ចន្លោះពីខែមករា ដល់ខែសីហា ឆ្នាំ២០២៥ ក្រសួងបរិស្ថានរកឃើញសត្វសំខាន់ៗ ៤២ប្រភេទ នៅក្នុងឧទ្យានជាតិវីរជ័យ

តាមការសិក្សាស្រាវជ្រាវជីវ:ចម្រុះដោយម៉ាស៊ីនថតស្វ័យប្រវត្តដែលធ្វើឡើងនៅចន្លោះខែមករា ដល់ខែសីហា ឆ្នាំ២០២៥ ក្រសួងបរិស្ថាន បានរកឃើញប្រភេទសត្វសំខាន់ៗ ដែលកត់ត្រាបានចំនួន ៤២ប្រភេទ នៅក្នុងឧទ្យានជាតិវីរជ័យ ដែលស្ថិតនៅភាគឦសាននៃប្រទេសកម្ពុជា។

តាមការកត់ត្រារបស់ក្រសួងបរិស្ថាន សត្វសំខាន់ៗ ដែលបានកត់ត្រាតាមរយ:ម៉ាស៊ីនថតស្វ័យប្រវត្តនេះរួមមាន ថនិកសត្វ ៣២ប្រភេទ បក្សី ៩ប្រភេទ និងពួកល្មួន ១ប្រភេទ។ សម្រាប់ប្រភេទសត្វដែលកត់ត្រាខាងលើនេះមាន ២ប្រភេទជាសត្វជិតផុតពូជបំផុត ៥ប្រភេទជាសត្វជិតផុតពូជ និង១៣ប្រភេទសត្វងាយរងគ្រោះ ដោយឡែកកំណត់ត្រាវីដេអូរបានកត់ត្រានូវហ្វូងដំរីអាស៊ី ដែលជាសក្ខីភាពបង្ហាញពីមោទនភាព និងភាពសមស្របនៃទីជម្រកធម្មជាតិនៃតំបន់ឧទ្យានជាតិវីរៈជ័យ។ ប្រភេទសត្វកម្រសំខាន់ៗជាច្រើន រួមមាន៖ ដំរីអាស៊ី ឆ្កែព្រៃ ខ្លាពពក ខ្លាលឿងមាស កេងកងធំ ខ្លាភ្ញីថ្មកែវ រញីប្រផេះ ក្ងោក ស្វាកន្ទុយស ពង្រូល និងប្រភេទសត្វផ្សេងៗជាច្រើនទៀត។

ការរកឃើញប្រភេទសត្វសំខាន់នៅក្នុងឧទ្យានជាតិវីរជ័យនេះ ដោយមានចូលរួមតាមរយៈកិច្ចសហការរវាង អង្គការសត្វព្រៃ និងរុក្ខជាតិ ជាមួយក្រសួងបរិស្ថាន ដោយមានការគាំទ្រពីមន្ទីរបរិស្ថានខេត្តរតនគីរី និងការចូលរួមពីជនជាតិដើមភាគតិច និងសហគមន៍មូលដ្ឋានផងដែរ។ ឧទ្យានជាតិវីរជ័យ ស្ថិតនៅភាគឦសាននៃប្រទេសកម្ពុជា ដែលជាជម្រកដ៏មានសារៈសំខាន់សម្រាប់សត្វព្រៃគ្រប់ប្រភេទ៕