គិតត្រឹមខែកក្កដា ឆ្នាំ ២០២២នេះ ក្រសួងឧស្សា​ហកម្ម ចុះបញ្ជីដល់ SME ជាង ៤ម៉ឺនមូលដ្ឋាន បង្កើតការងារបានជាង ៤សែននាក់

គិតត្រឹមខែកក្កដា ឆ្នាំ ២០២២នេះ ក្រសួងឧស្សា​ហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចុះបញ្ជីដល់សហគ្រាស​ធុនតូច ​និងមធ្យម (SME) ជាង ៤ម៉ឺនមូលដ្ឋាន នៅទូទាំងប្រទេស ដោយបានបង្កើតការ​ងារជាង ៤សែននាក់។ នេះបើតាមការឲ្យដឹងពីមន្ត្រីជាន់ខ្ពស់ក្រសួងឧស្សា​ហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

លោក ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សា​ហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍” នាព្រឹកថ្ងៃទី ១១ ខែសីហានេះថា ក្រសួងរបស់លោក ដែលទទួលខុសត្រូវសំខាន់ទៅវិស័យសហគ្រាស​ធុនតូច ​និងមធ្យម​ (SME) ផ្នែកកម្មន្ដសាល បានចុះបញ្ជីដល់សហគ្រាស​ធុនតូច ​និងមធ្យម ចំនួន ៤៣,៨១៣ មូលដ្ឋាន នៅទូទាំងប្រទេស បើគិតត្រឹមខែកក្កដា ឆ្នាំ ២០២២នេះ ហើយបានបង្កើតការងារចំនួន ៤៤២,៨៣៨នាក់។

ចំនួននេះ មានការកើនឡើងចំនួន ៤,៤២៣មូលដ្ឋាន បើប្រៀបធៀបនឹងរយៈពេល ៥ឆ្នាំមុន ពោលគឺនៅ​ឆ្នាំ ២០១៧ ហើយបើគិតជាភាគរយមានកំណើនចំនួន ១១.២២ភាគរយ ហើយកម្លាំងពលកម្មមានការកើនឡើងចំនួន ២៤៣,​៥១៩នាក់ បើប្រៀបធៀបទៅនឹងឆ្នាំ ២០១៧ ហើយគិតជាភាគរយមានកំណើន ១២២.១៧ភាគរយ។

លោក ហេង សុខគង់ បានឲ្យដឹងបន្តថា ក្នុងរយៈពេល ៧ខែឆ្នាំ ២០២២នេះ មានការចុះបញ្ជីដល់សហគ្រាស​ធុនតូច ​និងមធ្យម ចំនួន ១០៣មូលដ្ឋាន និងបានបង្កើតការងារចំនួន ១,៤១២នាក់។ ក្នុងនោះដែរក្រសួងឧស្សា​ហកម្ម វិទ្យា​សាស្ត្រ បច្ចេកវិទ្យា និងនវានុវត្តន៍ បានខិតខំជំរុញការកសាងបទដ្ឋានគតិយុត្តជាច្រើន សម្រាប់វិស័យ​ SME នេះ គឺដូចជា៖ ការបញ្ចប់នូវសេចក្ដីព្រាង គោលនយោបាយអភិវឌ្ឍន៍សហគ្រាស​ធុនតូច ​និងមធ្យម សប្បកម្ម សម្រាប់ឆ្នាំ ២០២៣-២០២៧, ការបញ្ចប់សេចក្ដីព្រាងអនុក្រឹត្យ ស្ដីពី បង្កើតការគ្រប់គ្រងនូវតំបន់ប្រមូលផ្ដុំសហគ្រាស​ធុនតូច ​និងមធ្យម, និងការបញ្ចប់នូវសេចក្ដីព្រាងច្បាប់ ស្ដីពី សហគ្រាសធុនតូច និងមធ្យម ជាដើម៕

អត្ថបទ៖ ឃួន សុភ័ក្រ