អតីតបុគ្គលិកណាហ្គាវើលដ៍ ២៣៤នាក់ ហើយព្រមទទួលយកប្រាក់បំណាច់បញ្ចប់កិច្ចសន្យាការងារ

រហូតមកដល់ពេលនេះ មានអតីតបុគ្គលិកក្រុមហ៊ុនណាហ្គាវើលដ៍ ចំនួន២៣៤នាក់ហើយក្នុងចំណោម៣៧៣នាក់ បានយល់ព្រមទទួលយកការទូទាត់នូវប្រាក់បំណាច់បញ្ចប់កិច្ចសន្យាការងារជាមួយក្រុមហ៊ុន។ យោងតាមសេចក្តី​ប្រកាសព័ត៌មាន របស់ការិយាល័យអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈចុះ កាលពីយប់​ថ្ងៃទី១២សីហា។ គិតត្រឹមថ្ងៃនេះ ចំនួនអតីតបុគ្គលិកដែលមិនព្រមទទួលយកសំណងនៅសល់ត្រឹម ១៣៩នាក់ប៉ុណ្ណោះ។

រហូតមកដល់ពេលនេះវិវាទការងារនៅក្រុមហ៊ុនណាហ្គាវើលដ៍នៅមិនទាន់មានដំណោះស្រាយនៅឡើយទេ ដោយសារភាគីសហជីព និងក្រុមហ៊ុននៅតែប្រកាន់ជំហរតឹងរ៉ឹងរៀងៗខ្លួន។

ការិយាល័យអ្នកនាំពាក្យក្រសួងការងារបានបញ្ជាក់ថា ទោះបីជាមិនទាន់មានការឯកភាពគ្នាក៏ក្រសួងនឹងបន្តខិតខំ​ធ្វើឱ្យការសម្របសម្រួល​និងកំណត់កាលបរិច្ឆេទប្រជុំជាបន្តបន្ទាប់ទៀតស្របតាមតួនាទីដែលបានកំណត់​ដោយច្បាប់ក៏ដូចជាការទាមទាររបស់គូភាគី។ យ៉ាងណាក៏ដោយ ក្រសួងស្នើឱ្យភាគីទាំងពីរមានការយោគយល់គ្នា​ខ្ពស់ក្នុងការចូលរួមដោះស្រាយបញ្ចប់វិវាទការងារនេះបន្តសហការជិតស្និទ្ធជាមួយអាជ្ញាធរមានសមត្ថកិច្ចនិងភាគីពាក់ព័ន្ធដោយសន្តិវិធីថែរក្សាសន្តិសុខសណ្ដាប់ធ្នាប់សាធារណៈនិងត្រូវរក្សាភាពស្ងប់ស្ងាត់៕ សំអឿន