ព័ត៌មានជាតិ
វិវាទការងារនៅក្រុមហ៊ុនណាហ្គាវើលដ៍ នៅតែគ្មានដំណោះស្រាយដដែល
រហូតមកដល់រសៀលថ្ងៃទី២៩ខែមីនាឆ្នាំ២០២២នេះវិវាទការងារនៅក្រុមហ៊ុន ណាហ្គាវើលដ៍នៅតែគ្មានដំណោះស្រាយដដែលពោលគឺភាគីកម្មករនិយោជិតនិងភាគីក្រុមហ៊ុននៅតែប្រកាន់ជំហរតឹងត្អឹងរៀងៗខ្លួន។
យោងតាមសេចក្តីជូនដំណឹងរបស់ក្រសួងការងារនិងបណ្តុះបណ្តាលវិជ្ជាជីវៈចុះនៅយប់ថ្ងៃទី២៩មីនានេះបានឱ្យដឹងថា ក្រសួងបាន បន្តសម្របសម្រួលវិវាទការងាររួមនៅក្រុមហ៊ុន ណាហ្គាវើលដ៍ ស្របតាមតួនាទីដែលមានចែងក្នុងច្បាប់ជាធរមាន ក៏ដូចជាស្របតាមស្មារតីចង់បានរបស់តំណាងភាគីកម្មករនិយោជិតដែលចង់ជួបចរចាជាមួយក្រុមហ៊ុនផ្ទាល់។ នៅរសៀលថ្ងៃទី២៩ ខែមីនា ឆ្នាំ២០២២ នេះ ក្រសួងបានបន្តអញ្ជើញគូភាគីវិវាទមកជួបប្រជុំដោះស្រាយជា លើកទី៦។
ក្នុងកិច្ចប្រជុំនោះភាគីកម្មករនិយោជិតសង្ឃឹមថានឹងមានពន្លឺខ្លះក្នុងការទទួលបានការដោះស្រាយ និងបានពិភាក្សាគ្នាអំពីជម្រើសដែលអាច ទទួលបានលទ្ធផលឈ្នះ-ឈ្នះ សម្រាប់ភាគីវិវាទទាំងសងខាង។ ក្រុមហ៊ុនធ្លាប់បានប្រើពាក្យ “បេះដូងមនុស្សធម៌ ចំពោះប្រជាជនខ្មែរ ហេតុអ្វីត្រឹមបុគ្គលិក ២០០នាក់ ដែលគាត់ចង់បន្តការងារនៅក្នុងក្រុមហ៊ុន បែរជាមិនអាច ទទួលយកពួកគាត់បាន ពួកយើងក៏ជាជនជាតិខ្មែរដែរ។ ដូចនេះ តំណាងកម្មករនិយោជិតនៅតែបន្តទាមទារឱ្យ ពិភាក្សាអំពីការទទួលយកកម្មករនិយោជិតចូលធ្វើការវិញ និងសង្ឃឹមថាភាគីកម្មករនិយោជិតនឹងទទួលបាននូវ ព័ត៌មានថ្មីពីក្រុមហ៊ុនលើសំណើទាមទារ ដែលជាសំណើដដែលនេះ។
ជាមួយគ្នានោះភាគីនិយោជិតបានស្នើសុំទៅភាគីក្រុមហ៊ុនទទួលយកកម្មករនិយោជិតដែលបានបញ្ឈប់នេះចូលជាសមាជិកគ្រួសារ ក្រុមហ៊ុន ណាហ្គាវើលដ៍ ឡើងវិញ ពីព្រោះកម្មករនិយោជិតកំពុងតែមានវិបត្តិ និងជម្រើស ទទួលយកនេះធ្វើឱ្យក្រុមហ៊ុនក្លាយជាក្រុមហ៊ុនគំរូ។
ភាគីកម្មករនិយោជិតបានលើកឡើងថាខ្លួនមិនយល់ឃើញថា គួរពិភាក្សាអំពីចំណុចវិវាទផ្សេងៗ តាមការលើកឡើងរបស់ក្រុមហ៊ុននោះទ ពីព្រោះចំណុចវិវាទទី១ ដែលពាក់ព័ន្ធនឹងការទាមទារចូលធ្វើការវិញនេះ គឺជាជម្រើសរបស់បុគ្គលិក ដើម្បីលើក យកមកពិភាក្សា។ ដូចនេះកម្មករនិយោជិតនៅតែចង់ឱ្យពិភាក្សាលើចំណុចវិវាទទី១ ជាមុន។ តំណាងកម្មករ និយោជិតមានចម្ងល់អំពីមូលហេតុអ្វីដែលក្រុមហ៊ុនតែងតែលើកឡើងឱ្យពិភាក្សាលើចំណុចវិវាទចំនួន៣ ផ្សេង ទៀត។
ចំណែកតំណាងក្រុមហ៊ុន ណាហ្គាវើលដីវិញនៅតែបន្តបញ្ជាក់ជំហរថា ក្រុមហ៊ុនមិនអាចទទួលយកកម្មករនិយោជិតដែលត្រូវបានបញ្ឈប់ពីការងាររួម ឱ្យចូលធ្វើការវិញបានទេ ហើយក៍មិនពិចារណាក្នុងការដោះដូរតាមសំណើរបស់តំណាងកម្មករនិយោជិតនោះដែរ ដូចក្រុមហ៊ុនបានបញ្ជាក់នៅក្នុងកិច្ចប្រជុំកាលពីថ្ងៃទី២១ និងថ្ងៃទី២៣ ខែមីនា ឆ្នាំ២០២២ រួចមកហើយ។
