Connect with us

ព័ត៌មានជាតិ

អាជ្ញាធរខេត្តកំពត ចុះអនុវត្តវិធានការក្តៅដើម្បីបើកផ្លូវជូនពលរដ្ឋ ខណៈមានបុគ្គលម្នាក់ធ្វើរបងបិទជាច្រើនឆ្នាំ

បានផុស

នៅ

ក្រោមការណែនាំចង្អុលបង្ហាញពីលោក ម៉ៅ ធនិន អភិបាល នៃគណៈអភិបាលខេត្តកំពត កាលពីរសៀលថ្ងៃទី ១៤ ខែមីនា ឆ្នាំ ២០២២ លោក សេង សិរីបុត្រ អភិបាលរងខេត្ត បានដឹកនាំកម្លាំងគណៈបញ្ជាការឯកភាពរដ្ឋបាលខេត្ត ដែលមានការចូលរួមពីមន្ត្រីនៃមន្ទីរ-អង្គភាពជំនាញ និងអាជ្ញាធរមូលដ្ឋានពាក់ព័ន្ធ ចុះត្រួតពិនិត្យ និងអនុវត្តវិធានការ បើកផ្លូវសាធារណៈរបស់រដ្ឋ ជូនប្រជាពលរដ្ឋប្រើប្រាស់ជាធម្មតាឡើងវិញ បន្ទាប់ពីផ្លូវនេះបានធ្វើរបងបិទជាច្រើនឆ្នាំ ដោយបុគ្គល ឈ្មោះ គឹម សោភ័ណ្ឌ ស្ថិតនៅភូមិ ព្រៃឃ្មុំ ឃុំព្រៃឃ្មុំ ស្រុកទឹកឈូ ខេត្តកំពត។

ការអនុវត្តចំណាត់ការនេះ ជាលទ្ធផលកម្លាំងចម្រុះ បានធ្វើការរុះរើទ្វាររបងចំនួន ២កន្លែង។ ក្នុងនោះបង្គោលថ្ម ៧ដើម និងប៉ុស្ដិ៍យាមចំនួន ១ (បណ្ដោយ១ម៉ែត្រ ទទឹង ២ម៉ែត្រ)។ ទន្ទឹមនឹងនោះ រដ្ឋបាលស្រុកទឹកឈូ ក៏បានចេញសេចក្តីជូនដំណឹងណែនាំ ដល់លោក គឹម សោភ័ណ្ឌ ឲ្យមានការចូលរួមអនុវត្តចំណាប់ការបន្ថែមទៀត ដោយឲ្យរំកិលរបងក្បាលដីឲ្យបានទំហំ ៥ម៉ែត្រ ចាប់ពីអ័ក្សផ្លូវ និង រំកិលព្រំរបងខាងលិច ពីចំណីស្រះ ទំហំ ២.៨ម៉ែត្រ។

ដោយឡែកបន្ទាប់មក ក្រុមការងារក៏បានបន្ត ចុះត្រួតពិនិត្យ នឹងអនុវត្តការរុះរើរបងបន្លាលួសមួយកន្លែងទៀត ដែលបុគ្គលគឹម សោភ័ណ្ឌ បានបិទផ្លូវចេញចូលដីរបស់ប្រជាពលរដ្ឋ ស្ថិតនៅភូមិត្រពាំងជ្រៃ ឃុំត្រពាំងធំ ស្រុកទឹកឈូ ខេត្តកំពត និងធ្វើការរុះរើបង្គោលថ្មចំនួន ១១ដើម, បង្គោលឈើចំនួន ២៧ដើម, ខ្សែលួសចំនួន ៣ ខ្សែស្មើនឹង ១៣០,៥ ម៉ែត្រ។

បន្ទាប់ពីមានចំណាត់ការបែបនេះ ប្រជាពលរដ្ឋជាច្រើនគ្រួសារ បានសម្តែងការកក់ក្ដៅ ត្រេកអរ និងថ្លែងអំណរគុណចំពោះអាជ្ញាធរខេត្ត ជាពិសេសលោក ម៉ៅ ធនិន អភិបាលខេត្ត ដែលតែងតែយកចិត្តទុកដាក់ចូលរួមដោះស្រាយ បញ្ហាប្រឈម និងក្តីកង្វល់របស់ពលរដ្ឋ នៅមូលដ្ឋានបានយ៉ាងល្អប្រសើរនិងមានប្រសិទ្ធភាព។

ជាមួយនឹងចំណាត់ការ នៃការរំលោភបំពានដីសាធារណៈរបស់រដ្ឋ ឬដីបុគ្គលឯកជន ដែលតែងតែមានការដោះស្រាយមានប្រសិទ្ធភាព នារយៈពេលកន្លងមកនេះ មហាជនបានចូលរួមអបអរសាទរ និងសម្តែងក្តីសង្ឃឹមយ៉ាងកក់ក្ដៅថា អភិបាលខេត្តកំពត នឹងបន្តអនុវត្តវិធានការ និងការដោះស្រាយ ឲ្យមានប្រសិទ្ធភាព ពិសេសមានចំចាត់ការ ដល់ជនឆ្លៀតឱកាស ដែលលួចបន្លំបំពារបំពានដីរបស់រដ្ឋ និងដីឯកជនបន្តទៀត។

លោក សេង សេរីបុត្រ អភិបាលរងខេត្ត ក្នុងនាមតំណាងលោក ម៉ៅ ធនិន អភិបាល នៃគណៈអភិបាលខេត្តកំពត ក៏បានធ្វើការអំពាវនាវដល់ប្រជាពលរដ្ឋ និងសាធារណជនទូទៅ មិនថាបុគ្គលមានទ្រព្យធនមានអំណាច ឬប្រជាពលរដ្ឋសាមញ្ញធម្មតា ត្រូវតែចូលរួមគោរពច្បាប់ទាំងអស់គ្នា មិនត្រូវធ្វើសកម្មភាពណាមួយ រំលោភបំពារបំពាននាំឲ្យប៉ះពាល់ ដល់ទ្រព្យសម្បត្តិសាធារណៈរបស់រដ្ឋ ឬទ្រព្យសម្បត្តិ និងផលប្រយោជន៍ របស់ប្រជាពលរដ្ឋ ឬបុគ្គលអ្នកដទៃឡើយ។ បើពុំដូច្នោះទេ ការប្រព្រឹត្តនៅទង្វើខុសច្បាប់នេះ នាំឲ្យខូចកេរ្តិ៍ឈ្មោះ និងប្រឈមចំពោះបញ្ហាមុខច្បាប់ទៀតផង៕

អត្ថបទ៖ សេង ណារិទ្ធ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម