សហគ្រិនស្ត្រី អ្នកស្រី ហាវ សុខណា ទើបចាប់ផ្ដើមបង្កើតមុខរបរផលិតមីធ្វើពីបន្លែ បន្តពីម្ដាយលក្ខណៈ​គ្រួសារ ​ទទួលបានការគាំទ្រ​ច្រើន ហើយគ្រោង​បើកទៅជាសិប្បកម្មនៅឆ្នាំក្រោយ។ បច្ចុប្បន្នទីតាំងរបស់អ្នកស្រី ស្ថិតនៅភូមិវិមានទ្រង់ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

អ្នកស្រី ហាវ សុខណាបានឲ្យដឹងថា ដើមឡើយមុននឹងគាត់សម្រេចចិត្ត​ចាប់អាជីពធ្វើមី​បន្តពីម្ដាយ​ ដោយសារការមើលឃើញ​ការនិយយចូលចិត្តមី របស់ប្រជាពលរដ្ឋ និងឱកាសទីផ្សារខ្លួនក៏មានគំនិត​ច្នៃមីបន្លែ​លក់តែម្ដង។

អ្នកស្រី ហាវ សុខណា «ខ្ញុំសម្លឹទីផ្សារមីឃើញទូលំទូលាយ ប្រសិនជាអាចខ្ញុំចង់នាំចេញទៅក្រៅប្រទេសដែរ ប្រសិនទីផ្សារដើរខ្លាំង ហើយខ្ញុំឃើញបងប្អូនយើងចូលចិត្តមី តាមហាងស៊ុប គុយទាវ ជាពិសេសពេលបុណ្យទាន ពួគាត់ត្រូវការឆាសែន និងញាំជុំបងប្អូន»។

បច្ចុប្បន្ន អ្នកស្រី អាចផលិតបានមី ៥០ គីឡូ ក្នុង១ថ្ងៃ ដោយអាចលក់ចេញបាន ១០០ ថង់ក្នុងមួយថ្ងៃ ដែល១ ថង់មូលទម្ងន់ ៧ ខាំ និងថង់ជ្រុងមាន ៤ ខាំ ដល់កន្លះគីឡូ ហើយសម្រាប់ថង់ដុំមូលតម្លៃប្រមាណ ៥ ពាន់រៀល និងតាមទម្ងន់តិចច្រើន។

​មីដែលអ្នកស្រីផលិត មាន ៤ រសជាតិ ដែលអ្នកញាំអាចជ្រើសរើសបានដូចជារសជាតិបន្លែ មីល្ពៅ មីពងមាន់ និងមីត្រាវ។

សង្វាក់ផលិតកម្មមីរបស់អ្នកស្រី ហាវ សុខណា មានគុណប្រយោជន៍ច្រើន មិនត្រឹមតែផ្ដល់អត្ថប្រយោជន៍សុខភាព សម្រាប់អ្នកដែលទទួលទានមីបន្លែនោះទេ គឺអាចផ្ដល់ការងារ ដល់បងប្អូនអ្នកជិតខាង ដែលរស់នៅក្នុងភូមិ ដែលពួកគាត់អត់ការងារធ្វើ។

រហូតមកដល់ពេលនេះ អ្នកស្រីមិនចាំបាច់ហត់ដើរទៅរកទីផ្សាទៀតនោះទេ ព្រោះមានម៉ូយ​ប្រចាំដែលតែងតែដាក់កាមង់ជារៀងរាល់ថ្ងៃ ពិសេសហាងភោជនីដ្ឋានតូចធំ​យកទៅបន្តលក់​តាម​ទីផ្សារ។

អ្នកស្រីចង់ឱ្យប្រជាពលរដ្ឋនៅក្នុងស្រុកជួយគាំទ្រផលិតផលខ្មែរ ដើម្បីបង្កើតការងារក្នុងស្រុកឱ្យបានច្រើន៕

អត្ថបទ៖ ឌឿន ចាន់ថារី