ក្រុម​ហ៊ុន​វាយ​ផ្ទះថ្ម​ទ្រុឌ​ទ្រោម​ ១៣ ល្វែង​នៅ​ផ្សារ​ក្រោម​ ធ្វើឱ្យថ្នល់​កៅស៊ូ​ប្រេះ​រហែក​អាច​នឹង​រលុះ​បាក់​ស្រុត

ផ្លូវកៅស៊ូប្រវែងជាង ២០ ម៉ែត្រ កំពុងប្រេះរហែក ដែលអាចនឹងបាក់ស្រុត នៅមុខគំនរសំណង់អគារផ្ទះ ១៣ ល្វែង ស្ថិតនៅក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ករណីនេះបង្កឡើងដោយក្រុមហ៊ុនមួយជាអ្នកម៉ៅការវាយផ្ទះទ្រុឌទ្រោម១៣ ល្វែងនេះចោល។

អាជ្ញាធរខេត្តកំពង់ឆ្នាំង បានបញ្ជាក់ថា ករណីនេះ ក្រុមហ៊ុនទទួលម៉ៅការជាអ្នកទទួលខុសត្រូវជួសជុលផ្លូវកៅស៊ូឡើងវិញ។

អភិបាលក្រុងកំពង់ឆ្នាំង លោក យិន សាវ៉េន នៅព្រឹកថ្ងៃទី១៤ ខែមីនានេះបាននិយាយឲ្យដឹងថា «ករណីធ្វើឲ្យផ្លូវកៅស៊ូក្នុងក្រុងកំពង់ឆ្នាំងចំណុចផ្ទះ ១៣ ល្វែងខាងលើនេះប្រេះខូច ខាតគឺជាការទទួលខុសត្រូវរបស់ក្រុមហ៊ុនដែលជាអ្នកស៊ីឈ្នួលវាយផ្ទះល្វែង១៣ល្វែងនេះចោល។ ព្រោះថាមុនម៉ៅការវាយផ្ទះទ្រុឌទ្រោមទាំង ១៣ ល្វែងនេះចោល គឺខាងក្រុមហ៊ុនបានធ្វើកិច្ចសន្យាជាមួយអាជ្ញាធរក្រុង និងខេត្តថា បើការងារខាងលើនេះធ្វើឱ្យស្រុតផ្ទះប្រជាពលរដ្ឋនៅជិតខាង ឬបាក់ស្រុតផ្លូវកៅស៊ូរបស់ខេត្ត នោះក្រុមហ៊ុនជាអ្នករ៉ាប់រងទទួលខុសត្រូវ»។

ករណីប្រេះហែកផ្លូវកៅស៊ូនៅចំណុចខាងលើនេះកាល អាជ្ញាធរខេត្តកំពង់ឆ្នាំង បានចុះត្រួតពិនិត្យរួចហើយត្រៀមសុំគោលការណ៍សម្រេចពីអភិបាលខេត្ត។

តាមការពិនិត្យជាក់ស្ដែងនៅក្នុងការដ្ឋានខាងលើនេះគឺក្រុមហ៊ុនទទួលម៉ៅការវាយកំទេចផ្ទះថ្មទ្រុឌទ្រោមនេះចោល បានជីកគាស់កកាយគ្រឹះផ្ទះចាស់នេះមានជម្រៅប្រមាណពី ៣ទៅ ៤ ម៉ែត្រ។

ដោយឡែកកាលពីអាទិត្យមុនមានភ្លៀងមួយមេធំបានធ្លាក់ចុះមកយ៉ាងខ្លាំងបង្កឱ្យផ្លូវកៅស៊ូនៅចំណុចនេះប្រេះរហែកដែលអាចនឹងរលួសបាក់ស្រុត។

ជាមួយគ្នានេះដែរពេលកើតឡើងនូវហេតុការណ៍នេះអាជ្ញាធរ និងសមត្ថកិច្ចក៏បានដាក់បង្គោលចងខ្សែការពារមិនឲ្យរថយន្តដឹកធ្ងន់បើកឆ្លងកាត់តំបន់ហានិភ័យនេះទេ ព្រោះខ្លាចផ្លូវកៅស៊ូរលុះបាក់៕

អត្ថបទ៖ ឈៀងថារិទ្ធ