សហគមន៍កសិកម្មនៅខេត្តកណ្តាលចំនួន៨១១រួមគ្នាបង្កើតសហភាពសហគមន៍កសិកម្មដើម្បីពង្រីកទីផ្សារឱ្យកាន់តែធំ

សហគមន៍កសិកម្មនៅខេត្តកណ្តាលចំនួន៨១១បានរួមគ្នាបង្កើតសហភាពសហគមន៍កសិកម្មដើម្បីប្រមូលផ្តុំកសិផល
និងផ្សារបោះដុំកាន់តែធំសំដៅលើកស្ទួយជីវភាពកសិករឱ្យកាន់តែប្រសើរឡើង។

ថ្លែងក្នុងពិធីបើកមហាសន្និបាតកំណើតដំបូងរបស់សហភាពសហគមន៍កសិកម្មកាលពីថ្ងៃទី១១ ខែមីនា លោក តាំង ម៉េងលាន អភិបាលរងខេត្តកណ្តាល បានមានប្រសាសន៍ថា ការបង្កើតសហភាពសហគមន៍កសិកម្មក្នុងខេត្តកណ្តាលនេះ មានសារៈសំខាន់ និងចាំបាច់ណាស់ក្នុងការជំរុញផលិតកម្ម និងទីផ្សាផលិតផលកសិកម្ម ជាពិសេសដំណាំបន្លែចំរុះ ក្នុងខេត្តកណ្តាល ស្របតាមផែនការអភិវឌ្ឍន៍វិស័យកសិកម្មរបស់ខេត្តកណ្ដាល និងផែនការយុទ្ធសាស្ត្ររបស់ក្រសួងកសិកម្ម រុក្ខាប្រមាញ់ និងនេសាទ។

លោកអភិបាលខេត្តបានបន្តថា លើសពីនេះទៀតការបង្កើតសហភាពសហគមន៍កសិកម្មនេះជាយន្តការដែលដើរស្របនិងឆ្លើយតបជាមួយនឹងផែនការយុទ្ធសាស្ត្រជាតិយុទ្ធសាស្ត្រចតុកោណដំណាក់កាលទី៥និងចូលរួមកាត់បន្ថយភាពក្រីកជាមួយរាជរដ្ឋាភិបាលកម្ពុជា។

លោកអភិបាលរងខេត្តបានថ្លែងអំណរគុណចំពោះ ថ្នាក់ដឹកនាំកម្មវិធី “វ៉តហ្វខាំ”​ នៃក្រសួងកសិកម្ម រុក្ខាប្រមាញ់ និងនេសាទទីភ្នាក់ងារបារាំងសម្រាប់ការអភិវឌ្ឍន៍ប្រចាំកម្ពុជា និងសហគមន៍អឺរ៉ុបដែលបានជួយគាំទ្រ និងចូលរួមអភិឌ្ឍន៍វិស័យកសិកម្មតាមរយៈការធ្វើឲ្យប្រសើរឡើងនូវហេដ្ឋារចនាសម្ព័ន្ធគ្រប់គ្រង ធនធានទឹកការអនុវត្តកសិកម្មអេកូឡូស៊ី ការជំរុញផលិតកម្មស្បៀង និងទីផ្សារ ក្នុងខេត្តកណ្តាលជាពិសេសការគាំទ្រដល់ភាពរឹងមាំរបស់ស្ថាប័នដឹកនាំថ្នាក់មូលដ្ឋាន
តាមរយៈការពង្រឹងសមត្ថភាពសហគមន៍ កសិកម្ម សហភាពសហគមន៍កសិកម្មក្រុមប្រើប្រាស់ទឹក និងទីផ្សារកសិកម្ម ក៏ដូចជាចូលរួមពង្រឹងលើគោលនយោបាយកសិកម្ម និងទីផ្សាររបស់រាជរដ្ឋាភិបាល។

លោក ប៊ុនទួន ស៊ីម៉ូណា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកណ្តាលបានលើកឡើងថា ការស្ម័គ្ររួបរួមគ្នាចងក្រងបង្កើតជាសហភាពសហគមន៍កសិកម្មសបញ្ជាក់ឱ្យឃើញពីទស្សនវិស័យវែងឆ្ងាយ ក្នុងបរិបសាកលភាវូបនីយកម្មឈរលើគោលការណ៍ច្បាប់ បទដ្ឋានគតិយុត្ត ស្មារតី និងឆន្ទៈច្បាស់លាស់។

លោកបានបន្តថាការបង្កើតជាសហភាពនេះនឹងផ្ដល់ភាពងាយស្រួលក្នុងការចុះកិច្ចសន្យាលើផលិតផលកសិផលអ្វីមួយរួមគ្នាជាពិសេសប្រមូលផ្ដុំកសិផល ដើម្បីឈានដល់ការចែកចាយ ឬបោះដុំដ៏ធំមួយក្នុងខេត្តកណ្តាល។

លោកប្រធានមន្ទីរបានសំណូមពរដល់សហគមន៍កសិកម្មទាំង៨១១ដែលស្ម័គ្រចិត្តរួមគ្នាបង្កើតសហភាពនាពេលនេះ ត្រូវពង្រឹងសហគមន៍របស់ខ្លួនជាពិសេសត្រូវរៀបចំមហាសន្និបាតប្រចាំឆ្នាំដើម្បីបង្ហាញឱ្យឃើញពីតម្លាភាពសម្រាប់សមាជិក និងផ្តល់ឱកាសឱ្យសមាជិកជួយផ្តល់យោបល់៕

អត្ថបទ៖ សំអឿន