តំណាងក្រុមហ៊ុនពន្យល់ថា មិនអាចទទួលយកកម្មករនិយោជិតដែលនៅសល់ចំនួន ២០០នាក់ ដែលបានបញ្ឈប់ស្របតាមនីតិវិធី ច្បាប់ ដែលមានចែងនៅក្នុងនីតិវិធីនៃការបញ្ឈប់ពីការងាររួម។ ការបញ្ឈប់នេះ ក្រុមហ៊ុនបានកំណត់លក្ខណៈ វិនិច្ឆ័យដើម្បីកំណត់ថា បុគ្គលិកណាដែលត្រូវអងផលប៉ះពាល់ក្នុងការបញ្ឈប់ការងាររួមនេះ។
យ៉ាងណាក៏ដោយតំណាងក្រុមហ៊ុននៅតែមានជំហរដោះស្រាយឱ្យបានលឿនជាមួយនឹងសហជីព។ ប៉ុន្តែក្រុមហ៊ុនស្នើឱ្យតំណាងកម្មករនិយោជិតលើកឡើងនូវជម្រើសផ្សេងទៀត ដែលជាជម្រើសដែលអាចទៅរួច ប្រសើរជាងជម្រើសបច្ចុប្បន្ននេះដើម្បីយកមកពិភាក្សាព ហើយក្រុមហ៊ុននឹងរង់ចាំទទួលព័ត៌មានថ្មីពីខាងតំណាងកម្មករនិយោជិត។
តំណាងក្រុមហ៊ុននៅតែបន្តស្នើសុំឱ្យតំណាងកម្មករនិយោជិតពិភាក្សាលើចំណុចវិវាទចំនួន៣ ផ្សេងទៀត ដែលអាចផ្តល់ ប្រយោជន៍សម្រាប់កម្មករនិយោជិតភាគច្រើន។ ក្រុមហ៊ុនគិតថា គួរតែពិភាក្សាលើបញ្ហាដែលនៅសេសសល់ ទាំងនោះព្រោះថា ទោះជាដោះស្រាយនៅទីណា ឬទៅស្ថាប័នតុលាការក៏ដោយ បញ្ហាទាំងអស់នៅក្នុងវិវាទ ក៏មុខតែនឹងលើកឡើងមកពិភាក្សាដដែល។ ក្រុមហ៊ុនយល់ឃើញថា ស្ថាប័នពាក់ព័ន្ធបានចំណាយពេលវេលា ច្រើនក្នុងការជួយដោះស្រាយករណីនេះ ដូច្នេះភាគីវិវាទគួរតែប្រើប្រាស់ពេលវេលានេះឱ្យមានតម្លៃ។
ក្រោយពីការពិភាក្សាគ្នាយ៉ាងផុសផុល ភាគីទាំងពីរបានឯកភាពនៅមិនទាន់ឈានដល់ចំណុចព្រមព្រៀងគ្នានៅឡើយទេនិងបានកំណត់កាលបរិច្ឆេទប្រជុំបន្ទាប់ នៅថ្ងៃទី៦ ខែមេសា ឆ្នាំ២០២២ វេលាម៉ោង ១៤:៣០នាទីដើម្បីឱ្យភាគីទាំងពីរមានឱកាសពិចារណាឡើងវិញ អំពីលទ្ធភាពនៃការធ្វើសម្បទានគ្នាទៅវិញទៅមកដែលអាចទៅបញ្ចប់វិវាទនេះ។
ក្រសួងការងារបានបញ្ជាក់ផងដែរថា បើទោះបីជាមិនទាន់មានការឯកភាពគ្នា ក៏ក្រសួងនិងបន្តខិតខំធ្វើការសម្របសម្រួល និងកំណត់កាលបរិច្ឆេទប្រជុំបន្តបន្ទាប់ទៀត ស្របតាមតួនាទីដែលកំណត់ដោយច្បាប់ ក៏ដូចជាការទាមទាររបស់គូភាគី។
ជាថ្មីម្តងទៀត ក្រសួងស្នើឲ្យភាគីទាំងពីរមានការយោគយល់គ្នាខ្ពស់ក្នុងការចូលរួមដោះស្រាយបញ្ចប់វិវាទការងារនេះ, បន្តសហការជិតស្និទ្ធជាមួយអាជ្ញាធរមានសមត្ថកិច្ច និងភាគីពាក់ព័ន្ធដោយសន្តិវិធី, និងថែរក្សាសន្តិសុខ សណ្ដាប់ធ្នាប់សាធារណៈ។
យោងតាមនីតិវិធីច្បាប់ ប្រសិនបើវិវាទការងារនេះមិនអាចស្វែងរកដំណោះស្រាយ បានដោយការផ្សះផ្សា វិធីបន្ទាប់ពីអាចបញ្ជូនទៅតុលាការ ដើម្បីរកដំណោះស្រាយចុងក្រោយ៕
ដោយ ៖ សំអឿន
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង