៀល ក្នុង១លីត្រ ខណៈប្រេងម៉ាស៊ូត បានឡើង ២០០ រៀល ធ្វើឱ្យតម្លៃកើនដល់ ៤ ២០០ រៀល ក្នុង១លីត្រ និងប្រងសាំងស៊ុបពែ ១លីត្រ ៥០៥០រៀល ចាប់ពីថ្ងៃទី ១ ដល់ថ្ងៃទី ១៥ ខែកុម្ភៈ ឆ្នាំ ២០២២។ នេះបើតាមប្រកាសរបស់ក្រសួងពាណិជ្ជកម្ម៕

អត្ថបទ៖ ទូន សុផល

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម