សត្វត្មាត​ចំនួន ១២៨ក្បាល ​កំពុងមានវត្តមាន​ក្នុងដែន​ជម្រកសត្វព្រៃ​កម្ពុជា​ចំនួន ​៤ខេត្ត  

លទ្ធផលជំរឿនសត្វត្មាតនៅកម្ពុជាលើកទី៣ សម្រាប់ឆ្នាំ២០២២នេះ កម្ពុជាមានសត្វត្មាតចំនួន ១២៨ ក្បាលត្រូវបានកត់ត្រា។ វត្តមានសត្វត្មាតទាំង ១២៨ក្បាលនេះ មាននៅដែនជម្រកសត្វព្រៃសៀមប៉ាង ខេត្តស្ទឹងត្រែងចំនួន ៨០ក្បាល ដែនជម្រកសត្វព្រៃឆែប ខេត្តព្រះវិហារចំនួន ១៥ក្បាល ដែនជម្រកសត្វ ព្រៃសំបូរ ខេត្តក្រចេះចំនួន ២៤ក្បាល និងដែនជម្រកសត្វព្រៃស្រែពក ខេត្តមណ្ឌលគិរីចំនួន ៩ ក្បាល។

បើតាមលោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ការបើកដំណើរការជំរឿនសត្វត្មាតនៅកម្ពុជា គឺស្ថិតក្នុងក្របខណ្ឌនៃការធ្វើជំរឿនចំនួន ៥ដងក្នុងមួយឆ្នាំ ដើម្បីតាមដានលើទិន្នន័យវត្តមានរបស់សត្វត្មាត និងការត្រៀមរៀបចំផែនការបន្តក្នុងការការពារ ថែរក្សា និងអភិរក្សប្រភេទសត្វស្លាបកម្រនេះឲ្យបានគង់វង្ស។

លោកថ្លែងថា ក្រុមការងារអភិរក្សសត្វត្មាត នឹងបន្តធ្វើជំរឿនចំនួន ២ដងទៀតសម្រាប់ឆ្នាំ ២០២២នេះ គឺនៅខែកញ្ញា និងខែធ្នូ ឆ្នាំ២០២២ ដើម្បីធ្វើសេចក្តីសន្និដ្ឋានថាចំនួនសត្វត្មាតនៅឆ្នាំ២០២២ មានចំនួនកើនឡើង ឬក៏មានចំនួនថេរ បើប្រៀបធៀបនឹងឆ្នាំ២០២១ កន្លងទៅ។

លោករដ្ឋលេខាធិការ បញ្ជាក់ឲ្យដឹងថា ទិន្នន័យជំរឿនសត្វត្មាតកាលពីឆ្នាំ២០២១ បង្ហាញថា នៅ​ប្រទេស​កម្ពុជាមានសត្វត្មាត ​៣ប្រភេទ ​គឺ​ត្មាតភ្លើង ត្មាត​ត្នោត និង​ត្មាតប្រផេះ ដែលមាន​វត្តមាន​សរុប​ចំនួន ១២១ ​ក្បាល នៅក្នុង​អាហារដ្ឋាន​ត្មាតចំនួន​ ៤កន្លែងនៃតំបន់​ការពារ​ធម្មជាតិ​កម្ពុជា។ ​ក្នុង​នោះ​មាន​ត្មាតភ្លើង ២០ ​ក្បាល​ ត្មាតប្រផេះ ៦៦ក្បាល និង​ត្មាត​ត្នោត​ ៣៥ក្បាល។ ​

បើទោះបីជាមិនទាន់អាចកំណត់បានចំនួនសត្វត្មាតពិតប្រាកដក្នុងឆ្នាំ២០២២នេះក៏ដោយ  តែរដ្ឋលេខាធិ ការក្រសួងបរិស្ថានរូបនេះ បានបង្ហាញសុទិដ្ឋិនិយមថា ចំនួនសត្វត្មាតនៅកម្ពុជាអាចនឹងមានចំនួនថេរ ឬអាចនឹងមានកើនតិចតួច ប៉ុន្តែមិនធ្លាក់ចុះឡើយ ព្រោះលទ្ធផលនៃជំរឿនកាលពីថ្ងៃទី១៧ ខែមិថុនា ឆ្នាំ២០២២ ក្រុមការងារអភិរក្សសត្វត្មាតកម្ពុជា បានកត់ត្រាវត្តមានសត្វត្មាតចំនួន ១២៨ក្បាលដែលមានចំនួនច្រើនជាងឆ្នាំ២០២១ រួចស្រេចទៅហើយ។ ដូច្នេះ អាចសន្និដ្ឋានបឋមថា ត្មាតនៅកម្ពុជាអាចមានចន្លោះពី១២៨ ដល់ ១៣៤ក្បាល នៅឆ្នាំ២០២២នេះ៕

អត្ថបទ ៖ នាង រតនៈ