លោក ឌួង ងៀប មានអាជីវកម្មប៉ុន្មាន​នៅក្នុងដៃ?

សាធារណជនប្រហែលជាមិនបានដឹងអំពីអាជីវកម្មរបស់លោក ឌួង ងៀប មានប៉ុន្មាន និងមានអ្វីខ្លះនោះទេ ព្រោះព័ត៌មានទាក់ទងនឹងអាជីវកម្មរបស់លោក ពុំមានការផ្សព្វផ្សាយទូលំទូលាយឡើយ។

កម្ពុជាថ្មី បានស្រាវជ្រាវដឹងថា អាជីវកម្មរបស់លោក ឌួង ងៀប មានដូចជា ស្ថានីយ៍ប្រេងតូតាល់ នៅផ្លូវ ២០០៤ និងបុរី ឌួង ងៀប ទួលពង្រ ជាដើម។

ថ្លែងតាមរយៈវីដេអូ Live​ នៅលើផេកផ្លូវការ កាលពីថ្ងៃទី ០៧ ខែ កុម្ភៈ លោក ឌួង ងៀប បានលើកឡើងថា លោកមានរោងចក្រចំនួនបីកន្លែង និងកំពុងរកស៊ីមុខជំនួញជាមួយជនជាតិចិន។ ក្រៅពីនេះ លោកបានបញ្ជាក់ថា នៅមានដីជាច្រើនកន្លែងទៀត ដែលមានតម្លៃខ្ទង់លានដុល្លារ ផងដែរ។ ក្រៅពីមានងារជាឧកញ៉ា លោក ឌួង​ ងៀប គឺជាឧត្ដមសេនីយ៍ឯកផ្កាយបី នៅក្រសួងមហាផ្ទៃ។

សមត្ថកិច្ចរាជធានីភ្នំពេញ បានឃាត់ខ្លួនឈ្មោះ ឌួង ងៀប នៅព្រឹកថ្ងៃទី ១៤ ខែកុម្ភៈនេះ។ ប្រភពព័ត៌មានច្បាស់ការ ពីសាលាដំបូងរាជធានីភ្នំពេញ បានឲ្យដឹងថា ការឃាត់ខ្លួនលោក ឌួង ងៀប គឺអនុវត្តតាមដីកាបង្គាប់ឲ្យចាប់ខ្លួន របស់ចៅក្រមស៊ើបសួរ សាលាដំបូងរាជធានីភ្នំពេញ លោក អ៊ឹម វណ្ណៈ ពាក់ព័ន្ធនិងបទល្មើស «មិនបំពេញកាតព្វកិច្ច ចំពោះឧបករណ៍ដែលអាចជួញដូរបាន» មានទឹកប្រាក់ប្រមាណ ១០លានដុល្លារ ដែលត្រូវបានប្ដឹង ដោយអ្នកវិនិយោគជនជាតិចិនតៃវ៉ាន់។

លោក ឌួង ងៀប ត្រូវបានតុលាការសម្រេចឃុំខ្លួន នៅពន្ធនាគារប៉េហ្ស៊ី នៅថ្ងៃនេះ៕

អត្ថបទ៖ ទួន សុផល