រដ្ឋបាលជលផល​ខេត្តកណ្តាល​ប្រើធម៌ក្តៅ​ចុះបង្ក្រាប​បទល្មើស​នេសាទ​ជាក់ស្តែង​តាមដង​ទន្លេសាប

រដ្ឋបាលជលផល​ខេត្តកណ្តាល​ សហការជាមួយអាជ្ញាធរស្រុកពញាឮ​ ដឹកនាំដោយលោក​ តាំង​ ម៉េងលាន​ អភិបាលរងខេត្តកណ្តាល​ និងលោក ថន សុវណ្ណា​ អភិបាលស្រុកពញាឮ​ បានចុះ​ពិនិត្យមើល​បទល្មើសនេសាទ​ ដើម្បីធ្វើការ​បង្ក្រាបភ្លាមៗ​នៅនឹងកន្លែង​តាមដងទន្លេសាប​ ត្រង់​ចំណុច​ភូមិតាពៅ ភូមិជ្រោយសំបួរ ស្ថិតក្នុងឃុំកោះចិន និងភូមិជ្រៃអណ្ដែត ស្ថិតក្នុងឃុំកំពុងអុស នៅថ្ងៃទី២៥ ខែមីនា ឆ្នាំ២០២២។ ​

លោក ហេង សុភារិទ្ធិ នាយខណ្ឌរដ្ឋបាលជលផលខេត្តកណ្តាលបានឱ្យដឹងថា ក្នុងប្រតិបត្តិការបង្ក្រាប​បទល្មើសនេសាទនេះ កម្លាំងជំនាញបានសម្រេចរុះរើ និងបំផ្លាញចោលលូស្បៃមុងចំនួន ៣៣ មាត់លូ របាំងស្បៃប្រវែង ២៩០០ម៉ែត្រ បង្គោលតូចធំចំនួន ១៩៨០ដើម និងលបនរកចំនួន ២០​គ្រឿង។

លោកបានបញ្ជាក់ថា ដើម្បីលុបបំបាត់់បទល្មើសនេសាទខុសច្បាប់បានលុះត្រាប្រជានេសាទ​ទាំង​អស់ ត្រូវចូលរួមគោរពច្បាប់ស្ដីពីជលផលទាំងអស់គ្នា ពីព្រោះបើពឹងលើកម្លាំងសមត្ថកិច្ចតែម្ខាង​គឺមិន​អាចបង្ក្រាបបានជោគជ័យ ១០០%បានទេ គឺយើងទាំងអស់គ្នាត្រូវតែចូលរួមថែរក្សាទាំងអស់គ្នា ទើបធ្វើឱ្យធនធានជលផលមានការកើនឡើង គង់វង្សដល់កូនចៅជំនាន់ក្រោយទៀត។

​លោកបញ្ជក់ទៀតថា​ ​ខណ្ឌរដ្ឋបាលជលផលខេត្តកណ្តាល​ នឹង​បន្តសហការ​ជាមួយ​អាជ្ញាធរ​ដែនដី​​គ្រប់លំដាប់ថ្នាក់​ ព្រមទាំង​កងកម្លាំងប្រដាប់អាវុធ​គ្រប់ប្រភេទ​ ដើម្បី​ចុះធ្វើការ​ទប់ស្កាត់​បង្រ្កាបបទ​ល្មើស ជលផលក្នុងភូមិសាស្រ្ត​ខេត្តកណ្ដាល​ឱ្យដូចភ្លៀង​រលឹមចាប់​ពីពេលនេះតទៅ​ ពិសេស​ចាត់​វិធាន​ការទៅលើឡូត៍​ដាយត្រីខុសច្បាប់ទាំងអស់​ ដើម្បីជួយការពារ​ធនធានមច្ឆាជាតិ​របស់យើង​មាន​ការ​កើនឡើង ស្របតាមប្រសាសន៍របស់សម្ដេចតេជោ ហ៊ុន សែន នាយ​ករដ្ឋមន្រ្តីកម្ពុជា ដែលក្នុង​ពេលថ្មីៗនេះ បានជំរុញ​ឱ្យក្រសួងស្ថាប័ន​ពាក់ព័ន្ធ​ក្នុង​ដែនសមត្ថកិច្ច​នេសាទ​ទាំងអស់ ត្រូវបង្ក្រាប​បទល្មើនេសាទគ្រប់ប្រភេទឱ្យអស់ ដើម្បី​ធ្វើ​ឱ្យ​ធនធានមច្ចាជាតិ​មានការកើនឡើង​ជាលំដាប់​ពីមួយ​ឆ្នាំ​ទៅមួយឆ្នាំ​៕

អត្ថបទ៖ ឆៃ យ៉ា